Danieli 9
9
Danieli asabira abaandu bae
1Dario omwaana wa Ahasuera, omwibulana wa Media yali omutuki w'Abakaludaaya. 2#Yer 25:11; 29:10.Mu mwaaka kutaangira okw'obutuki bwae okwo, ese, Danieli, ndali nihaliirisa bulai mu bitabo byoolerefu. Mani nimbona endi emyaaka kyahabe amahumi kataanu-na-kabiri, chi siko sya Yerusalemu syamale nisiri ekuunda, ohuchianakana neende yi Omwaami yaboolera omunabbi Yeremia.
3Ao mani ningaluuhana niningaala eyiri Omwaami Nasaae, ndamwekweeda niisaba esaala, nisiiba enjala, nindefwaala engubo ch'egunia, haandi ninjihala mu kohe. 4Mani niisaba Omwaami Nasaae waange, haandi nindefunaka hulw'ebyonoono by'abaandu, nimboola endi: “Omwaami Nasaae, Niiwe omuhuluundu haandi otiisa. Niiwe oliinda endagaano yooba n'oholere haandi wekesa obuheeri bwao butaakama eyiri abo abahudaha haandi abadiira amalako kao.” 5Efwe hwahola ebyonoono, hwonoona, hwahola ebitahoyera hwahujeemera, hwaleha amalako kao neende ebilagiro byao. 6Haba sihwawulira emboosi ch'abahalaabani bao, abanabbi; abo abalomalomeraanga mu liita lyao eyiri abatuki beefwe, eyiri abeemirisi beefwe, neende eyiri bakuuka yeefwe, neende eyiri abaandu bomu syaalo boosi. 7Nae Ewe, Ewe Omwaami, Niiwe omuluungifu mweene, nae efwe abeene neefwe abeleetera ebiindu bidiisa esoni buli ludaalo, koti hu hulimo bulaanu. Sino syadyeeri eyiri efwe fweesi mbwe; abaandu bali mu Buyudea, eyiri mwaabo abamenya mu Yerusalemu, neende eyiri Abaisiraeli boosi, abali aambi neende abo abali eyale muno, abasalaanira mu byaalo byoosi bi wabayiramo, olwobutaba abeesikwa yooli. 8Nae efwe, Ewe Omwaami, huli abadoondobanu, efwe beene, abatuki beefwe, abeemirisi beefwe, neende bakuuka yeefwe, olwohuba hwahola ebyonoono mani nihuhudiisya etima. 9Nae Ewe Omwaami Nasaae weefwe, Ewe oli ow'esisa haandi oleheramo, kata hwaahaba nihwahujeemera. 10Hwaahaya ohuwulira ekono ly'Omwaami Nasaae weefwe, nihudiira amalako kae, kayatuberesa n'abitira mu bahalaabani bae abanabbi. 11Abaisiraeli boosi bafunaka amalako kao badoondobana, bahaya ohuwulira ekono lyao. Mani sakira watutaaho esibwaabo si wechuba ohututaaho, esyandiikwa mu malako ka Musa, omuhalaabani wa Nasaae, olwohuba hwonoona mu moni wao. 12Ewe Nasaae, woseresa emboosi chao chi walomaloma hw'efwe, neende hu batuki beefwe, mani n'otuleetaho amasira maangi katyo. Olwohuba hu syaalo syoosi, sibulao esiindu syeholaanga koti esyo sy'oholere hu Yerusalemu. 13Amasira kano koosi katukwiireho koti lu syaandiikwa mu malako ka Musa. Nae bulaanu, Ewe Omwaami Nasaae weefwe, haba husisiiri ohudeebaho ohuhusangaasa nihutula hu bibi byeefwe, mani hwomiirira hu bwadyeeri bwao. 14Mani sakira Omwaami ali omwetekefu ohutukwiisaho amasira kano; olwohuba Omwaami Nasaae weefwe muluungifu niye mu biindu byoosi bi ahola, nae efwe haba sihuwulira ekono lyae. 15“Mani bulaanu, Ewe Omwaami Nasaae weefwe, watusa abaandu bao mu syaalo sy'e Misiri, weekesa obunyala bwao, mani ohwoola buti, basiichulisaanga eliita lyao. Nae efwe hwahola ebyonoono, hwahola ebiindi bidoondobanu. 16Ewe Omwaami, ohuchianakana neende obuluungifu bwao bw'ohola bwoosi, leha ohunyoolerera neende ohwaalabira Yerusalemu, esiko syao haandi olugulu lwao lwoolerefu. Olwohuba ebyonoono byeefwe, neende ebyonoono bya bakuuka yeefwe, abaandu boosi neende ebyaalo bisyebodoohaanie byoosi bilekeeresa Yerusalemu alala neende abaandu bao. 17Mani bulaanu, Ewe Nasaae weefwe, tekeeresa ohusaba hw'omuhalaabani wao, neende ohwekweeda hwae. Mani olwohuba oluyaali lwao Ewe Omwaami, yaabina enyuumba yao njoolerefu eyalehwa ao koti ekuunda yityo. 18Ewe Nasaae waange, teka ohutwi mani owulire; liimbula mani obone obudinyu bweefwe, neende esiko syalaangwaanga neende eliita lyao koti lu syalehwa ao sityo. Huhwekweeda ataali mbwe hwahola ebiluungifu mu moni wao, nae olwohuba Ewe oli ow'esisa siingi. 19Ewe Omwaami, wulira! Ewe Omwaami, leheramo! Ewe Omwaami, deeba mani otahiinda daawe! Yekesa oluyaali lwao, olwohuba esiko sino syao nisyo haandi abaandu bano bao nibo.”
Malaika Gabburieli atuumbula amahuluundu k'ebiindu byalaangwa
20Nindali nisilomalomaanga haandi nisyekongooyaanga, nindefunaka ebyonoono byaange neende ebyonoono by'abaandu baange Abaisiraeli, haandi nindekweeda Omwaami Nasaae waange, akoboseo oluyaali lw'Olugulu lwae lwoolerefu. 21#Luk 1:19,26.Mani nindali nisilomalomaanga niisaba esaala, Gabburieli, oyo yi ndabona muhuboneherwa hwataangira, n'abburuha bwaangu niyoola yi ndali. Byali ebiha by'ohuyaaniramo ebiyaanwa by'engoloobe. 22Yeechia mani naamboolera ati: “Ewe Danieli, bulaanu njichire ohuhuberesa amakesi mani omanye. 23Niwali nochaaka ohwekweeda hwao eyiri Nasaae, yahukobolamo. Bulaanu njichire ohuhuboolera esiindu si wekweeda, olwohuba oli omuheerwa muno. Mani baasa hu mboosi chi huboolera mani omanye amahuluundu k'ebiindu bi wabona muhuboneherwa.
24“Ebiha by'ejuma amahumi kataanu-na-kabiri amahabi amahumi kataanu-na-kabiri ak'emyaaka, nibyo ebiha byateerwao abaandu bao neende esiko syao syoolerefu, ohwakamya ohuhola ebidoondobanu, neende ohwonoona, neende ohwekongooya ohuleherwamo ebyonoono, neende ohutaao obuluungifu bw'endaalo choosi. Mani ebyo ebyeekeswa muhuboneherwa, neende ebyalaangwa neende omunabbi, bimale byoolerere, mani Abuundu Woolerefu muno ao akoboswemo oluyaali haandi achuhweho amafuta. 25Mani sakira manya haandi omanye obwadyeeri oti, ohutula hu biha bi elako lyatula ohukobosao neende ohwoombaha Yerusalemu buyaaha, ohwoola hu biha bi omwaana w'omutuki ow'ohuchuhwaho amafuta, chahabeeo ejuma chitaanu-na-chibiri. Mani hulw'embaka y'ejuma amahumi kasaasaba neende chibiri, Yerusalemu syahombahwe buyaaha, engira chasyo neende enyuumba chaasyo nichiri enyomiifu, nae ebyo byahabe ebiha by'obudinyu. 26Mani ejuma amahumi kasaasaba neende chibiri nichahaweeho, Oyo Owabahahwo amafuta n'amala yeetwa, n'ataliho omusaango. Mani esiko neende Abuundu Woolerefu byahasihiriswe neende eye ly'omutuki w'amaani, elyaheeche ohusiseeta. Mani enjakamo y'omutuki oyo koti omuhula kw'amaachi lu kuchia. Hwahabeeo ohulwaanakana, ohwoolera elalira hu njakamo. Ohusihirirwa Nasaae wahutekeha hale. 27#Dan 11:31; 12:11; Mat 24:15; Mrk 13:14.Mani omutuki oyo yahahole neende abaandu baangi endagaano y'amaani hulw'embaka y'ejuma ndala. Mani akatikaati w'ejuma eyo, yahaakamye ebiyaanwa neende ebilweeyo. Mani aakulu weene w'abuundu woolerefu, oyo osihirisa yahateeo esy'omusiro, ohwoola lu njakamo eyamutekeherwa lu yahoole.”
Currently Selected:
Danieli 9: SAMIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019
