1 Abatesalonika 4
4
Obulamu busangaasa Nasaae
1Muhumaliirisa, basyeefwe, mwamala ohutuboneraho engeri y'obulamu bu muhoyere ohuba nabwo hu musaangaase Nasaae. Buno nibwo obulamu bu mulimo. Mani bulaanu hubasaba haandi hubekweeda mu liita ly'Omwaami Yesu huti, mwemeede sa ohuholaanga mutyo.
2Olwohuba mumanyire enjekesa yi hwababeresa ohubitira mu maani k'Omwaami Yesu. 3Nasaae abadahisa mube aboolerefu, haandi mubulireho elalira esyonoono esy'obucheke syoosi. 4Buli musaacha yeesi hweeng'we ahoyere ohumanyaanga engeri yaahoyere ohumenyeramo neende omuhasi wae mu bwoolerefu neende mu luyaali, 5ataali obwekoombi bw'ohuhola eby'esoni, koti abaandu bataali neende efukiirira, abataamanyire Nasaae. 6Mani hu sifune sino ataba hoo omuundu yeesi oholera owaasye esibi, oba oweehoonyera ehabi yae ohuchiira mu waasye. Olwohuba hwamala ohubaboolera hutyo hale nihubeekesa koti lu muhoyere ohweliinda, huti Omwaami achia ohusaandya abaandu bahola ebiindu bifwaana bityo. 7Olwohuba Nasaae siyatulaanga ohumenya mu bulamu bw'obucheke, nae ohumenya mu bulamu bwoolerefu. 8Mani sakira omuundu ohaya enjekesa yino haba saaba n'ahayire emboosi ch'omuundu nae aba ahayire emboosi cha Nasaae mweene owababeresa Mwooyo Mwoolerefu wae.
9Sisihoyera mbaandiikire ebidiira hu huheerana neende Abakristo baasyeeng'we hu muhoyere ohuba nahwo. Olwohuba eng'we abeene Nasaae yamala ohubeekesa koti lu muhoyere ohuheeranaanga. 10Haandi mubwadyeeri bweene, eng'we mweekesa koti lu mwaheera Abakristo bali mu Makedonia boosi. Nae basyeefwe, hubekweeda huti mwemeede sa ohuholaanga mutyo. 11Mube neende esichiiririrwa esy'ohumenyaanga obulamu bulai, nimudeeba hu mirimo kyeeng'we kyoong'ene koti lu hwabeekesa ohutula hale. 12Ao nilwo lu muba muchia ohuba neende obulamu buhoyera mani mwiiswemo oluyaali neende abo abasisiiri erwaanyi w'efukiirira, haandi hu munyale ohutaba neende esiindu syoosi si mwekoomba.
Ohwiicha hw'Omwaami
13Baasyeefwe, hudaha mumanye obwadyeeri budiira hu bafu, mani muhaye ohwewunamiraanga koti abaandu babula esuubi. 14Olwohuba koti lu hufukiirira huti Yesu yafwa haandi yaasyuuha, nilwo sa lu hufukiirira huti, Nasaae achia ohukobosera alala Yesu neende abo abafwa nibamufukiiriramo. 15#1 Kor 15:51,52. Huli ohubeekesa enjekesa ya Nasaae yeene huti: efwe abacha ohuba nihusisiiriwo abalamu ohwoola hu ludaalo lu Omwaami achia ohukoboleraho, haba sihwahataangiriremo abo abamala ohufwa. 16Lichia ohubao ekono lyuubba omulaanga, ekono lya malaika muhuluundu, ekono ly'eturumbete ya Nasaae, mani Omwaami mweene yeehe aasi naatula Muukulu. Mani abafwa nibafukiirira mu Kristo nibo abacha ohutaangira ohusyuuha, 17hu bulaanu efwe bahabe nihusisiiriwo abalamu esiha esyo, batubuusire alala nabo, ohuchia ohubukaanira Omwaami mu maleesi. Mani huchia ohubechaanga neende Omwaami endaalo choosi. 18Sakira, mulemesanieenge emyooyo neende emboosi chino.
©Bible Society of Kenya, 2019
©Bible Society of Uganda, 2019