1 Abatesalonika 5
5
Mweetekehere ohwiicha hw'Omwaami
1Baasyeefwe, sisihoyere ohubaandiikira ebidiira hu biha oba obwiire bu biindu bino bicha ohukwiirao. 2#Mat 24:43; Luk 12:39; 2 Pet 3:10. Olwohuba abeene mumanyire bulai muti Oludaalo lw'Omwaami luchia ohwiichia koti omwiibi mu siro. 3Abaandu nibaboola bati, omuleembe kuliwo, haandi bati buli siindu syoosi siyenjeefu, mani abweene ao niwo yi bachia ohusihirisirwa! Luchia ohwiichia bwaangu koti ohulumwa hw'omuhasi odaha ohwiibula hwiichaanga, mani abulao omuundu yeesi ochia ohweebalula daawe. 4Nae eng'we baasyaange, haba simusisiiri mu siirima, mani Oludaalo siluhoyere ohubakwaaho sa koti omwiibi. 5Eng'we mweesi muli abaana b'obulafu, haandi abaana b'esideete. Sihuli ab'esiirima oba ab'esiro daawe. 6Mani sakira sihuhoyere ohukona endoolo koti baandu baandi, nae huhoyere ohubechaanga meeso, haandi mwaaywe. 7Olwohuba abaandu bakona endoolo, bakonaanga esiro, haandi abameesi, bameeraanga esiro. 8#Yis 59:17; Efes 6:13-17. Nae efwe huli ab'esideete, mani sakira huhoyere ohubechaanga abaaaywe. Huhoyere ohwefwaalaanga efukiirira neende obuheeri hu koti ebbaati libwiiha hu sirifu, neende esuubi lyeefwe ly'obuwonia koti lu ekofia nyaangalafu muno yohumutwe. 9Nasaae siyatutekehera etima daawe, nae yatutekehera ohunyoola obuwonia ohubitira mu Omwaami weefwe Yesu Kristo, 10owatufwiira hu bulaanu humenye alala nae, kata nihuba abalamu oba abafu hu ludaalo lu yaheechereho. 11Mani sakira, mulemyeenge abasyeeng'we emyooyo haandi muhoonyaneenge koti lu muli ohuholaanga sa bulaanu.
Enjekesa neende amaheeso bimaliiriha
12Baasyaange hubekweeda huti mubeereseenge oluyaali luhoyera abo ababahalaabaniramo, ababakololosa haandi baabeekesa ebidiira hu bulamu bw'efukiirira mu Kristo. 13Mubeeseengemo oluyaali lw'amaani, haandi mubaheereenge hulw'omulimo ku bahola. Mumenyeenge nimuli mu muleembe abeene-na-beene. 14Baasyeefwe, hubekweeda huti mukerakireenge abaandu batadaha ohuhola emirimo, mugumieenge abati, muhoonyeenge abakata, haandi mwesimiirisireenge buli muundu. 15Ataba hoo omuundu yeesi mweeng'we owutuunga esibi hu sibi, nae ebiha byoosi muboneenge muti echoomo lyeeng'we nilyo ohuholaniraanga ebilai, neende ohuholeraanga abaandu boosi ebilai. 16Saangaaleenge ebiha byoosi, 17mulameenge buli siha, 18haandi mweebaseenge Nasaae mu bulamu bwoosi. Sino nisyo si Nasaae abadahaho mu bulamu bweeng'we buli mu bulala neende Kristo Yesu. 19Muteekaliraanga Mwooyo Mwoolerefu haandi 20mutalekeeresaanga emboosi cha Nasaae. 21Piimeenge buli siindu mberi: lindeenge esilai 22haandi mweebwabeenge esibi sya buli ngeri yoosi.
23Lehe Nasaae otuberesaanga omuleembe abahole mube aboolerefu mu ngeri yoosi haandi aliinde obulamu bweeng'we bwoosi, omwooyo, obulamu, neende omubiri nibitaaliho esibi syoosi, ohwoola hu ludaalo lw'ohwiichiraho hw'Omwaami weefwe, Yesu Kristo. 24Oyo owabalaanga achia ohusihola, olwohuba mweesikwa niye.
25Baasyeefwe, mutulaamireho fwesi.
26Heese Abakristo boosi neende ohukwiichana mu birifu hwoolerefu.
27Mbekweeda neende obunyala bw'Omwaami endi, musome ebbarwa yino eyiri Abakristo boosi.
28Embabaasi ch'Omwaami weefwe Yesu Kristo chibe naang'we.
©Bible Society of Kenya, 2019
©Bible Society of Uganda, 2019