1 Abatesalonika 3
3
1 #
Biho 17:15. Mani muhumaliirisa, sihwanyala ohwemeeda ohwesimiirisa, sakira hwaheengao ohwemeeda ohumenya fweeng'ene mu Ateeni. 2Nae hwabatumira Timoteo, owaasyeefwe yi huhalaabaniraanga Nasaae alala nae ohuyaala Emboosi Ndai yidiira hu Kristo. Humutuma yi muli ohubomiisa alala neende ohubahoonya mu fukiirira yeeng'we, 3hu bulaanu omuundu yeesi hweeng'we ahaye ohukobola enyuma hulw'ohusaandisibwa huno. Eng'we mumanyire muti ohusaanda huno nihwo engeri ndala yi Nasaae yatutekehera ohubitamo. 4Olwohuba nihwali nihusisiiri naang'we, hwababoolera ebiha nibisisiiri huti huchia ohusaandaanga; haandi lu mumanyire bulai bweene muti sino nisyo esiholehaane sa. 5Mani sakira siinyalire ohwesimiirisa haandi, sakira ndumire Timoteo ohwiicha ohumanya ebidiira hu fukiirira yeeng'we. Ndali nindatya endi awuundi Sitaani omuteemi yamala ohubateema, mani omulimo kweefwe okwo bulaanu nikwafwa sa ebihaya.
6 #
Biho 18:5. Nae Timoteo yamala ohukobola n'atula yi muli niyeecha yi huli, haandi yatuleetera emboosi ndai yidiira hu fukiirira yeeng'we neende obuheeri bweeng'we. Yatuboolera koti lu mutwiichulisaanga buli ludaalo haandi koti lu mwekoombaanga muno ohutubona koti lu fwesi hwekoombaanga ohubabona. 7Mani sakira baasyaange, mu bidinyu byeefwe byoosi neende mu husaandisibwa, hwanyoola amaani nihwawulira ebidiira hu fukiirira yeeng'we. 8Olwohuba bulaanu hunaba abalamu nimudoong'a nimwomiriire mu Omwaami. 9Bulaanu hunyala ohweebasa Nasaae weefwe hulweeng'we. Humweebasa hulw'esangaalo li huli nalyo mu moni wae hulweeng'we. 10Esideete neende esiro, humusabaanga neende emyooyo kyeefwe kyoosi huti, atufukiirire abeene mani hubaberese ebidahibwa mu fukiirira yeeng'we.
11Bulaanu lehe Nasaae weefwe, haandi Seefwe mweene, neende Omwaami weefwe Yesu batutekehere engira y'ohwiicha yi muli! 12Lehe Omwaami ahole ohuheerana hweeng'we abeene, alala neende ohuheera abaandu boosi, hwemeede ohuhula mani hweehole ohuhoongo muno koti ohuheera hu hwabaheereramo fwesi. 13Mu ngira yino nilwo lwaachia ohubameederamo amaani, mani mube ababulaho esibi syoosi, haandi aboolerefu mu moni wa Nasaae weefwe haandi Seefwe, hu ludaalo lu Omwaami weefwe Yesu yahakobolereho alala neende aboolerefu bae boosi.
©Bible Society of Kenya, 2019
©Bible Society of Uganda, 2019