1 Abatesalonika 2
2
Omulimo kwa Paulo mu Tesalonika.
1Baasyaange, abeene mumanyire koti ohubakeniya hweefwe haba sihwali ohw'ebihaya daawe.
2 #
Biho 16:19-24;
Biho 17:1-9. Mumanyire koti lu hwasaandisibwa haandi koti lu hwanyekwa nihwali mu Filipi nihusisiiri ohwiicha mu Tesalonika. Kata katyo, Nasaae weefwe yatuberesa esinani sy'ohubayaalira Emboosi Ndai yitula yaali, kata neende ohuyiinganisibwa nihwali ohubitiirifu. 3Omulaanga kweefwe yi muli haba sikweema hu bukodyo, oba hu esichiiririrwa sibi daawe, haandi kata sihwateemaho ohubachirisaho omuundu yeesi. 4Ohutusaho, buli siha hwalomalomaanga koti lu Nasaae yadahaanga huhole, olwohuba yatweekesaanga sa, haandi atudiisaanga sa Emboosi Ndai. Haba sihwateemaangaho ohusaangaasaanga sa abaandu, nae hwaholaanga ebisangaasa Nasaae yeeng'ene, oyo omanyire ebichiiririrwa by'emyooyo kyeefwe. 5Olwohuba mumanyire bulai bweene muti haba sihweecha yi muli neende emboosi chibwiiha hu kuliira kweefwe daawe, nae Nasaae mweene niye oli omuloli weefwe hu biindu bi nomanoma bino. 6Haba Sihwateemaangaho ohudahaanga omuundu yeesi atufumienge, kata eng'we oba abaandu baandi, 7kata neende nihwali nihuhoyera ohunyoolaangaho bi hwali nihuhoyera koti abatume ba Kristo baandi. Nae hwabechaanga abaloonga sa nihuli naang'we koti omuhasi oliinda abaana bae bulai muno. 8Ohweema hu buheeri bu hwabaheereramo, hwaba neende esangaalo ly'ohubeechulisa, ataali neende Emboosi Ndai yitula eyiri Nasaae yoong'ene, nae kata obulamu bweefwe bweene, olwohuba muli abaandu b'engaanga ya aakulu muno yi huli.
9Baasyeefwe, mubwadyeeri bweene mwiichulisa koti lu hwahalaabanaanga haandi koti lu hwadidihanaanga! Hwahalaabanaanga esiro neende esideete hu huhaye ohuba omugugu musito yi muli nihwali nihubayaaliraanga Emboosi Ndai yitula eyiri Nasaae. 10Eng'we niing'we abaloli beefwe koti lu Nasaae yesi ali omuloli weefwe, ebiima byeefwe yi muli eng'we abafukiirira Kristo koti lu byali ebilai, ebikololofu haandi ebitaaliho obuhyaamu bwoosi. 11Mumanyire muti hwayiraanga buli muundu yeesi hweeng'we koti lu mwiibusi yahayiraanga abaana bae. 12Mani hubasaba nihubataamo esinani, hubagumia emyooyo haandi hubekweeda huti, obulamu bweeng'we bu saangaaseenge Nasaae wabalaanga ohwiingira mu Bwaami bwae neende mu luyaali lwae.
13Haandi huli neende esifune siindi esikera nihweebasa Nasaae buli siha. Nihwabaleetera emboosi ya Nasaae, mwayiwulira haandi mwaayakaanira, ataali koti emboosi y'omuundu sa, nae koti emboosi ya Nasaae mweene, koti lu yiri mubwadyeeri. Olwohuba Nasaae ali ohuholera mweeng'we abafukiirira. 14#Biho 17:5. Olwohuba baasyaange, ebiindu byakwa hu bakristo bomu Yudea, nibyo nasilala neende ebyabakwaaho mwesi, abaandu bafukiirira mu Kristo Yesu. Olwohuba mwesi mwasaandisibwa neende abaandu beeng'we beene koti lu Bayudaaya basaandisibwaanga neende abaandu baabwe beene. 15#Biho 9:23,29; 13:45,50; 14:2,5,19; 17:5,13; 18:12. Abayudaaya bano nibo abeeta Omwaami Yesu neende abanabbi baabwe beene, haandi batusaandyaanga fwesi. Haba sibasaangaasaho Nasaae daawe! Basuku ba buli muundu! 16Kata bateemaho ohutukaira hutayaalira Abateende emboosi yileeta Obuwonia. Nae bulaanu etima lya Nasaae libeheereho!
Paulo yekoomba ohubakeniya haandi
17Nae baasyaange, nihwakabuhanaho naang'we budiidi, ataali mu bibaaso byeefwe, nae mu mubiri, hwabafwiirwa muno mani hwaaba neende amaofu maangi muno ak'ohubabonaho haandi! 18Haandi hwali nihwekoomba muno ohukobolaho yi muli. Mubwadyeeri bweene, ese Paulo ndateemaho amahabi maangi ohukobola yi muli nae Sitaani yatwiikalira engira. 19Nae niing'we esuubi lyeefwe, esangaalo lyeefwe, neende esifune syeefwe sy'ohwesuungiramo obuyiingiri bweefwe mu moni w'Omwaami weefwe Yesu n'akobola. 20Mubwadyeeri bweene, niing'we ohwesuunga hweefwe neende esangaalo lyeefwe!
©Bible Society of Kenya, 2019
©Bible Society of Uganda, 2019