Números 32
32
Iskay jatun ayllukuna Jordán mayoj chimpanpi qhepakunku
(Dt 3.12-22)
1Rubén jatun ayllojta, Gad jatun ayllojtawan ima ashkha uywanku karqa. Chayrayku Jazerpi jallp'a, chantá Galaadpi jallp'awan uywata mirachinapaj sumaj kasqanta reparaspa, 2Gad jatun ayllumanta kajkuna, chantá Rubén jatun ayllumanta kajkuna ima Moisesta, sacerdote Eleazarta, chantá israelitakunaj kurajninkukunata ima nerqanku: 3Atarot, Dibón, Jazer, Nimrá, Jesbón, Eleale, Sebán, Nebo, Beón ima, 4Tata Dios israelitakunapaj jap'isqan jallp'aqa uywata mirachinapaj manchay sumaj kashan. Noqaykojta ashkha uywayku tiyapuwayku. 5Sichus qanman allin rijch'asunki chayqa, noqaykuman chay jallp'ata qowayku. Amaña Jordán mayuta chimpachiwaykuchu ari, nispa.
6Moisestajrí Rubén chantá Gad jatun ayllukunamanta kajkunaman kuticherqa: Wawqeykichejkuna mayuta chimpaspa maqanakoj rishajtinku, qankunaqa kayllapiñachu qhepakuyta munashankichej? 7Imaraykutaj israelitakunata iskayrayachiyta munashankichej, Tata Diospa qosqan jallp'aman ama rinankupajri? 8Tataykichejkunapis kikillantataj ruwarqanku, maypachachus Cadés Barneamanta chay jallp'ata qhawamojta kacharqani, chaypacha. 9Paykunaqa Escol wayq'okama chayaspa, chay jallp'ata qhawarqanku. Chaymanta kutimuspataj, israelitakunata iskayrayacherqanku, Tata Dios paykunaman qosqan jallp'aman ama yaykunankupaj.#Nm 13.17-33. 10Chayrayku Tata Diosqa chay p'unchay maytapuni phiñakorqa, tiluspataj nerqa: 11Egiptomanta llojsimojkunamanta, iskay chunka watayojmanta pataman chay jallp'ata mana rikonqankuchu, imajtinchus mana tukuy sonqochu qhatiwarqanku. Chay jallp'ata Abrahamman, Isaacman, Jacobman ima tiluspa qonayta nerqani, chayman mana yaykonqankuchu. 12Quenizita Yefunej churin Calebwan, chantá Nunpata churin Josuellawan yaykonqanku, imaraykuchus noqata tukuy sonqo qhatiwarqanku, nispa.
13Chaymanta Tata Dios manchayta phiñakuspa, tawa chunka watata israelitakunata ch'innejpi puricherqa Tata Diosta tukuy mana kasojkuna wañuspa tukukunankukama. 14Kunanqa qankunañataj Tata Diosta israelitakunaj contranta phiñachiyta munaspa, juchasapa tataykichej jina ruwayta munashankichej. 15Sichus qankuna mana kasuyta munankichejchu chayqa, Tata Dios kay ch'innejpi israelitakuna unaytaraj kanankuta watej nillanqataj. Qankunataj israelitakuna chinkachisqa kanankupaj juchayoj kankichej, nispa.
16Chantá Rubén, jinataj Gad jatun ayllumanta kajkuna Moisesta nerqanku: Noqayku ovejaykupaj, wakaykupaj ima kanchakunata ruwayta munayku. Aylluykupajtaj llajtakunata sayarichiyta. 17Chaymantataj sumaj wakichisqa israelitakunaj ñawpaqenkuta risqayku, jap'inanku kashan, chay jallp'aman chayachinaykukama. Chaykamataj tukuy aylluyku sumaj ruwasqa llajtakunapi qhepakonqanku, kay cheqanejpi tiyakoj runakuna ama imatapis ruwanankupaj. 18Noqaykurí sapa uj israelita jap'inan kashan, chay jallp'ata jap'ejtinkuraj, wasiykuman kutimpusqayku. 19Jordán mayu chimpapi paykunawan jallp'ata manaña jap'isqaykuchu, nitaj aswan jaqaypipis, imaraykuchus Jordán mayu inti llojsimuynejpi jallp'ayojña kasqayku, nispa.
20Moisestaj kuticherqa: Sichus nisqaykichejta junt'ankichej, sitajchus Tata Diospa ñawpaqenta maqanakoj rinaykichejpaj wakichikunkichej chayqa, 21tukuyniykichej armata oqharisqa Jordán mayuta chimpaychej. Chantá Tata Dios tukuy awqaykichejta qharqonankama chaypi qhepakunkichej. 22Chantá tukuy chay jallp'ata jap'ispaña, wasiykichejman kutimpunkichej. Tata Diospaj, chantá israelitakunapaj imatachus ruwanaykichejta junt'ankichej. Chaymanta kay jallp'a qankunajta kanqa, Tata Diospa nisqanman jina. 23Sichus nisqaykichejman jina mana ruwankichejchu chayrí, kayta allinta yachaychej: Tata Diospa contranta juchallinkichej, juchallisqaykichejraykutaj paypa jasut'iynin pataykichejpi kanqa. 24Kunanqa aylluykichejpaj llajtakunata sayarichiychej, kanchatapis uywaykichejpaj ruwaychej. Chaywanpis imatachus nisqaykichejtapis junt'aychej, nispa.
25Chantá Gad jatun ayllumanta kajkuna, jinataj Rubén jatun ayllumanta kajkuna ima Moisesta nerqanku: Noqaykoqa imatachus kamachisqaykita kikinta ruwasqayku. 26Warmiyku, juch'uy wawayku, chantá tukuy uywaykukuna ima Galaadpi jatarichisqayku llajtakunapi qhepakonqanku. 27Noqaykutaj sumaj wakichisqa, Tata Diospa kamachisqan maqanakoj risqayku, qan kamachiwasqaykuman jina, nispa.
28Chaymanta Moisesqa sacerdote Eleazarta, Nunpa churin Josueta, Israel tukuy ayllumanta kurajkunata ima kay jinata kamacherqa: 29Gad jatun ayllumanta kajkuna, Rubén jatun ayllumanta kajkuna ima maqanakunapaj sumaj wakichisqa, qankunawan khuska Jordán mayuta chimpananku tiyan. Chantá sichus Tata Diospa kamachisqanman jina jallp'ata jap'inkichej chayqa, qankuna Galaad jallp'ata paykunajta kananpaj qonkichej. 30Sichus mana qankunawan khuska Jordán mayuta chimpanqankuchu chayrí, qankunawan khuska Canaán suyupi jallp'ata jap'enqanku, nispa.
31Chantá Gad jatun ayllumanta kajkuna, Rubén jatun ayllumanta kajkuna ima kuticherqanku: Noqayku Tata Diospa kamachisqanman jina ruwasqayku. 32Diosta kasuspa, armayku jap'irisqa Canaán suyuman yaykusqayku. Jinapis Jordán mayu inti llojsimuynejpi jallp'aqa noqaykojta kanqa, nispa.
33Ajinata Moisesqa Gad jatun aylluman, Rubén jatun aylluman, chantá Manasés khuskan jatun aylluman ima jallp'ata qorqa. Chay jallp'aqa amorreokunaj kuraj kamachejninku Sijonpata, chantá Basanmanta kuraj kamachej Ogpatawan karqa. Chayta paykunaqa tukuy llajtankunantinta, chantá muyuyninpi kaj jallp'antinta jap'erqanku. 34Chantá Gad jatun ayllumanta kajkunaqa kay llajtakunata watej sayaricherqanku: Dibonta, Atarotta, Aroerta, 35Atarot Sofanta, Jazerta, Yogbeata, 36Bet Nimrata chantá Bet Arantawan ima. Chay llajtakunata sumaj perqawan muyuykucherqanku, jinallataj ovejankupajpis kanchakunata ruwarqanku. 37Rubén jatun ayllumanta kajkunapis kay llajtakunata watej sayarichillarqankutaj: Jesbonta, Elealeta, Quiriatayinta, 38Nebota, Baal Megonta, Sibematawan ima. Watej sayarichisqanku llajtakunataqa waj sutiwan suticharqanku.
39Manasespata churin Maquirpa churinkunaqa Galaadman rispa, chaypi tiyakoj tukuy amorreokunata qharqorqanku, jallp'ankutataj jap'erqanku. 40Chantá Moisesqa Manasespa churin Maquirpa mirayninman Galaadpi jallp'ata qoporqa. Ajinamanta paykunaqa Galaadpi tiyakorqanku. 41Manasespata churin Yairpis amorreokunamanta juch'uy llajtakunata qhechullarqataj. Chantá qhechusqan llajtakunata: “Javot Yaír”, nispa suticharqa. 42Jinallataj Nobajpis Kenat llajtata, tukuy juch'uy llajtakunantinta ima qhechuspa, jap'erqa. Jap'isqan llajtakunatataj kikin sutillanwantaj suticharqa “Nobaj”, nispa.
Currently Selected:
Números 32: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
