Números 31
31
Israelitakuna madianitakunata atipanku
1Tata Dios Moisesta nillarqataj: 2Israelitakunaj sutinpi madianitakunamanta vengakamuy, chaymantataj wañupunki, nispa.
3Chantá Moisesqa israelitakunata nerqa: Madianitakunawan maqanakoj rinaykichejpaj wakinkuna oqharikuychej. Tata Diospa sutinpi paykunamanta vengakamusunchej. 4Sapa jatun ayllumanta waranqa soldadokuna maqanakoj richunku, nispa.
5Ajinaqa israelitakuna sapa jatun ayllumanta waranqa soldadokunata maqanakoj rinankupaj ajllarqanku. Tukuyninpi 12.000 soldadokuna karqanku. 6Moisesqa paykunata maqanakoj kacharqa, paykunawan khuskataj sacerdote Eleazarpa churin Finés rerqa. Payqa Diospaj t'aqasqa imakunata, chantá maqanakuyta qallarinankupaj waqachinapaj trompetakunatawan aparqa. 7Jinataj israelitakunaqa Tata Dios Moisesman kamachisqanman jina, madianitakunata atipaykuspa, tukuyninta wañucherqanku. 8Paykunatawan khuska Madianmanta kay phishqa kuraj kamachejkunata wañuchillarqankutaj: Evita, Requenta, Surta, Jurta, Rebata ima. Beorpa churin Balaamtapis espadawan wañuchillarqankutaj.
9Chaypacha israelitakunaqa madianitakunaj warminkukunata, chantá wawankukunatawan ima jap'ispa, apakaporqanku. Jinallataj tukuy uywankukunata, tukuy imaymana valorniyoj imakunatawan ima qhechullarqankutaj. 10Jinallataj tukuy llajtankukunata, chantá toldonkukunatapis ruphaykuchillarqankutaj. 11Chantá tukuy ima qhechusqankuta tantaykuspa, runakunata, uywakunata ima, 12Moisesman, sacerdote Eleazarman, israelitakunaman ima aparqanku. Paykuna jarasqa kasharqanku Moab pampapi, Jordán mayu kantupi, Jericó llajtaj chimpanpi.
13Chantá Moiseswan, sacerdote Eleazarwan, israelitakunamanta tukuy kurajkunawan ima jarankumanta llojserqanku maqanakumanta kutimojkunata taripaj. 14Moisestajrí soldadokunata kamachejkunapaj, waranqata kamachejkunapaj, pachajta kamachejkunapaj ima phiñakorqa.
15Chantá Moisés paykunata nerqa: Imaraykutaj kay warmikunata mana wañucherqankichejchuri? 16Kay warmikuna Balaam yuyaychasqanrayku israelitakunata Tata Diospa contranpi juchallicherqanku, Baal Pegor lantinta yupaychanaman pusaspa. Chayrayku Tata Dios israelitakunata millay onqoywan ñak'aricherqa. 17Jinaqa kunanpacha Madianmanta tukuy qhari wawakunata, jinallataj qharita rejsej tukuy warmita wañuchiychej. 18Qharita mana rejsej sipaskunatarí ama wañuchiychejchu, chaykunaqa qankunapaj kachunku.
19Pikunachus qankunamanta runata wañucherqankichej, chayrí wañusqata llankharqankichej, chaykunaqa jaramanta jawapi qanchis p'unchayta qhepakunkichej. Kinsa kaj p'unchaypi, qanchis kaj p'unchaypiwan qankuna, chantá jap'ispa apamusqaykichej runakuna ima llimphuchakunaykichej tiyan Diospa ñawpaqenpi llimphu kanaykichejpaj. 20Jinallataj tukuy p'achata, qaramanta ruwasqa kajta, jinataj cabra millmamanta awasqata, chantá maderamanta ruwasqa kajtapis llimphuchanaykichej tiyan, nispa.
21Chantá sacerdote Eleazar maqanakuman rej tukuy soldadota nerqa: Tata Dios Moisesnejta kamachisqanpi ajinata nin: 22Qorimanta, qolqemanta, broncemanta, fierromanta, estañomanta, chayrí titimanta tukuy ima ruwasqa, 23chantá imatachus nina mana q'olanchu chaykunata, ninapi q'asparankichej. Chantá llimphuchana yakuwan mayllaspa, llimphuchankichej. Tukuy imatachus nina q'olan chaykunatarí, yakullawan mayllaspa llimphuchankichej. 24Qanchis kaj p'unchaypitaj p'achaykichejta t'ajsakunkichej. Ajinamanta llimphupaj qhawasqa kankichej. Chaymantaraj jaramanqa yaykuyta atinkichej, nispa.
Maqanakupi qhechusqankuta rak'inakunku
25Chantá Tata Dios Moisesta nillarqataj: 26Qanwan, sacerdote Eleazarwan, chantá israelitakunaj kurajninkukunawan ima madianitakunamanta imatachus qhechusqankuta yupaychej, runakunata, chantá uywakunata ima. 27Chantá iskayman uj rejta t'aqaspa, khuskanta maqanakoj rejkunaman qoychej, khuskantataj mana rerqankuchu, chaykunaman.
28Chay jawa wakinta noqapaj t'aqapuwanki: Soldadokunaman chayajmanta, jinallataj runakunamanta, wakakunamanta, burrokunamanta, ovejakunamanta ima sapa phishqa pachajmanta ujta t'aqapuwanki. 29Soldadokunaman chayajmanta noqaman jaywasqa kajta sacerdote Eleazarman qonki. 30Israelitakunaman chayajmantataj kikillantataj sapa phishqa chunkamanta ujta t'aqankichej: Runakunamanta, wakakunamanta, burrokunamanta, ovejakunamanta, ima uywachá tiyan, chaykunamanta. Chaytataj Tata Dioswan Tinkukuna Toldopi imachus ruwanata ruwashanku, chay levitakunaman qonki, nispa.
31Chantá Moiseswan, Eleazarwan ima Tata Dios kamachisqanman jina, kikinta ruwarqanku. 32Israelita soldadokuna madianitakunamanta qhechusqankoqa kaykuna karqa: 675.000 ovejakuna. 3372.000 wakakuna, 3471.000 burrokuna ima karqa. 35Jinallataj 32.000 qharej mana chayasqan sipaskuna ima karqanku.
36Chaymanta soldadokunaman chayaj karqa: 337.500 ovejakuna. 37Chaymanta Tata Diospaj t'aqasqankutaj 675 ovejakuna karqanku. 3836.000 wakakunamantataj qanchis chunka iskayniyoj wakakunata Tata Diospaj t'aqarqanku. 3930.500 burrokunamantataj sojta chunka ujniyoj burrokunata Tata Diospaj t'aqarqanku. 4016.000 sipaskunamantataj kinsa chunka iskayniyojta Tata Diospaj t'aqarqanku. 41Tata Diosman jaywanapaj t'aqasqa kajmanta Moisesqa sacerdote Eleazarman qorqa, Tata Dios kamachisqanman jina.
42Chaymantataj Moisesqa soldadokuna qhechuspa apamusqankumanta khuskanninta israelitakunapaj t'aqarqa. 43Chaytaj soldadokunajta jinallataj karqa: 337.500 ovejakuna, 4436.000 wakakuna, 4530.500 burrokuna 4616.000 sipaskuna ima. 47Chaykunamanta Moisesqa sipaskunamanta, jinallataj uywakunamantapis sapa phishqa chunkamanta ujta t'aqarqa. Chaykunatataj Tata Dioswan Tinkukuna Toldopi ruwaj levitakunaman qorqa, Tata Dios payman kamachisqanman jina.
48Chaymantataj waranqa soldadokunata kamachejkuna, jinallataj pachajta kamachejkuna ima Moisesman rerqanku. 49Nerqankutaj: Noqaykoqa soldadonchejkunata sumajta yupayku, manataj ujpis wañusqachu. 50Chayrayku qorimanta imatachus tarisqaykuta apamushayku: Makiman añukunata, makiman churakunata, anillokunata, jaluchukunata, walqakunata ima. Chaytaqa Tata Diosman qoyku juchayku pampachasqa kananpaj, nispa.
51Chantá Moiseswan, Eleazarwan ima qorimanta ruwasqa tukuy ima apamusqankuta jap'erqanku. 52Waranqa soldadota kamachejkuna, jinataj pachajtakama kamachejkuna Tata Diosman jaywanankupaj apamusqanku qoreqa tukuyninpi 184 kuraj kilo pesarqa. 53Israelita soldadokuna imatachus madianitakunamanta qhechusqankurí paykunallapaj karqa. 54Ajinata Moiseswan, chantá sacerdote Eleazarwan ima waranqatakama, pachajtakama kamachejkuna apamusqanku qorita jap'erqanku. Chantá Dioswan Tinkukuna Toldoman chay qorita apaykorqanku, Tata Dios israelitakunamanta yuyarikunanpaj.
Currently Selected:
Números 31: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
