Números 27
27
Selofejadpa ususinkuna jallp'ata mañakunku
1Chayllaman Selofejadpa ususinkuna qayllaykamorqanku. Selofejadqa Jeferpata churin karqa, Jefertaj Galaadpata churin. Galaadtaj Maquirpata churin karqa Maquirtaj Manasespata churin. Selofejadqa Joséj churin Manasés ayllumanta karqa, ususinkunataj kaykuna karqanku: Malá, Nogá, Joglá, Milca, chantá Tirsa ima. 2Chay phishqantin ñañakuna Dioswan Tinkukuna Toldoman rispa, Moisesta, sacerdote Eleazarta, chantá israelitakunamanta tukuy kurajkunatawan ima nerqanku:
3Tataykoqa ch'innejpi wañorqa. Payqa, pikunachus Tata Diospa contranpi oqharikunankupaj Coreta qhaterqanku, mana chaykunawanchu karqa. Payqa kikin juchanrayku wañorqa.#27.3 Kikin juchanrayku: Selofejadpa juchan kasqa Canaán suyuman mana yaykusqan (Nm 14). Paypataqa mana uj qhari wawallanpis karqachu. 4Mana qhari wawayoj kasqanrayku, ayllunmanta tataykoj sutin chinkapunman, chaytaj mana allinchu kanman. Chayrayku noqaykuman tataykoj wawqenkunaj jallp'anku ukhupi jallp'ata qowayku ari, nispa.
5Chantá Moisesqa chay warmikunaj mañakusqankuta Tata Diosman willarqa. 6Tata Diostaj payta nerqa: 7Selofejadpa ususinkunaqa cheqanta parlanku. Qoy ari jallp'ata tatankoj wawqenkunaj jallp'anku ukhupi. Tatankoj chayaqen jallp'aqa paykunaman chayachun.#Nm 36.2; Jos 17.3-4.
8Jinallataj israelitakunata niy: Sichus mayqen, mana qhari wawata rejsispa, wañupunman chayqa, chayaqenta ususin jap'enqa. 9Sichus ususinpis mana kanmanchu chayqa, wawqenkunaman chayaqenta saqepuchun. 10Sichus wawqenpis manallataj kanmanchu chayqa, chayaqenta tatanpa wawqenkunaman saqepuchun. 11Sichus tatanpa wawqenpis manallataj kanmanchu chayqa, chayaqenta, mayqenchus manaraj karu ayllunchu kajman saqepuchun. Kay kamachisqayqa israelitakunapaj churasqa kanqa. Qanman kamachisusqayman jina ajinata ruwachunku, nispa.
Josué Moisespa cuentanmanta kamachinanpaj ajllasqa
(Dt 31.1-8)
12Tata Dios Moisesta nillarqataj: Wichariy Abarín orqoman, chaymantataj israelitakunaman qonay jallp'ata rikunki. 13Chayta rikuytawantaj, wawqeyki Aarón jina wañupunki, ñawpa tataykikunawantaj tantakoj ripunki. 14Zin ch'innejpi yakuta mañakuspa israelitakuna contrayta oqharikushajtinku, qankunaqa mana jatunchawarqankichejchu. Israelitakunaj ñawpaqenkupi qankuna kamachisqayta mana kasuwarqankichejchu, nispa. Chay yakoqa Zin ch'innejpi Meriba nisqa cheqapi kashan.#27.12-14 Chaymanta astawan yachanapaj, kay chijllayta ñawirina: Nm 20.12.
15Chantá Moisés Tata Diosta nerqa: 16Tukuyta Kamachej Tata Diosníy, tukuyman kawsayta qoj Dios, uj runata paykunallamantataj ajllaspa churay ari. 17Chantá ñawpaqenkuta rispa, paykunata pusanqa, maymanchá rishanku chayman, ama qhatirpayasqa oveja jina mana michejniyoj purinankupaj, nispa.#1 R 22.17; Ez 34.5; Mt 9.36; Mc 6.34.
18Tata Diostaj kuticherqa: Nunpa churin Josueta wajyay, imaraykuchus payqa sumaj wakichisqa runa. Chantá umanman makiykita churay. 19Jinaspataj, sacerdote Eleazarpa ñawpaqenman, jinallataj tukuy israelitakunaj ñawpaqenkuman ima pusay. Paykuna rikushajtinkutaj, Josueta cuentaykimanta kamachej kananpaj churay. 20Chantá payman kamachinanpaj atiyniykita qonki, tukuy israelitakuna qanta jina payta kasunankupaj.#Dt 34.9; Jos 1.16-18. 21Josueqa Urimnejta noqata tapunawanpaj Eleazar sacerdoteman qayllanqa. #Ex 28.30. Chantá Josué kamachejtin, tukuy israelitakuna llojsenqanku, jinallataj kutimponqanku, nispa.
22Chantá Moisés, Tata Diospa kamachisqanman jina, kikinta ruwarqa. Moisesqa Josueta sacerdote Eleazarman, jinallataj israelitakunaj ñawpaqenkuman pusarqa. 23Chaypitaj umanman makinta churaspa, cuentanmanta kamachej kananpaj churarqa, Tata Dios Moisesman nisqanman jina.
Currently Selected:
Números 27: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
