Números 13
13
Canaán suyuta qhawaj rinku
(Dt 1.19-25)
1Tata Dios Moiseswan parlaspa, nillarqataj: 2Canaán suyuta qhawamunankupaj wakinta kachay, sapa jatun ayllumanta uj kamachejta, imaraykuchus chay suyuta israelitakunaman qonay kashan, nispa.
3Chantá Moisesqa Tata Diospa kamachisqanman jina, Parán nisqa ch'inmanta qhawajkunata kacharqa. Tukuy kachasqakunaqa israelitakuna ukhupi kamachejkuna karqanku. 4Kaykuna karqanku: Rubén jatun ayllumanta Zacurpata churin Samúa, 5Simeón jatun ayllumantaqa Joríj churin Safat karqa, 6Judá jatun ayllumanta Yefunej churin Caleb, 7Isacar jatun ayllumantataj Joséj churin Igal, 8Efraín jatun ayllumantataj Nunpata churin Oseas, 9Benjamín jatun ayllumantarí Rafúj churin Palti karqa. 10Jinallataj Zabulón jatun ayllumantaqa Sodij churin Gadiel karqa, 11Joséj ayllunmantataj Susij churin Gadi, Payqa Manasés jatun ayllumanta karqa. 12Dan jatun ayllumantataj Gemalij churin Amiel karqa. 13Aser jatun ayllumantaqa Micaelpata churin Setur, 14Neftalí jatun ayllumantataj Vapsij churin Najebí, 15Gad jatun ayllumantatajrí Maquij churin Geuel karqa.
16Paykunata Moisesqa Canaán jallp'ata qhawamunankupaj kacharqa. Moisestaj Nunpa churin Oseastarí “Josué”, nispa suticharqa.
17Moisés paykunata Canaán suyuta qhawamunankupaj kachashaspa, nerqa: Kaymanta Neguevman rispa, orqokunanejta rinkichej. 18Chantá sumajta qhawankichej imaynachus chay jallp'a kasqanta. Qhawallankichejtaj chaypi tiyakoj runakuna kallpararachus chayrí manachus kanku, chaytawan. Jinallataj ashkhachus chayrí pisillachus kanku, chaytapis qhawallankichejtaj. 19Chantá llajtanku perqawan muyurisqachus, manachus chaytapis qhawallankichejtaj. Jallp'apis sumajchus manachus, chayta qhawallankichejtaj. 20Qhawallankichejtaj sumajta poqoj jallp'achus manachus kasqanta, sach'ayojchus manachus kasqantawan. Ama manchachikuychejchu, chay jallp'api imachus poqon, chaymantapis uj chhikata apamuychej, nispa. Chay karqa mishkha uva poqoykushajtin, chaypacha.
21Jinataj chunka iskayniyoj qhawaj rejkunaqa jallp'ata qhawarqanku, Zin nisqa ch'innejmanta qallarispa, Jamat llajtaman yaykunamanta Rejob llajtakama. 22Chaymanta Neguevnejta rispa, Hebronkama chayarqanku. Chaypi Ajimán, Sesay, Talmay ima tiyakorqanku. Paykunaqa Anacpa mirayninmanta karqanku. Hebrón llajtaqa Egiptopi Soán llajtamanta qanchis wata ñawpajta sayarichisqa kasqa. 23Jinallataj Hebronmanta rispa, Escol vallekama chayarqanku, chaypitaj uva sach'aj uj yuranta chhullchuyojta k'utorqanku. Chaytataj k'aspiman warkhuykuspa, iskay ukhu wantuspa aparqanku. Jinallataj granadata, higotawan pallaspa, apallarqankutaj. 24Israelitakunaqa chay valleta “Escol”, nispa suticharqanku, chaynejmanta uj uva chhullchuta k'utusqankurayku.
25Chantá jallp'ata tawa chunka p'unchaypi qhawayta tukuytawan, kachakunaqa 26Parán nisqa ch'innejpi Cadesman kutimporqanku. Chaypi Moisés, Aarón, chantá tukuy israelitakuna ima suyasharqanku. Chantá kachasqakunaqa imatachus rikusqankuta paykunaman willarqanku. Chay jallp'amanta apasqanku poqoytapis rikuchillarqankutaj. 27Chaymantataj Moisesta nerqanku: Noqaykoqa maymanchus kachawasqayku jallp'aman chayarqayku. Chay jallp'apeqa cheqapuni lechewan, abeja misk'iwan ima yaku jina purishan. Rikuychej, má. Kay jinata chay jallp'api poqoj kasqa.
28Chaywanpis chaypi tiyakoj runakunaqa manchay kallpayoj kasqanku. Llajtankukunapis jatuchachaj, sumaj perqawan muyurichisqa kasqa. Chay jawa jatunkaray runa Anacpata churinkunatapis rikullarqaykutaj. 29Néguev cheqanejpi amalecitakuna tiyashanku. Orqonejpitaj jititakuna, jebuseokuna, amorreokuna ima tiyakushanku. Mama qocha chaynejpi, Jordán mayu kantupitaj, cananeokuna tiyakushanku, nispa.
30Chantá israelitakuna thutuyta qallarerqanku, Calebtaj Moisespa ñawpaqenpi kashaj runata ch'inyachispa, nerqa: Rispa, chay jallp'ata jap'imunachej. Noqanchejqa paykunata atipasunchej, nispa.
31Calebwan khuska rejkunatajrí kuticherqanku: Mana. Mana chay runakunawan maqanakuyta atisunmanchu. Paykunaqa noqanchejmanta nisqaqa aswan kallpayoj kanku, nispa. 32Wakinkunataj jallp'ata qhawamusqankumanta mana maychus kajtachu israelitakunaman willarqanku: Qhawamorqayku chay jallp'aqa runa mikhu jallp'a kasqa.#13.32 Runa mikhu jallp'a: Ajinata nispa, niyta munarqanku Canaán cheqapi jallp'aqa t'ajra jallp'a, mana tiyakunapaj jinachu kasqanta. Chaypi tiyakojkunataj manchay jatuchaj runakuna kasqanku. 33Chaypi jatunkaray runakunata rikullarqaykutaj, paykunaqa Anacpata churinkuna kasqanku. Noqayku paykunaj qayllankupi phinki phinki jina juch'uysitu karqayku. Paykunapis jinallatataj noqaykuta qhawawarqayku, nispa.
Currently Selected:
Números 13: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
