Números 12
12
Mariawan, Aaronwan Moisespaj rimanku
1Uj kuti Mariawan, Aaronwan ima Moisespa contranta rimarqanku, Etiopía llajtayoj warmiwan casarakusqanrayku. 2Chantá nillarqankutaj: Tata Diosqa mana payllawanchu parlan. Noqaykuwanpis parlallantaj, nispa. Tata Diostaj chayta uyarerqa. 3Moisesqa tukuy kay pachapi runakunamanta nisqaqa aswan llamp'u sonqoyoj karqa.
4Chayrayku Tata Diosqa Moisesta, Mariata, Aaronta ima nerqa: Dioswan Tinkukuna Toldoman kinsantiykichej riychej, nispa. Chantá kinsantinku rerqanku. 5Chaymantataj Tata Diosqa phuyupi urayk'amuspa, Dioswan Tinkukuna Toldo punkupi sayarqa. Chantá Mariata, Aarontawan ima wajyarqa. Paykuna qayllaykojtinkutaj,
6Tata Dios nerqa: Kay nisqayta allinta uyariwaychej: Qankuna ukhupi noqamanta sut'inchaj kajtenqa, noqa payman mosqoypi jina rikhurisaj, mosqoynejta ima parlasaj. 7Kamachiy Moiseswanrí, mana jinatachu parlani, imajtinchus payqa tukuy kamachiykunamanta nisqaqa aswan kasukojmin. 8Paywanqa uyapura sut'ita parlani,#Ex 33.11; Dt 34.10. mana pakaypi jinachu. Paytaj rijch'ayniyta rikun. Jina chayqa, imaraykutaj paypa contranta rimayta, mana manchachikorqankichejchuri? nispa.
9Chaymanta Tata Diosqa Aaronpaj, chantá Mariapaj ima maytapuni phiñakuspa, riporqa. 10Chantá phuyu Dioswan Tinkukuna Toldomanta oqharikojtinkama, Mariaqa yurajpacha llejti onqoyniyoj rikhurerqa. Aarón Mariata qhawarispataj, llejti onqoyniyoj kashasqanta rikorqa. 11Chantá Moisesta nerqa: Ay, wiraqochíy, ama juchallisqaykurayku ñak'arichiwaykuchu ari. Noqaykoqa mana yuyayniyoj jina rimaspa juchalliyku. 12María ama kachunchu mamanpa wijsanpi wawa wañuspa, asnashaj paqarin jinaqa, nispa.
13Chantá Moisesqa Tata Diosmanta mañaporqa: Tata Diosníy, mañarikuyki Mariata thañichipunaykita, nispa.
14Tata Diostajrí Moisesta nerqa: Sichus Mariaj tatan uyanman thoqaykunman karqa chayqa, p'enqakuymanta qanchis p'unchayta pakakunman karqa.#12.14 Uyaman thoqay: Pimanpis uyanpi thoqaykuna niyta munarqa payta maldicisqanta. Chayrayku jatun p'enqay karqa. (Dt 25.9). Nm 5.2-3; Lv 13.1-8,24-28. Chayrayku Mariata jaramanta jawaman qanchis p'unchayta wijch'uychej. Chaymantataj jaraman kutiykamonqa, nispa.
15Ajinata Mariaqa qanchis p'unchayta jaramanta jawaman wijch'usqa karqa. Israelitakunataj María kutiykamunankama mana maymanpis purirerqankuchu. 16María paykunaman kutiykamojtintaj, israelitakuna Jaserotmanta puririspa, Parán nisqa ch'innejpi jarakorqanku.#Nm 10.12.
Currently Selected:
Números 12: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
