Números 1
1
Israelitakunata Sinaipi yupanku
1Israelitakuna Egiptomanta llojsimusqanku uj wata kurajña kashajtin, iskay kaj killa qallariyta Sinaí ch'innejpi kasharqanku. Chantá Dioswan Tinkukuna Toldopi Moisés kashajtin, Tata Dios kay jinata nerqa: 2Israelitakunata ayllunkuman jina, jinataj wasi ayllunkuman jina tukuy qharej sutinkuta listaspa yupaychej, mashkhachus kasqankuta yachanapaj. 3Iskay chunka watayojmanta pataman israelitakunata yupankichej. Qanwan, chantá Aaronwan ima maqanakoj rinankupaj jina kajkunaj sutinkuta listankichej. 4Yupanaykichejpajqa sapa ayllumanta uj kuraka yanapasonqachej. Chay kurakaqa uj wasi aylluta kamachej kanan tiyan.
5Yanapajkunaj sutinkoqa kaykuna kanku: Rubén jatun ayllumanta Sedeurpa churin Elisur. 6Simeón jatun ayllumantataj Surisadaypa churin Selumiel karqa.
7Judá jatun ayllumantaqa Aminadabpa churin Nasón karqa.
8Isacar jatun ayllumantataj Suarpa churin Natanael karqa.
9Zabulón jatun ayllumantarí Helonpa churin Eliab karqa.
10Joséj churinkunaj jatun ayllunkumantarí kaykuna karqanku: Efraín jatun ayllumanta Amiudpa churin Elisama, Manasés jatun ayllumantataj Pedasurpa churin Gamaliel.
11Benjamín jatun ayllumantaqa Gedeonij churin Abidán karqa.
12Dan jatun ayllumantataj Amisadaypa churin Ajiezer karqa.
13Aser jatun ayllumantaqa Ocranpa churin Pagiel karqa.
14Gad jatun ayllumantarí Deuelpa churin Eliasaf karqa.
15Neftalí jatun ayllumantataj Enanpa churin Ajirá karqa.
16Chaykuna israelitakuna ukhumanta ajllasqa karqanku. Paykunaqa ñawpa tatankoj ayllunpi kurajkuna karqanku, jinallataj Israelpa jatun ayllunkunata kamachejkuna.
17Chaymanta Moiseswan, Aaronwan ima, pikunachus jatun ayllunkumanta ajllasqa karqanku, chaykunawan tantakorqanku. 18Chantá iskay kaj killa qallariyta tukuy israelitakunata wajyacherqanku. Chaypitaj wasi aylluman jina, chantá jatun aylluman jina, iskay chunka watayojmanta pataman sapa ujpa sutinkuta listarqanku. 19Ajinata Moisesqa Tata Dios kamachisqanman jina Sinaí ch'innejpi israelitakunata yuparqa.
20Chantá Rubenpa jatun aylluman jina, wasi aylluman jina, tatankoj sutinkuman jinataj yupasqaña kasqankumanta, iskay chunka watayojmanta pataman tukuy qharej sutinkuta listarqanku. Yupasqa kasqankuman jinaqa ajina karqa:
21Israelpa kuraj kaj churin Rubén jatun ayllumanta kajkuna, pikunachus maqanakoj rinankupaj jina qharikunamanta, 46.500 qharikuna karqanku.
22-23Simeón jatun ayllumanta yupasqa kajkunaqa 59.300 qharikuna karqanku.
24-25Gad jatun ayllumanta yupasqa kajkunataj 45.650 qharikuna karqanku.
26-27Judá jatun ayllumanta yupasqa kajkunatajrí 74.600 qharikuna karqanku.
28-29Isacar jatun ayllumanta yupasqa kajkunaqa 54.400 qharikuna karqanku.
30-31Zabulón jatun ayllumanta yupasqa kajkunarí 57.400 qharikuna karqanku.
32-35Joséj churinkunamantaqa Efraín jatun ayllumanta 40.500 qharikuna yupasqa karqanku. Manasés jatun ayllumantataj 32.200 qharikuna yupasqa karqanku.
36-37Benjamín jatun ayllumanta yupasqa kajkunaqa 35.400 qharikuna karqanku.
38-39Dan jatun ayllumanta yupasqa kajkunaqa 62.700 qharikuna karqanku.
40-41Aser jatun ayllumanta yupasqa kajkunataj 41.500 qharikuna karqanku.
42-43Neftalí jatun ayllumanta yupasqa kajkunataj 53.400 qharikuna karqanku.
44Ajinata Moiseswan, Aaronwan, chantá chunka iskayniyoj jatun ayllumanta yanapajkunapiwan ima israelitakunata yuparqanku. 45Israelitakunamanta maqanakoj rinankupaj jinaña kajkunata iskay chunka watayojmanta pataman yuparqanku. 46Yupasqa kajkunaqa tukuyninpi 603.550 qharikuna karqanku.
Levitakuna imatachus ruwananku
47Leví jatun ayllumanta kajkunaqa mana wakin ayllukunawan khuska yupasqachu karqanku, 48imaraykuchus Tata Diosqa Moiseswan parlaspa, nerqa: 49Tukuy israelitakunata yupashaspaqa, Leví jatun ayllumanta kajkunata ama yupankichu. 50Tukuynin levitakunata churanki Dioswan Tinkukuna Toldota, chantá chaypi tukuy ima kajta qhawanankupaj. Paykunaqa Dioswan Tinkukuna toldota, chantá chaypi tukuy ima kajtawan mayman rispapis apanqanku. Dioswan Tinkukuna Toldopi imachus ruwanatapis paykuna ruwanqanku. Jinallataj paykunaqa toldoj muyuyninpi muyurisqata jarakonqanku. 51Dioswan Tinkukuna Toldota mayman apana kajtenqa, paykuna toldota phaskanqanku. Maymanchus chayaspataj, paykunallataj toldota sayarichenqanku. Sichus pillapis mana levita kaspalla chay toldoman qayllaykunman chayqa, wañuchisqa kanqa.#1.50-51 Diospa kamachisqanman jina, Dioswan Tinkukuna Toldota, chantá Diosta yupaychaspa imachus ruwanata levitakunalla ruwayta aterqanku.
52Israelitakunaqa soldadokuna jina sapa jatun ayllu t'aqa t'aqa jarakonqanku. Sapa t'aqaqa wiphalanta sayaykuchispa, jarakonqa. 53Levitakunaqa Dioswan Tinkukuna Toldoj muyuyninpi jarakonqanku, toldota qhawanankupaj, ama Tata Dios israelitakunaj contranta phiñakunanpaj, nispa.
54Ajinata israelitakunaqa Tata Dios imaynatachus Moisesman kamachisqanman jina kikinta ruwarqanku.
Currently Selected:
Números 1: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
