Levítico 22
22
Diospaj t'aqasqa jaywana
1Tata Dios Moiseswan parlaspa, nillarqataj: 2Aaronta, miraynintawan ima niy israelitakuna imatachus apamuwanku chay t'aqasqa imakunata may respetowan qhawanankuta, llimphu sutiyta ama p'enqaypi rikhurichinankupaj. Noqamin Tata Dios kani.
3Nillaytaj: Kunanmanta qhepamanqa Aaronpa mirayninmanta sichus mayqellanpis mana llimphupaj qhawasqa kashaspa, israelitakuna noqapaj t'aqaspa apamuwasqankuman qayllanman chayqa, payqa ñawpaqeymanta chinkachisqa kanqa. Noqamin Tata Dios kani.
4Sichus Aaronpa mirayninmanta mayqen qharillapis llejtiwan onqosqa kashaspa, chayrí phichilunmanta q'eya surumunman chayqa, llimphupaj qhawasqa kananpaj llimphuchakunankama Diospaj t'aqasqa mikhunamanta mana mikhuyta atenqachu.
Pichus ayarayku ch'ichipaj qhawasqa imakunata llankhaj, chayrí pichus mujun llojsirparejta llankhaj, 5chayrí qhatatakuspa purej animalta llankhaj, chayrí mana llimphupaj qhawasqa runata llankhaj imaqa, 6ch'isiyaykuykama mana llimphupaj qhawasqa kanqa. Chayraykutaj Diospaj t'aqasqa kajmanta mana mikhuyta atenqachu, manaraj ukhunta yakuwan mayllakuspaqa. 7Chantá inti chinkaykojtinkama, llimphu kanqa. Chaymantaraj Diospaj t'aqasqa kajmanta mikhuyta atenqa, imajtinchus chayqa paypa mikhunanmin. 8Payllamanta wañusqa uywaj aychanta, chayrí k'ita animalpa jap'isqan aychataqa mana mikhunanchu tiyan, ama chaywan ch'ichichasqa rikhurinanpaj. Noqamin Tata Dios kani.
9Niy paykuna kamachisqayta junt'anankuta, ama chaykunarayku juchallinankupaj, nitaj kamachisqayta pisipaj qhawasqankurayku wañunankupaj. Noqamin Tata Dios kani, pichus paykunata noqapaj t'aqakorqani, chay.
10Mana sacerdotej ayllunmantachu kajqa Diospaj t'aqasqamanta mana mikhuyta atenqachu. Jinallataj sacerdotej wasinman wajyarikusqa runa, chantá sacerdotej peonninpis Tata Diospaj t'aqasqamanta manallataj mikhuyta atenqankuchu.
11Sichus sacerdote uj wata runata rantikunman chayqa, chay runa Tata Diosman jaywasqamanta mikhuyta atenqa. Jinallataj wasinpi paqarej wata runapis Diospaj t'aqasqamanta mikhuyta atillanqataj.
12Sichus uj sacerdotej ususin mana sacerdote ayllumanta kaj qhariwan casaranman chayqa, sacerdotekunaman qosqa mikhunamanta mana mikhuyta atenqachu. 13Jinapis sichus warmisapa rikhurispa, chayrí qosanmanta t'aqakuspa, manataj wawayoj kaspa tatanpa wasinman kutipunman chayqa, tatanpa mikhunanmanta mikhuyta atenqa. Ajina kanqa manaraj qosayoj kashaspa karqa jina. Chaywanpis waj runaqa sacerdotej mikhunanmanta manapuni mikhuyta atenqachu.
14Sichus pillapis mana reparaspa, Tata Diospaj t'aqasqamanta mikhuykunman chayqa, sacerdoteman kutichinan tiyan. Mashkhatachus mikhusqanmanta phishqaman t'aqaspa, ujnintawan yapanan tiyan. 15Sacerdotekunaqa israelitakuna Tata Diosman jaywanapaj apamusqankuta ama pisipaj qhawachunkuchu, imajtinchus chaykunaqa Diospaj t'aqasqamin. 16Pichus Diospaj t'aqasqata pisipaj qhawaspa mikhojqa juchachasqa kanqa. Noqamin Tata Dios kani, pichus qankunata noqapaj t'aqakorqaykichej, chay, nispa.
Imayna uywatachus Diosman jaywana
17Tata Dios Moiseswan parlaspa, nillarqataj: 18Aaronta, churinkunata chantá israelitakunatawan ima ajinata niy: Israelitakunamanta pillapis, chayrí qankunawan tiyakoj waj llajtayojpis Diosman nisqanta junt'ananpaj, chayrí sonqomanta munaspa Tata Diosman jaywananpaj uj uywata apamunman chayqa, 19noqa jap'ikunaypaj jina uj orqota, mana iman imanasqata apamunan tiyan.#22.19 Mana iman imanasqata: Diosman jaywanapaj apamusqanku uywaqa mana iman imanasqa kanan karqa, imaraykuchus Diosqa mana ni imayna pantayniyoj, llimphu llimphumin. Lv 21.1. Corderopis, toropis, chayrí chivopis kachun, ajinata apamunan tiyan. 20Ama iman imanasqa uywata jaywanawaykichejpaj apamuwankichejchu, imaraykuchus mana jap'ikusajchu.#Lv 1.3; Mal 1.8.
21Sichus pipis k'achata kawsakuy jaywanata Tata Diosman jaywayta munanman, nisqanta junt'ananpaj, chayrí sonqomanta jaywayta munaspa chayqa, torota, ovejata, chayrí cabratapis mana iman imanasqata apamunan tiyan. Ajinata Tata Dios jap'ikunanpaj jina ruwanan tiyan. 22Tata Diosman jaywanapaj amapuni onqosqa uywata apamunkichejchu: Ñawsata, chakin p'akisqata, iman nanasqata, sirk'iyojta, phusulluyojta, nitaj tijllayojtapis. Ajina uywataqa ama altarpi q'olachispa Tata Diosman jaywankichejchu. 23Sichus sonqomanta munaspa torota, chayrí corderota Diosman jaywayta munanman chayqa, jatun chakiyojpis kachun, juch'uy chakiyojpis kachun, jaywayta atillankichej. Sitajchus pipis nisqanta junt'ananpaj Diosman jaywayta munanman chayqa, ajina uywa jaywasqanta mana jap'ikusajchu. 24Nillataj Tata Diosman jaywankichejchu runtun nanasqata, kapasqata, takasqata, chayrí khuchusqa uywata. Llajtaykichejpiña kashaspa, ama chay jina uywata jaywawankichejchu. 25Ajina uywata Diosniykichejman jaywanaykichejpajqa nillataj waj llajtayojkunamanta jap'inkichejchu. Chaykunaqa iman imanasqa uywakuna kanku, chayrayku Diosqa mana jap'ikusonqachejchu, nispa.
Tata Diosman jaywasqa uywata ñak'anapaj kamachisqakuna
26Tata Diosqa Moiseswan parlaspa, nillarqataj: 27Waka uña, oveja uña, chayrí chivitupis qanchis p'unchayta mamanwan qhepakonqa. Pusaj p'unchayninman kaymantaj chay uywata q'olachispa noqa Tata Diosman jaywawankichej.
28Ama uj p'unchayllaqa wakata, chayrí ovejata uñantawan khuska ñak'ankichejchu.#22.28 Dios mana munarqachu israelitakuna uywata mamantawan uñantawan khuska ñak'anankuta. Canaanpi tiyakojkuna, imata creespa jina uywata mamantawan uñantawan khuskata ñak'ayta yachasqanku. Dt 22.9-11. 29Sichus Tata Diosta pachis nispa jaywanaykichejpaj apamunkichej chayqa, jap'ikusunanpaj jina allinta ruwanaykichej tiyan. 30Chantá uywaj aychantaqa chay kikin p'unchaypacha mikhunkichej, q'ayantinpajqa ama puchuchinkichejchu. Noqamin Tata Dios kani.
31Tukuy kamachisqayta kasuychej, junt'aychejtaj. Noqamin Tata Dios kani.
32Ama llimphu sutiyta p'enqaypi qhawachinkichejchu, israelitakuna ukhupi manchay respetowan qhawasqa kananpaj. Noqamin Tata Diosqa kani, pichus qankunata noqapaj t'aqakorqaykichej, chay. 33Diosniykichej kanaypaj, noqa Egipto suyumanta orqhomorqaykichej. Noqamin Tata Diosqa kani, nispa.
Currently Selected:
Levítico 22: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
