Levítico 23
23
Diosmanta yuyarikunapaj raymikuna
(Nm 28.16-25)
1Tata Dios Moiseswan parlaspa, nillarqataj: 2Israelitakunata ajinata ninki: Kaykunamin Tata Diospa sutinpi ruwana raymikuna kanku. Chaypacha qankunaqa Tata Diosta yupaychanaykichejpaj tantakunkichej.
3Sojta p'unchayta llank'ankichej, qanchis kaj p'unchaytataj ruwanaykichejmanta ama ni imata ruwankichejchu.#Ex 20.8-10; 23.12; 31.15; Dt 5.12-14. Chay p'unchayqa qankunapaj jatun p'unchay kanqa, Diospa sutinpi tantakunaykichejpaj. Maypichari tiyakunkichej, chaypipis chay p'unchayqa samarikunaykichejpaj kanqa, Tata Diospaj t'aqasqa p'unchay kasqanrayku.
4Diosta yupaychanapaj sutinpi raymikunata ruwanaykichejpaj maychus kananpi tantakunkichej. Diosmanta yuyarikunapaj, Tata Diospa churasqan raymikuna kaykuna kanku:
5Wata qallariy killapi, chunka tawayoj p'unchay ch'isiyaykushajtin, Tata Diospa sutinpi Pascua raymita ruwankichej.#Ex 12.1,6; Dt 16.1.
6Chay kikin killallapitaj chunka phishqayoj p'unchayta Tata Diospa sutinpi Mana Levadurayoj T'anta mikhuna raymita ruwallankichejtaj.#Ex 12.14-20; 23.15; 34.18; Dt 16.3-8. Qanchis p'unchayta mana levadurayoj t'antata mikhunkichej. 7Ñawpaj kaj p'unchaypi Tata Diosta yupaychanaykichejpaj tantakunkichej, amataj chay p'unchay ni ima ruwanata ruwankichejchu. 8Qanchis p'unchayta q'olachispa jaywanata Tata Diosman jaywankichej, qanchis kaj p'unchaypitaj Tata Diosta yupaychanaykichejpaj watej tantakunkichej. Chay p'unchayqa ruwanaykichejmanta ama ni imata ruwankichejchu, nispa.
Chajra Oqharina Qallariy raymi
(Nm 28.26-31)
9Tata Dios Moiseswan parlaspa, nillarqataj: 10Israelitakunata kay jinata niy: Maypachachus noqaj qosqay, chay jallp'aman yaykunkichej chayqa, chajrata oqharisqaykichejmanta ñawpaj kaj marq'ata, sacerdoteman apamunkichej. 11Samarina p'unchaypa q'ayantin, sacerdoteqa marq'a apasqaykichejta ikhaspa, Tata Diosman rikuchenqa, jaywasqaykichejta jap'ikunanpaj. 12Marq'a apamusqaykichejta ikhaspa, Diosman jaywankichej. Chay p'unchayllataj uj watayoj mana ima imanasqa corderota Diosman jaywankichej, q'olachispa Tata Diosman jaywanapaj. 13Chantá sumaj kaj jak'uta tawa kilo khuskanniyojta aceitewan puñasqata apamullankichejtaj, Tata Diosman q'olachispa jaywanapaj. Chay q'olachisqaj q'apaynenqa Tata Diospaj ima munay kanqa. Chantapis uj litro vinota apamullankichejtaj, jich'aspa Diosman jaywanapaj. 14Poqochisqaykichejmanta Tata Diosman jaywanaykichejpaj apamunaykichejkamaqa, t'antata, trigo jank'ata, nitaj q'elluyashaj trigotapis amaraj mikhunkichejchu. Kay kamachisqaqa mirayniykichejpaj wiñaypaj kanqa, maypichus tiyakunkichej, chaypi.
15Mayk'ajchus trigo marq'ata ikhaspa, Diosman jaywanapaj apamunkichej chaymantapacha, samarina p'unchaymanta q'ayantin qanchis semanata yupankichej. 16Samarina p'unchaypa q'ayantinmanta phishqa chunka p'unchayta yupankichej.#23.16 Phishqa chunka p'unchay raymi: Kay raymi iskay sutiyoj karqa. Ujnin sutin Chajra Oqharina raymi karqa. Ex 23.16. Ujnin sutintaj Semana raymi karqa. Ex 34.22. Kay raymi Diosta pachis ninapaj karqa. Chay raymita israelitakuna trigo oqhariy tukukuyta ruwananku karqa. Aswan qhepanejman kay raymi Pentecostés sutiwan rejsisqa karqa. Chaypacha Tata Diosman mosoj trigota jaywankichej. 17Jinallataj wasiykichejmanta sumaj jak'umanta levadurayoj ruwasqa iskay t'antata apamullankichejtaj. Sapa t'anta tawa kilo jak'umanta ruwasqa kanqa. Chay kanqa ñawpaj kaj poqoymanta Tata Diosman ikhaspa jaywana. 18T'antatawan khuska uj watayoj qanchis corderokunata mana imanku imanasqata, uj torillota, iskay carnerokunatawan apamullankichejtaj, q'olachispa Tata Diosman jaywanapaj. Chay q'olachispa jaywasqaj q'apaynenqa ima munayta Tata Diospa sonqonman chayanqa. Chaykunatawan khuska, ch'aki mikhuy jaywanata, chantá vinotawan ima jaywallankichejtaj.
19Jucha pampachasqa kananpaj q'olachispa Diosman jaywanapaj, uj chivota jaywankichej. K'achata kawsakuy jaywanata jaywanapajtaj uj watayoj iskay corderota jaywallankichejtaj. 20Sacerdoteqa chaykunata Tata Diosman ikhaspa jaywanqa, ñawpaj kaj poqoykunamanta ruwasqa t'antata, iskay corderotawan khuska. Chaykuna Tata Diospaj t'aqasqa kasqanrayku, sacerdotekunapaj kanqa.
21Chay kikin p'unchayllataj qankunapis Tata Diosta yupaychanaykichejpaj tantakunkichej, amataj ni ima ruwanata ruwankichejchu. Kay kamachisqaqa tukuy mirayniykichejpaj wiñaypaj kanqa, maypichus tiyakunkichej, chaypi.
22Maypachachus chajra oqharina chayamojtin, ama tukuynintachu ruthunkichej, nitaj t'akakoj umatapis chajmankichejchu. Chaytaqa wajchakuna, waj llajtayojkuna ima chajmakunankupaj saqenkichej. Noqa Tata Diosmin Diosniykichej kani, nispa.
Pututu Waqachina raymi
(Nm 29.1-6)
23Tata Dios Moiseswan parlaspa, nillarqataj: 24Israelitakunata kay jinata niy: Qanchis kaj killa#23.24 Qanchis kaj killa: Israelitakunaj pacha watanankuman jina qanchis kaj killaqa wata qallariy killa karqa. Aswan qhepanejman wata qallariy killaqa chajra poqoy tiempopi karqa, septiembre, octubre killa chayta. Jinallataj aswan qhepanejman Putututa Waqachina raymi, Rosh ha-Shaná sutiwan rejsisqa karqa. Chaymantataj Wata Qallariy raymi sutiwan rejsisqa kallarqataj. qallariy p'unchayqa#23.24 Killa Qallariy raymi: Killa qallariyta israelitakunaqa sumaj raymita ruwaspa, Diosman uywa ñak'asqata jaywaspa, chantá putututa waqarichispa, raymita ruwayta yachasqanku. Sal 81.3,4. qankunapaj samarina p'unchay kanqa. Chay p'unchayqa pututukunata waqarichispa, yuyarikuna raymita sutiypi ruwankichej. 25Chay p'unchayqa q'olachispa Tata Diosman jaywankichej, amataj ni ima ruwanata ruwankichejchu, nispa.
Jucha Pampachana p'unchay
(Nm 29.7-11)
26Tata Dios Moiseswan parlaspa, nillarqataj: 27Jinallataj qanchis kaj killapi chunka kaj p'unchaypi Jucha Pampachana p'unchay kanqa. Chaypacha Tata Diospa sutinpi tantakuspa, ayunankichej, chantá uywakunata q'olachispa Tata Diosman ñak'asqa uywakunata jaywankichej. 28Chay p'unchayqa imachus ruwanaykichejmanta amapuni ni imata ruwankichejchu, imaraykuchus chay p'unchayqa Jucha Pampachana p'unchaymin. Chay p'unchayqa noqa Tata Dios juchaykichejta pampachasaj. 29Pichus chay p'unchaypi mana ayunajqa, pipis kachun, llajtanmanta chinkachisqa kanqa. 30Jinallataj pichus chay p'unchaypi ima ruwanatapis ruwajqa, pipis kachun, llajtanmanta chinkachisqallataj kanqa.
31Chayrayku chay p'unchayqa ruwanaykichejmanta amapuni imatapis ruwankichejchu. Kay kamachisqaqa tukuy mirayniykichejpaj wiñaypaj kanqa, maypichus tiyakunkichej, chaypi. 32Chay p'unchayqa qankunapaj samarina p'unchay kanqa. Jisq'on kaj p'unchay ch'isiyaymanta q'ayantin ch'isiyanankama samarinkichej, chantá ayunankichej ima, nispa.
Ch'ujlla Ruwana raymi
(Nm 29.12-40)
33Tata Dios Moiseswan parlaspa, nillarqataj: 34Israelitakunata kay jinata niy: Kikin qanchis kaj killallapitaj chunka phishqayoj p'unchaypi noqaj sutiypi qanchis p'unchayta Ch'ujlla Ruwana raymita ruwankichej. 35Raymi qallariy p'unchayta Tata Diospa sutinpi tantakunkichej, amataj chay p'unchay ima ruwanatapis ruwankichejchu. 36Qanchis p'unchay junt'ata q'olachispa Tata Diosman jaywankichej. Pusaj kaj p'unchaypitaj, watej Tata Diospa sutinpi tantakuspa, uywata q'olachispa payman jaywankichej. Chay p'unchay raymichakuna p'unchay kasqanrayku, ama ima ruwanatapis ruwankichejchu.
37Chaykuna Tata Diospaj t'aqasqa p'unchaykuna kanku. Chay p'unchay qankuna Tata Diosta yupaychanapaj tantakuspa, Tata Diosman jaywankichej ch'aki mikhuy jaywanata q'olachispa, q'olachisqa jaywanata, waj jaywanakunata, chantá vinotawan ima. Chaykunata jaywana mit'a chayamusqanman jina jaywankichej. 38Chay jawa Tata Diospa samarina p'unchayninpi jaywanata, qorisqa jaywanata, nisqaykichejta junt'aspa jaywanata, sonqomanta munaspa jaywanatapis jaywallankichejtaj.
39Qanchis kaj killamanta chunka phishqayoj p'unchayta chajra oqhariyta tukuspaña, uj semanata Tata Diospa sutinpi raymita ruwankichej. Ñawpaj kaj p'unchayta samarinkichej, jinallataj pusaj kaj p'unchaytapis. 40Ñawpaj kaj p'unchayta sumajta poqoj sach'aj poqoyninta pallankichej. Jinallataj palmaj laqhenta, sumaj thansayoj sach'aj thansanta, chantá mayu patapi saucekunaj thansanta ima k'utunkichej. Chantá qanchis p'unchayta Tata Diospa ñawpaqenpi kusikunkichej. 41Ajinata sapa wata qanchis p'unchayta Tata Diospa sutinpi raymita ruwankichej. Kay kamachisqaqa mirayniykichejpaj wiñaypaj kanqa. Kay raymitaqa qanchis kaj killapi ruwankichej. 42Tukuy Israel llajtayojkuna ch'ujlla urapi uj semanata tiyakunkichej, 43tukuy wawaykichejkuna yachanankupaj noqa israelitakunata Egiptomanta orqhomushaspa, ch'ujllapi tiyachisqayta. Noqamin Tata Diosniykichej kani, nispa. 44Ajinata Moisesqa Tata Diosta yupaychanapaj jatun raymikunata ruwanamanta israelitakunaman willarqa.
Currently Selected:
Levítico 23: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
