Levítico 21
21
Sacerdotekuna imaynachus kananku
1Tata Dios Moiseswan parlaspa, nillarqataj: Aaronpa mirayninmanta sacerdotekunata niy: Ama pipis ayata llankharisqaykichejrayku mana llimphupaj qhawasqa kankichejchu.#21.1 Ama mana llimphupaj qhawasqa kankichejchu: Israelitakunaj Diosninkoqa llimphu llimphumin. Lv 19.2 Chayrayku pikunachus Diospata kajkunaqa Diospaj t'aqasqa jina llimphullataj kananku tiyan. Diospaj t'aqasqa kanaqa niyta munan tukuy imachus ch'ichi kajmanta karunchakunata. Sacerdotekunaqa tukuy ch'ichi kajmanta t'aqakunanku karqa, Dioswan Tinkukuna Toldopi imachus ruwanata ruwanankupaj t'aqasqa kasqankurayku. 2Qaylla aylluykichejpa ayanta, mamaykichejpata, tataykichejpata, qhari wawaykichejpata chayrí warmi wawaykichejpata, chayrí wawqeykichejpata, 3chayrí qanwan tiyakoj manaraj qosayoj panaykichejpata ayanta#21.3 Panan mana qosayoj: Israelitakuna ukhupi sichus uj warmi qosachakoj chayqa, qosanpa ayllunman yaykupusqanta qhawaj kasqanku. Chayrayku qosayoj warmeqa manaña tatanpa ayllunwan yupasqachu kasqa. llankhaspa, mana llimphupaj qhawasqa kayta atillankichej. 4Sichus panayki casarakorqa chayqa, ama ayanta llankhaspa ch'ichichakunkichu.
5Jinallataj sacerdotekunaqa ama chujchankuta, nitaj sunkhankutapis raphakonqankuchu, nillataj ukhunkutapis q'allurakonqankuchu. 6Paykunaqa noqajllataña kanankupaj t'aqasqa kasqankurayku sutiyta ama p'enqaypi rikhurichenqankuchu. Paykunaqa noqa Tata Diosman q'olachisqa jaywanata jaywawanku, jinallataj Diospaj t'aqasqa t'antantawan. Chayrayku Diospaj t'aqasqa jina kachunku.
7Jinallataj sacerdotekunaqa ama phisu warmiwan, nitaj alqochasqa warmiwan, nillataj qosanmanta t'aqasqa warmiwanpis casarachunkuchu, imaraykuchus sacerdotekunaqa Tata Diospaj t'aqasqa kanku. 8Chayrayku paykunata Tata Diospaj t'aqasqata jina qhawankichej, imaraykuchus paykunaqa Tata Diosniykichejman t'antanta jaywanku. Chayrayku sacerdotekunata Diospaj t'aqasqa kasqankuta jina qhawaychej, imajtinchus noqaqa may llimphumin kani, pichus qankunata noqajta kanaykichejpaj t'aqakuykichej, chay.
9Sichus uj sacerdotej ususin sajra purikuyman qokunman chayqa, tatanta p'enqaypi rikhurichin. Chayrayku chay warmi kawsashaj ruphachisqa kanqa.
10Kuraj kaj sacerdote kananpaj aceitewan umanpi jawisqa kasqanrayku, sacerdote p'achata churakunanpaj t'aqasqa kashan. Ajinaqa llakisqa kasqanta rejsichinanpaj, ama umanta t'ojluchikonqachu, nitaj p'achantapis llik'irakonqachu. 11Nillataj maypichus aya kashan, chayman yaykonqachu. Nitaj tatanpata, mamanpata ayanta llankharispa ch'ichichakonqachu. 12Diosta yupaychana cheqamanta mana llojsenqachu, nitaj Diosninpa yupaychana cheqata p'enqaypi rikhurichenqachu. Payqa jawina aceitewan jawisqa kasqanrayku Diospaj t'aqasqamin. Noqamin Tata Dios kani.
13Kuraj kaj sacerdoteqa mana qharita rejsej warmiwan warmichakonqa. 14Warmisapawanqa ni ima kashajtin warmichakonqachu, nitaj qosanmanta t'aqasqawan, nillataj phisu warmiwanpis warmichakonqachu. Manachayqa paypa kikin jatun ayllunmanta, qharita mana rejsej warmita oqharikonqa. 15Ajinata ruwanqa ama llajta masinkunata, nitaj mirayninta p'enqaypi rikhurichinanpaj. Noqa Tata Diosmin payta noqajta kananpaj t'aqakuni, nispa.
Pikunachus sacerdote kayta mana atejkuna
16Tata Dios Moiseswan parlaspa, nillarqataj: 17Aaronta niy: Kunanmanta qhepamanqa mirayniykimanta mayqenpis iman mana allin kajtenqa, Tata Diosninman t'antata jaywaj mana qayllayta atenqachu. 18Sacerdote jina Tata Diosman mana qayllayta atenqankuchu iman imanasqa kaj, ñawsa, wenqho, senqan, chayrí ninrin imanasqa, 19chakin p'akisqa, chayrí makin p'akisqa, 20moqo wasa, chayrí wat'a runa, ñawin imanasqa, sarnarara, chayrí ukhunpi yuraj tijllayoj, chayrí kapasqa runa. 21Aaronpa mirayninmanta mayqellanpis sichus iman mana allinchu kanman chayqa, q'olachisqa jaywanata Tata Diosman mana jaywayta atenqachu. Nillataj Tata Diospaj t'antanta jaywayta atenqachu. 22Tata Diosman jaywana t'antata, jinataj Diospaj t'aqasqa imakunamantapis mikhuyta atillanqa. 23Ukhunpi iman mana allin kasqanrayku, veloj wasanpi Diosllapaj T'aqasqa nisqa cheqanejman mana yaykonqachu, nitaj altar qayllamanpis chimpanqachu. Noqamin Tata Dios kani, pichus paykunata noqapaj t'aqakorqani, chay, nispa.
24Moisestaj tukuy chayta Aaronman, churinkunaman, jinataj tukuy israelitakunaman ima willarqa.
Currently Selected:
Levítico 21: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
