Levítico 12
12
Onqokoj warmi llimphuchakunanmanta
1Tata Dios Moiseswan parlaspa, nillarqataj: 2Israelitakunata niy: Sichus uj warmi onqoj rikhurispa, qhari wawata paqarichikunman chayqa, qanchis p'unchayta mana llimphupaj qhawasqa kanqa, imaynatachus killa onqoyninwan kaspa karqa, ajinata. 3Chantá wawaqa paqarisqanmanta pusaj p'unchayninman circuncidasqa kanqa.#12.3 Circuncisión imachus kasqanta yachanapaj, Gn 17.12 chijllaypi sut'inchayta ñawirina. 4Chaymanta wawaj mamanqa kinsa chunka kinsayoj p'unchaytawanraj yawarninmanta llimphuchakonqa Diospa ñawpaqenpi llimphu kananpaj. Llimphuchakunan p'unchay junt'akunankamaqa, Diospaj t'aqasqa kajmanta mana ni imata llankhanqachu, nitaj Dioswan Tinkukuna Toldomanpis riyta atenqachu. 5Sichus warmi wawata paqarichikonqa chayrí, mamanqa iskay semanata mana llimphupaj qhawasqa kanqa, imaynatachus killa onqoyniyoj kaspa karqa, ajinata. Chaymantataj sojta chunka sojtayoj p'unchaytawanraj, yawarninmanta llimphuchakuspa kanqa.
6Onqokoj warmi llimphuchakunan p'unchay junt'akojtin, qhari wawata, chayrí warmi wawata paqarichikusqanmanta, uj watayoj corderota apamunan tiyan, Dioswan Tinkukuna Toldo punkupi, q'olachispa Tata Diosman jaywananpaj. Apamunallantaj tiyan uj urpi irpata, chayrí uj jurk'utata, jucha pampachasqa kananpaj Diosman jaywananpaj. Chaykunatataj sacerdoteman apamonqa. 7Sacerdotetaj chayta Tata Diosman jaywanqa, chay warmej juchan pampachasqa kananta mañaspa. Ajinamanta onqokoj warmeqa yawar apayninmanta llimphuchasqa kanqa.
Kaykuna qhari wawata, chayrí warmi wawata paqarichikoj warmimanta kamachisqakuna kashan. 8Sichus onqokoj warmejta corderota apamunanpaj mana tiyapunmanchu chayqa, apamuchun iskay jurk'utata, chayrí iskay urpi irpata. Ujnenqa Tata Diosman q'olachispa jaywanapaj kanqa, ujnintaj jucha pampachasqa kananpaj Diosman jaywanapaj kanqa. Ajinata sacerdoteqa warmej juchan pampachasqa kananpaj jaywanqa, warmitaj llimphupaj qhawasqa kanqa, nispa.
Currently Selected:
Levítico 12: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
