Levítico 13
13
Llejti onqoymanta
1Tata Dios Moiseswan chantá Aaronwan ima parlaspa, nillarqataj: 2Maypachachus mayqenpa ukhunpi rikhurinman: Ch'upu jina, chayrí pukayasqa jina, chayrí yuraj llejti jina, chayrí q'eyaj llejti jina chayqa, sacerdote Aaronman, chayrí kuraj kaj sacerdotej churinman pusanqanku. 3Chantá sacerdote runaj ukhunpi llejtita qhawanqa. Sichus llejti chaynejpi chujcha yurajman kutinman chayqa, chay llejtitaj aychata mikhuykunman chayqa, ismuy onqoymin kanqa. Sitajchus sacerdote qhawaspa, chay runaj llejtin ismuy onqoy kasqanta reparanman chayqa, chay runa mana llimphupaj qhawasqa kananta nenqa.
4Sichus uj runaj ukhunpi yuraj llejti rikhurinman, manataj aswan ukhumanchu yaykunman, nitaj chujchanpis yurajyanmanchu chayqa, sacerdote chay onqosqata qanchis p'unchayta wisq'anqa. 5Chantá sacerdoteqa qanchis p'unchaymanta ujtawan qhawallanqataj. Sichus chay onqoy pachallan kashasqanta reparan, manataj astawan wiñasqanta reparanchu chayqa, uj qanchis p'unchaytawan onqosqa runata wisq'anqaraj. 6Qanchis p'unchay pasajtintaj, sacerdote ujtawan chay runata qhawallanqataj. Sichus chaykama llejti onqoy sayasqanta, manataj astawan wiñasqanta reparan chayqa, sacerdote nenqa onqosqaqa llimphupaj qhawasqa kasqanta, imaraykuchus ukhunpi onqoyqa phusullulla karqa. Jina kasqanrayku onqosqa runaqa p'achanta t'ajsakonqa, chaymantaraj llimphupaj qhawasqa kanqa.
7Sichus llimphupaj qhawasqa kasqanmantaña aycha qaranpi pukayasqan astawan wiñanman chayqa, ujtawan sacerdotewan qhawachikoj rinan tiyan. 8Sichus sacerdote onqosqaj aycha qaranpi pukayasqan astawan wiñashasqanta reparan chayqa, mana llimphupaj qhawasqa kananta nenqa, llejti onqoyniyoj kasqanrayku.
9Sichus mayqen runaj ukhunpi llejti onqoy rikhurinman chayqa, sacerdoteman pusanqanku. 10Chantá sacerdote payta qhawanqa. Sichus aycha qaranpi punkisqa yuraj kanman, chaynejpi chujchapis yurajyashallanmantaj chayqa, sitajchus chaynejpi kawsashaj aycha rikhurinman chayqa, 11chay runaj onqoynenqa mana chinkayta atej llejti onqoy kanqa. Sacerdoteqa chay runata nenqa mana llimphuchu kasqanta. Chayrayku onqoyniyoj runata manaña wisq'anqachu, mana llimphupaj qhawasqaña kasqanrayku.
12Sichus llejti onqoy runaj tukuy ukhunman, chakinmanta umankama askamalla junt'aykunman, sacerdote maykamachá rikuyta atin chaykama chayqa, 13sacerdote payta allinta qhawanqa. Sichus llejti onqoy chay runaj tukuy ukhunman junt'aykushasqanta qhawan chayqa, sacerdote nenqa chay runa llimphu kasqanta. Llimphu kanqa, imaraykuchus runaj ukhonqa yurajman tukun, chayrayku. 14Chaywanpis sichus llejtiyasqa chaynejpi, kawsashaj aycha rikhurinman chayqa, chay runaqa mana llimphupaj qhawasqa kanqa. 15Chaypacha sacerdoteqa chay runaj llejtiyasqa aychanta qhawaspa, nenqa mana llimphu kasqanta. Kawsashaj aychaqa mana llimphuchu, llejti onqoy kasqanrayku.
16Jinataj sichus kawsashaj aycha yurajyanman chayqa, onqosqa runa sacerdoteman rinan tiyan. 17Sacerdotetaj payta qhawanqa. Sichus llejtiyasqa aycha yurajyapusqanta reparanqa chayqa, sacerdote nenqa chay runa llimphuña kasqanta, aychan llimphuña kasqanrayku.
18Sichus mayqen runaj aycha qaranpi llejti rikhurinman, thañipunmantaj chayqa, 19sitajchus thañipusqan cheqapi yurajta punkinman, chayrí yuraj puka chhoqopachataj rikhurinman chayqa, chay runa sacerdotewan qhawachikoj rinan tiyan. 20Sichus sacerdote qhawaspa, llejti onqoy aychata mikhushasqanta reparanman, jinallataj chaynejpi chujchapis yurajyashasqanta reparanman chayqa, chaypacha nenqa onqosqa runa mana llimphuchu kasqanta, llejti onqoyniyoj kasqanrayku. 21Sichus nanasqa cheqapi chujcha mana yurajyasqanta rikun chayqa, nitaj aychapis mikhusqa kasqanta, manachayqa chinkapusqantaña reparanman chayqa, sacerdote chay onqosqata qanchis p'unchayta wisq'anqa. 22Sichus qanchis p'unchay pasasqanmanta sacerdote llejti astawan wiñasqanta reparanman chayqa, pay nenqa chay runa mana llimphuchu kasqanta, llejtiwan onqosqa kasqanrayku. 23Sitajchus, llejti rikhurisqan mana wiñasqanta reparan chayrí, t'irillanña kashan. Chayrayku sacerdote chay runata llimphu kasqanta nenqa.
24Sichus pipis aycha qaranpi ruphachikunman, ruphachikusqan cheqapitaj kawsashaj aychapi t'ojrapacha, chayrí yurajyashaj jina rikhurinman chayqa, 25sacerdote chayta qhawanqa. Sichus chay nanasqa cheqapi chujcha yurajman tukunman, aychapis ruphasqa t'iripi mikhusqa jina kanman chayqa, ruphasqa cheqapi llejti onqoy rikhurishan. Chayrayku sacerdote nenqa chay runa mana llimphuchu kasqanta, llejti onqoyniyoj kasqanrayku. 26Chantá sichus sacerdote qhawaspa, nanasqa cheqapi mana yuraj chujcha kasqanta rikunmanchu, nitaj aycha mikhusqa kasqanta reparanmanchu, manachayqa chinkapushasqantaña reparanman chayqa, sacerdote chay runata qanchis p'unchayta wisq'anqa. 27Qanchis p'unchaymanta sacerdote ujtawan chay runata qhawanqa. Sichus llejti onqoy astawan wiñasqanta reparanqa chayqa, sacerdote nenqa chay runa mana llimphuchu kasqanta, llejti onqoyniyoj kasqanrayku. 28Sitajchus nanasqa mana wiñanchu, chinkapushantaj chayqa, ruphachikusqanrayku punkisqalla kashan. Ajinaqa sacerdote nenqa chay runa llimphu kasqanta, ruphachikusqanmanta t'irilla kasqanrayku.
29Sichus uj qharejta, chayrí warmejta umanpi, chayrí k'akinpi llejti onqoy jatarinman chayqa, 30sacerdote chayta qhawanqa. Sichus llejti onqoy aychata mikhushasqanta, chayrí chaynejpi chujchapis q'elluyaspa pisiyashasqanta qhawanqa chayqa, sacerdote nenqa chay runa mana llimphuchu kasqanta, umanpi, chayrí k'akinpi tijlla onqoyniyoj kasqanrayku. 31Sichus sacerdote tijlla onqoy mana aychata mikhushasqanta rikunman, nitaj chaynejpi yana chujcha kasqanta reparanman chayqa, sacerdote chay runata qanchis p'unchayta wisq'anqa. 32Chantá qanchis p'unchaymanta sacerdote ujtawan chay llejtita qhawanqa. Sichus tijlla onqoy mana astawan wiñasqanta, nitaj aychata mikhusqanta, nitaj chaynejpi chujchapis q'elluyasqanta qhawan chayqa, 33sacerdote chay runata nenqa sunkhanta, chujchantapis ruthukunanta, maynejpichus tijlla rikhurerqa, chaynejllata mana ruthukonqachu. Chaymantataj sacerdoteqa qanchis p'unchaytawanraj wisq'anqa. 34Qanchis p'unchaymantataj sacerdoteqa tijlla rikhurerqa, chaynejta ujtawan qhawallanqataj. Sichus onqoy mana astawan wiñasqanta, nitaj aychata mikhusqanta qhawanqa chayqa, sacerdote nenqa onqosqa runa llimphuña kasqanta. Chantá onqosqa runaqa p'achanta t'ajsanqa, llimphupajtaj qhawasqa kanqa.
35Sichus sacerdote chay runata llimphu kasqanta nisqanmanta qhepaman, llejti onqoy aycha qaranpi astawan wiñanman chayqa, 36sacerdote onqosqa runata ujtawan qhawanqa. Sichus tijlla onqoy astawan wiñasqanta reparanman chayqa, sacerdoteqa manaña q'elluyashaj chujchata mask'anqachu. Chay runaqa mana llimphupaj qhawasqa kanqa. 37Chantá sichus sacerdote yuyanman chay tijlla onqoy chinkasqanta, chaynejpitaj yana chujcha rikhurisqanta rikunman chayqa, niyta munan onqoyqa chinkasqantaña. Chayrayku sacerdoteqa chay runa llimphuña kasqanta nenqa.
38Maypachachus uj qharejta, chayrí uj warmejta aycha qaranpi yuraj mirkha jina rikhurinman chayqa, 39sacerdote chayta qhawanqa. Sichus chay runaj aycha qaranpi yuraj oqeyasqa mirkha rikhurisqanta qhawanqa chayqa, mana onqoychu. Jina kajtenqa, chay runa llimphupaj qhawasqa kanqa.
40Sichus uj runaj chujchan t'akakusqanrayku p'ajla rikhurinman chayqa, chay runaqa llimphumin. 41Sichus mat'in chaymanta chujchan t'akakusqanrayku uman p'ajlayanman chayqa, chay runapis llimphullataj kashan. 42Chantá sichus p'ajlanpi pukayasqa yuraj lleqhe rikhurinman, chayrí much'unpi, chayrí ñawpaqenpi chayqa, chaynejpi llejti onqoy rikhurishan. 43Jina kanman chayqa, sacerdote chay runata qhawanqa. Sichus chay runaj p'ajlanpi lleqhe t'ojraraw pukaniray kanman, imaynachus aycha qarapi llejti rikhurin jina chayqa, 44chay runaqa llejtiwan onqosqa, imaraykuchus umanpi lleqhe rikhurin. Ajina chayqa, sacerdote nenqa chay runa mana llimphuchu kasqanta.
45Pichus llejti onqoyniyojqa llik'isqa p'achata churakuchun, ch'aska umallataj purichun, uyanta suk'umpaykukuspataj, qhaparichun: Mana llimphuchu kani, mana llimphuchu kani, nispa. 46Llejti onqoynin chinkanankama chay runa mana llimphupaj qhawasqa kanqa. Chantapis jaramanta jawapi sapallan tiyakunan tiyan.
47Wakin kuti millmamanta, chayrí linomanta ruwasqa p'achapi qorwariyay rikhuriyta yachan, 48chayrí linomanta, millmamanta awasqapi, chayrí qarapi, qaramanta ima ruwasqapipis rikhurin. 49Sichus rikhurej qorwariyay q'omeryanman, chayrí pukayanman chayqa, llejti qorwariyay kashan. Chayta sacerdoteman apaspa rikuchimunan tiyan. 50Chantá chay qorwariyasqa imata sacerdote qhawaytawan, qanchis p'unchayta jallch'anqa. 51Qanchis p'unchaymantataj chay qorwariyasqata ujtawan qhawallanqataj. Sichus p'achapi, awasqapi, qarapi, qaramanta ima ruwasqapi qorwariyay jatunyanman chayqa, chay qorwariyayqa millay llejti onqoy kashan. Jinaqa qorwariyasqa imakuna ch'ichipaj qhawasqa kanqanku. 52Ajinaqa imallapipis qorwariyay rikhurinman chayqa, chaykuna tukuynin ruphachisqa kanan tiyan, imaraykuchus llejti onqoyniyoj kashan.
53Sichus sacerdote qhawaspa, qorwariyay mana astawan wiñasqanta reparanman chayqa, 54qorwariyasqa imakunata mayllanankuta kamachenqa, jinaspataj qanchis p'unchaytawan jallch'anankuta.
55Chay qorwariyasqata mayllasqankumantaña sacerdote ujtawan qhawallanqataj. Sichus mana chinkasqanta reparan chayqa, chay qorwariyasqaqa ch'ichipaj qhawasqa kanqa. Sitajchus qorwariyay mana chinkanmanchu chayqa, ch'ichi kasqanrayku ruphachisqa kanqa. 56Sichus mayllasqamantaña sacerdote qhawaspa rikunman qorwariyay chinkapushasqantaña chayqa, chay cheqanejta k'utonqa, p'achamantapis, qaramantapis, awasqamantapis kachun. 57Sichus p'achapi qorwariyay ujtawan rikhurispa, p'achaman junt'anman, chantá awasqapi, chayrí qaramanta ruwasqapi chayqa, imapichus qorwariyay ujtawan rikhurerqa, chay ruphachisqa kanqa. 58Sichus p'achata, awasqata, chayrí qaramanta ima ruwasqatapis t'ajsajtinku, qorwariyay chinkanman chayqa, ujtawan t'ajsajtinku llimphupaj qhawasqa kanqa.
59Chaykuna kanku kamachisqakuna millmamanta, linomanta ruwasqa p'achapi, awasqapi, qaramanta imachus ruwasqa kajpi qorwariyay rikhurejtin, llimphupaj chayrí ch'ichipaj qhawanapaj imatachus ruwanamanta.
Currently Selected:
Levítico 13: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
