Levítico 11
11
Mikhunapaj, mana mikhunapaj animalkuna
(Dt 14.3-21)
1Tata Dios Moiseswan, Aaronwan ima parlaspa, nillarqataj: 2Israelitakunata niychej: Kay pachapi kaj chhika animalkunamanta kaykunata mikhuyta atinkichej: 3K'anojkunata, chantá chaki sillun palqasqa uywakunata mikhuyta atinkichej. 4K'anojkunamanta, chayrí chaki sillun palqayojkunamanta kaykunata ama mikhunkichejchu: Camello k'anun chaypis, chaki sillun mana palqayojchu. Chay uywata ch'ichipaj qhawankichej.
5Qoweqa k'anun, chaywanpis chaki sillun mana palqayojchu. Chayrayku chay uywata mana llimphuchu kasqanta qhawankichej.
6Qhechi qowipis k'anullantaj, chaywanpis chaki sillun mana palqayojchu kasqanrayku, chay uywatapis mana llimphuchu kasqanta qhawankichej.
7Khuchitaqa amallataj mikhunkichejchu, imaraykuchus chaki sillun palqayoj chaypis, mana k'anunchu. Chayrayku khuchitaqa mana llimphuchu kasqanta qhawankichej.
8Chay uywakunaj aychanta ama mikhunkichejchu. Payllamanta wañojtinpis mana llojchillankichejpischu. Chaykunata mana llimphuchu kasqanta qhawankichej.
9Yakupi kawsajkunamanta kaykunata mikhuyta atinkichej: Mama qochapi, mayupi kajmantaqa tukuy lijrayoj chantá qherpayoj challwakunata mikhuyta atinkichej. 10Mama qochapi, chayrí mayupi kawsajkunamanta mana lijrayoj, nitaj qherpayoj kajtaqa ch'ichipaj kasqanta qhawankichej, jatuchajpis, chayrí juch'uychajpis kachunku. 11Chay animalkunaj aychanta ama mikhunkichejchu. Chayta millaypaj qhawankichej, wañojtinkupis ama llankhankichejchu. 12Yakupi kawsaj tukuy animalmanta mana lijrayoj, nitaj qherpayojqa millachikunapaj qhawasqa kanqanku.
13Phuruyoj animalkunamantarí kaykunata ama mikhunkichejchu, manachayqa ch'ichipaj qhawasqa kasqanta qhawankichej: Ankata, kunturta, yaku ankata, 14suwintuta, imaymana mamanikunata, 15tukuy imaymana qharqañakunata, 16surita, ch'useqata, tukuy imaymana wamankunata, imaymana wallpa suwata. 17Kaykunatapis millaypaj qhawankichej: Jukuta, p'aspata, ibis sutiyoj p'isqota, 18pilita, pelícano sutiyoj p'isqota, suweq'arata, 19pariwanata, tukuy imaymana wajchillata, abubilla nisqa p'isqota, chiñita ima.
20Jinallataj tukuy imaymana lijrayoj khuruta, jinataj pampata purej tukuy imaymana khuruta ch'ichipaj qhawankichej. 21Chaywanpis lijrayoj khurukunamanta, pampata phinkispa purejkunallata mikhuyta atinkichej, chakinkoqa phinkinapaj jina moqoyoj kasqanrayku. 22Chaykunamantaqa kaykunata mikhuyta atinkichej: Tukuy imaymana phinki phinkikunata, sirp'a sirp'ata, t'inti t'intikunata ima. 23Chaymanta lijrayoj pampapi purej tukuy khurukunataqa millaypaj qhawankichej.
24Qankunamanta pipis kayta ruwajqa mana llimphupaj qhawasqa kankichej. Pillapis kay animalkunamanta wañusqata llankhajqa ch'isiyaykuykama mana llimphupaj qhawasqa kankichej.
25Jinallataj pillapis kay khurukunamanta wañusqata oqharejqa p'achanta t'ajsakonqa, ch'isiyaykuykamataj mana llimphupaj qhawasqa kanqa.
26Tukuy animal chaki silluyoj kashaspa, manataj palqayojchu kanman, nillataj k'anojchu kanman chayqa, chay animalta ch'ichipaj qhawankichej. Pichus chay animalta llankhajqa ch'ichipaj qhawasqa kanqa.
27Tawa chakiyoj animalkunamanta, chaki pampanwan purejkunata ch'ichipaj qhawankichej. Chantá pillapis chay wañusqa animalta llankhajqa ch'isiyaykuykama mana llimphupaj qhawasqa kanqa. 28Jinallataj pillapis wañusqa animalta oqharejqa p'achanta t'ajsakonqa, chantá ch'isiyaykuykama mana llimphupaj qhawasqa kanqa. Qankunaqa chay animalkunata ch'ichipaj qhawanaykichej tiyan.
29Pampata qhatatakuspa purej animalkunamantaqa kaykunata ch'ichipaj qhawanaykichej tiyan: Q'arachupata, juk'uchata, tukuy imaymana katarikunata, 30tukuy imaymana juronkunata, caimanta, iguanata, ararankhata, chantá camaleonta ima.
31Chay animalkunata qankunaqa ch'ichipaj qhawankichej. Pillapis chay animalkunamanta wañusqata llankhajqa ch'isiyaykuykama mana llimphupaj qhawasqa kanqa. 32Jinallataj imamanchus chay wañusqa animal urmaykonqa chayqa, chaypis ch'ichillapajtaj qhawasqa kanqa. K'aspimanta ruwasqapis kachun, chayrí kachun p'acha, qara, costalkuna, llank'anapaj herramientapis, ch'ichipaj qhawasqa kanqa. Chaykunataqa yakuwan mayllankichej, ch'isiyanankamataj ch'ichipaj qhawasqa kanqa. Chaymantaraj llimphu kanqa.
33Sichus chay animalkunamanta wañusqa t'uru mankaman urmaykunman chayqa, mankapi kajqa ch'ichipaj qhawasqa kanqa. Mankatatajrí p'akinkichej. 34Sichus chay mankamanta yaku mikhunaman jich'aykukunman chayqa, chay mikhunaqa ch'ichipaj qhawasqa kanqa. Jinallataj chay mankapi kaj yakupis ch'ichillapajtaj qhawasqa kanqa. 35Wañusqa animal imamanchus urmaykonqa chayqa, ch'ichipaj qhawasqa kanqanku. Hornopis kachun, q'onchapis kachun, chayta thuñinkichej, imaraykuchus ch'ichichasqa kashan. Chayrayku qankunaqa chaykunata ch'ichipaj qhawankichej.
36Chaywanpis yaku juturi, yaku qocha imaqa llimphullapajpuni qhawasqa kanqa. Pichus wañusqa animalta llankharejlla mana llimphupaj qhawasqa kanqa.
37Sichus wañusqa animal tarpuna mujuman urmaykunman chayqa, chay mujoqa llimphullapuni kanqa. 38Sitajchus chullusqa mujuman wañusqa animal urmaykunman chayqa, chay mujoqa ch'ichipaj qhawasqa kanqa.
39Sichus mikhunaykichejpaj llimphupaj qhawasqa animal wañunman, chaytataj pipis llankhanman chayqa, ch'isiyaykuykama chay runa mana llimphupaj qhawasqa kanqa. 40Pichus wañusqa animalpa aychanta mikhojqa p'achanta t'ajsakonqa, ch'isiyaykuykamataj mana llimphupaj qhawasqa kanqa. Jinallataj pichus wañusqa animalta orqhojqa p'achanta t'ajsakonqa, chantá ch'isiyaykuykama mana llimphupaj qhawasqa kallanqataj.
41Jallp'a patata qhatatakuspa purej animalkunamantaqa amapuni mikhunkichejchu. Chaykunataqa ch'ichipaj qhawankichej. 42Jallp'a patata qhatatakuspa purej animalkunata, tawa chakiyojpis, chayrí ashkha chakiyojpis kachun, amapuni mikhunkichejchu. Chaykunaqa ch'ichipaj qhawasqa kanku. 43Ama ari, ni mayqen pampata qhatatakuspa purej animalrayku mana llimphupaj qhawasqa kaychejchu, nitaj paykunawan ch'ichichakuychejchu, imajtinchus ch'ichipaj qhawasqa kanku. 44Noqa Tata Diosniykichej kani. Chayrayku qankunaqa noqapaj t'aqasqa jina allinta puriychej, imaraykuchus noqaqa may llimphu kani.#Lv 19.2; 1 P 1.16. Qankunaqa amapuni pampata qhatatakuspa purej animalkunata llojchispa ch'ichichakunkichejchu. 45Noqa Tata Dios kani, pichus Diosniykichej kanaypaj qankunata Egiptomanta orqhomorqaykichej, chay. Chayrayku qankunaqa noqapaj t'aqasqa jina kawsaychej, imajtinchus noqaqa manchay llimphumin kani, nispa.
46Chaykuna kanku animalkunamanta, lijrayojkunamanta, yakupi tukuy kawsajmanta, chantá jallp'a patata qhatatakuspa purejkunamanta kamachisqakuna. 47Ajinata ch'ichipaj qhawasqata, llimphupaj qhawasqata, mayqen animaltachus mikhunamanta, mayqentatajchus mana mikhunamantapis reparayta atinkichej, nispa. Ajinata Tata Dios nerqa.
Currently Selected:
Levítico 11: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
