Éxodo 5
5
Moiseswan Aaronwan faraonwan parlaj rinku
1Chantá Moiseswan, Aaronwan ima faraonwan parlaj rispa, nerqanku: Israelpa Diosnin Tata Dios ajinata nisunki: Noqaj ajllakusqay aylluyta kachariy, ch'innejman rispa, sutiypi uj raymita ruwapunawankupaj, nispa. 2Faraontajrí kuticherqa: Pitaj chay Tata Dios kasqa, noqa payta kasuspa, israelitakunata kacharinaypajri? Noqaqa chay Tata Diosta mana rejsinichu, nitaj israelitakunata kacharisajchu, nispa.
3Chantá Moisés, Aaronwan ima nerqanku: Diosniykoqa noqayku hebreokunaman rikhuriwarqayku. Chayrayku ch'innejman kinsa p'unchay puriyta rinayku tiyan, chaypitaj uywa ñak'asqata q'olachispa, Tata Diosman jaywamusqayku. Manachus Tata Diosman jaywaykuman chayqa, ichapis pay onqoywan, chayrí espadawan wañuchiwaykuman, nispa.
4Egipto suyuta kamachej faraontajrí paykunata nerqa: Moisés, Aarón, imaraykutaj israelitakunata ruwanankumanta sayachiyta munashankichejri? Qankunapis ruwanaykichejman kutipullaychejtaj, nispa. 5Chantá faraón nillarqataj: Egiptopi israelitakuna may chhika kanku. Qhawallasajchu ruwanankumanta sayanankuta? nispa.
6Chantá chay p'unchaypacha faraonqa sapa t'aqamanta kurajkunata, jinataj jilaqatakunatawan kay jinata kamacherqa: 7Kunanmantaqa israelitakuna adobenankupaj amaña ichhuta qonkichejchu, imaynatachus kunankama qosharqankichej, jinataqa. Manachayqa paykuna kikinku ichhuta pallakamuchunku. 8Chaywanpis kunankama mashkhatachus adobeta ruwashanku, chay chhikallatapuni ruwanankuta ninkichej. Ama pisiyachinkichejchu. Paykuna qhellallamanta nishanku: Ch'innejman rispa, Diosniykuman uywa ñak'asqa q'olachinata jaywamusqayku, nispa. 9Qankunarí paykunata astawan sinch'ita ruwachiychej, imachus ruwanallankupi yuyanankupaj, amataj llulla parlajkunata uyarinankupaj, nispa.
10Chantá sapa t'aqata kamachejkuna, jilaqatakuna ima rispa, israelitakunata nerqanku: Faraón kamachiwayku amaña ichhuta qankunaman qonaykuta. 11Kunanmantaqa qankuna kikiykichej maymantapis ichhuta pallakamunaykichej tiyan. Chaywanpis mashkhatachus adobeta ruwaj kankichej, chay chhikallatapuni ruwanaykichej kanqa, nispa.
12Chayrayku israelitakuna tukuy Egipto suyuman rispa, rastrojota ichhoj cuentanmanta apamorqanku. 13Egipto llajtayoj jilaqatakunataj israelitakunata astawan sinch'ita ruwacherqanku, nerqankutaj: Ichhuta qoshajtiyku mashkhatachus ruwaj kankichej, ajinallatataj adobeta ruwanaykichej tiyan, nispa. 14Israelitakuna mashkhatachus ruwanankuta mana junt'ajtinkutaj, faraonpa jilaqatankunaqa israelitakuna ukhumanta jilaqatakuna churasqankuta seq'orqanku, nerqankutaj: Imaraykutaj mana qayna, nitaj kunanpis junt'arqankichejchu, mashkhatachus ñawpajta ruwaj kankichej, chay chhikata? nispa.
15Chayrayku israelitakunaj jilaqatankunaqa faraonman quejakoj rispa, nerqanku: Imaraykutaj kamachiykikunata kay jinata ruwawaykuri? 16Manaña ichhuta qowaykuchu, chaywanpis nishawayku: Adobeychej, nispa. Mana junt'ayta atejtiykurí, maqawaykurajtaj. Chaypajqa runaykikuna juchayoj kanku, nispa.
17Faraontajrí kuticherqa: Qankuna qhella kankichej, mana ni ima ruwanayojpis kawajchej jina. Chayrayku nishankichej: Ch'innejman rispa, noqayku Tata Diosman uywa ñak'asqa q'olachinata jaywamusqayku, nispa. 18Kutirispa, ruwanaykichejta ruwamuychej. Ichhuta manañapuni qosonqachejchu. Jinapis chaywan mana chaywan qankunaqa sapa p'unchay mashkhatachus ruwaj kankichej, chay chhikallatapuni adobenaykichej tiyan, nispa.
19Ajinata israelitakunaj jilaqatankukunaqa imatachus ruwanankuta mana yacharqankuchu, imaraykuchus faraón nisqa: Sapa p'unchay mayk'atachus adobe ruwanaykichejqa mana pisiyachisqachu kanqa, nispa. 20Chay jilaqatakuna faraonwan parlasqankumanta llojsimuspa, Moiseswan Aaronwan tinkukorqanku. Paykuna jawapi suyasharqanku. 21Jinapi jilaqatakuna nerqanku: Tata Dios qankunaj ruwasqaykichejta allinta qhawachun. Qankuna juchayoj kankichej faraonwan, yanapajninkunawan ima astawan chejninawaykupaj. Kunantaj qankunaj nisqaykichejrayku paykuna espadawan wañuchiwasqayku, nispa.
Moisés Tata Diosman willakun
22Chantá Moisesqa Tata Dioswan parlaspa, nerqa: Diosníy, imajtintaj aylluykita kay jinatapuni ñak'arichinkiri? Imapajtaj kachamuwarqankiri? 23Sutiykipi faraonman parlaj jamusqaymantapacha, payqa Israel aylluykita astawan ñak'arichin. Qantaj aylluykita kacharichinaykipaj mana imatapis ruwankichu, nispa.
Currently Selected:
Éxodo 5: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
