Éxodo 4
4
1Chantá Moisés Tata Diosman kuticherqa: Israelitakuna mana nisqayta jap'ikonqankuchu, nitaj kasuwanqankuchu. Aswanpis niwanqanku: Tata Diosqa mana qanman rikhurisunkichu, nispa.
2Tata Diostaj kuticherqa: Imatataj jap'ishankiri? nispa. Moisestaj nerqa: Uj varata jap'ishani, nispa.
3Chantá Tata Dios Moisesta nerqa: Varaykita pampaman choqay, nispa. Paytaj pampaman choqarqa. Pampaman choqajtinkamataj, varaqa katariman tukorqa. Moisestaj mancharikuspa, katarimanta ayqeyta munarqa. 4Tata Diostajrí Moisesta nerqa: Chupanmanta jap'iy, nispa. Moisestaj kasuspa, katarita chupanmanta jap'iykorqa, jap'ejtinkamataj, katareqa varaman tukuporqa. 5Tata Diostaj nillarqapuni: Chayta rikuspa, paykuna yachanqanku ñawpa tataykichejkunaj Tata Diosnin, Abrahampata, Isaacpata, chantá Jacobpata ima, qanman rikhurisqayta, nispa.
6Chantá Tata Dios ujtawan Moisesta nillarqataj: Makiykita ojllayniykiman churaykuy, nispa. Moisestaj makinta ojllayninman churaykorqa. Makinta orqhospataj, rit'i jina yurajllata, llejti onqoywan kasqanta rikorqa.
7Chaymanta Tata Dios nillarqataj: Ujtawan makiykita ojllayniykiman churaykuy, nispa. Moisestaj ujtawan makinta ojllayninman churaykorqa. Makinta orqhospataj, tukuy ukhun jina mana imanasqata rikorqa.
8Chantá Tata Dios ujtawan nerqa: Sichus kay ñawpaj kaj rikuchisqaykita rikuspa mana nisqaykita jap'ikonqankuchu, nitaj kasusonqankuchu chayqa, kay qhepan kaj rikuchisqaykita rikuspa, nisqaykita jap'ikonqanku. 9Sichus chay iskay señalkunata rikuspa, mana nisqaykita jap'ikonqankuchu, nitaj uyarisonqankuchu chayqa, yakuta mayumanta oqharimuspa, jallp'aman jich'anki. Jallp'aman jich'asqayki yakutaj yawarman tukonqa, nispa.
10Moisestajrí kuticherqa: Ay, Dios Tatáy, noqaqa mana sumajta parlayta yachanichu, mana qan parlawasqaykillamantachu, ni qaynallamantachu, nitaj kunallanmantachu. Noqaqa unaypuni jina karqani. Parlashajtiytaj, qalloyqa watakullawan, nispa.
11Tata Diostaj kuticherqa: Chantá pitaj runata simiyojta ruwarqari? Manachu noqa Tata Dios runata opayachini, joq'arayachini, ñawsayachini, chayrí qhawarichini? 12Chayrayku Egiptoman riy. Parlashajtiyki, noqamin qanwan kasaj, jinataj noqa yachachisqayki imatachus parlanaykita, nispa.
13Moisestajrí kuticherqa: Ay, Diosníy, wajllata kachawaj karqa ari, nispa.
14Jinapi Tata Diosqa Moisespaj phiñarikuspa, nerqa: Leví jatun ayllumanta wawqeyki Aarón yanapasunanpaj kashan. Noqa yachani pay sumajta parlayta yachasqanta. Payqa ñapis taripasoj jamushanña, rikususpataj, manchayta kusikonqa. 15Egiptopiña kashajtiykichej qan payman parlaspa, imatachus ninanta sumajta yachachinki. Noqataj paywan kasaj, jinallataj qanwanpis. Chantá imatachus ruwanaykichejta noqallataj yachachisqaykichej. 16Qanqa Aaronman parlanki noqapis parlashayman jina, paytaj runakunaman imatachus nisqaykita willanqa. 17Jinallataj kay varata apanki, chaywan t'ukuna imakunata ruwanaykipaj, nispa.
Moisés Egiptoman kutirin
18Chantá Moisés chaymanta ripuspa, suegron Jetrojpaman kuterqa, nerqataj: Noqaqa Egiptoman wawqeykunata watukoj risaj, kawsakushankurajchus manachus, chayta yachaj, nispa. Jetrotaj nerqa: Jina kajtenqa, rillay ari, allillantaj risuchun, nispa.
19Chantá Madianllapiraj Moisés kashajtin, Tata Dios ujtawan payman rikhurispa, nerqa: Egiptoman kutiy, imaraykuchus qanta wañuchiyta munajkunaqa wañunkuña, nispa.
20Chayrayku Moisés warminta, wawankunatawan ima burroman lloq'aykuchispa, Egiptoman kutirerqa. Jinallataj Diospa qosqan varatapis apallarqataj.
21Chaymanta Tata Diosqa Moisesta nillarqataj: Egiptoman kutispa, faraonpa ñawpaqenpi kamachisusqayman jina t'ukuna ruwanaykita ruwankipuni. Noqatajrí faraonpa sonqonta rumiyachisaj,#4.21 Sonqonta rumiyachisaj: Diospa Qhelqachisqanman jina, yuyana, chantá imatachus ruwanata, chayrí mana ruwanata ninaqa, sonqomanta llojsimun. 1 R 3.9; Mc 7.21-23. Sonqota rumiyachina niyta munan, Diospa kamachisqanta mana kasuyta munana. Sal 12.2,3. paytaj israelitakunata mana kachariyta munanqachu. 22Chantá faraonta ninki: Tata Dios ajinata nisunki: Israelqa noqaj kuraj kaj churiymin.#4.22-23 Kuraj kaj churi: Israelitakunapaj kuraj kaj qhari wawaqa maypaj qhawasqa karqa, imaraykuchus tatanmanta chayaqeta astawan kurajta jap'ej. Tata wañupojtinrí, kuraj kaj tatanpa cuentanpi rikhurej. Jinallataj, kuraj kaj qhari wawa maypaj qhawasqa karqa, imaraykuchus Diospata karqa. Ex 13.2; 22.29-30; 34.19-20. Diosqa israelitakunata kacharipunanta munaspa, faraonta sinch'ita mat'iykorqa, imaraykuchus Israel suyoqa Diospata karqa, chayrayku. Ex 19.5-6. 23Ña niykiña, yupaychanawanpaj churiyta kacharinaykita, qantajrí mana rinanta munashankichu. Chayrayku noqaqa kuraj kaj qhari wawaykita wañuchisaj, nispa.
24Moiseswan, ayllunwan ima ñanta rishajtinku, puñunankupaj jarakunanku wasipi Tata Dios rikhurispa, Moisesta wañuchiyta munarqa. 25Moisespa warmin Seforatajrí chayta rikuspa, uj q'achi rumita oqhariytawan, qhari wawanpata phichilunpi ch'ulitunta khuchuspa, orqhorqa. Chaywantaj Moisespa khapanman llankhaykuchispa, nerqa: Qanqa wawaypa yawarninwan jark'asqa kanki, nispa. 26Chantá Tata Dios manaña Moisesta wañuchiyta munarqachu. Seforatajrí: Yawarwan jark'asqa qosay kanki, nispa, parlasharqa wawanta circuncidasqanmanta.
27Chaykamataj, Tata Dios Aaronta nerqa: Riy ch'innejman wawqeyki Moisesta taripaj, nispa. Paytaj kachaykukuspa, Diospa orqon nisqa, chaynejpi Moisesta taripamorqa. Napaykuspataj, wawqenta much'aykorqa. 28Chaymanta Moisesqa Aaronman Tata Dios imatachus nisqanta willarqa, chantá t'ukuna imakunata ruwananta kamachisqantawan ima willallarqataj.
29Chaymantataj Moiseswan Aaronwan rispa, Egiptoman kuterqanku, chayaspataj, israelitakunaj tukuynin kurajninkukunata tantacherqanku. 30Aarontaj paykunaman willarqa, Tata Dios imatachus Moisesman nisqa, chay tukuyta. Moisestaj Diospa kamachisqanman jina, kurajkunaj rikunankuta t'ukunapaj jina señalkunatapis ruwallarqataj.
31Jinapi israelitakuna paykunaj nisqankuta jap'ikorqanku. Chantá Tata Dios israelitakunamanta yuyarikusqanta, ñak'arisqankutapis rikusqanta ima yachaspa, tukuyninku qonqoriykukorqanku, Diostataj yupaycharqanku.
Currently Selected:
Éxodo 4: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
