Éxodo 6
6
1Chantá Tata Dios Moisespa mañakusqanta uyarispa, nerqa: Faraonwan imatachus ruwasqayta kunan rikunki. Sinch'ita payta mat'iykojtiyraj, pay kacharisonqachej. Arí, pay kikin ripunaykichejta nisonqachej, nispa.
Tata Diosqa Moisesta ujtawan kachan
2Chaymanta Tata Diosqa Moisesta ujtawan nillarqataj: Noqamin Tata Dios kani. 3Noqaqa Tukuy Atiyniyoj Dios#6.3 Tukuy Atiyniyoj Dios: Hebreo rimaypi “El Shadai”. Qhawariy Gn 17. 1 chijllaypi sut'inchay kashan, chayta. Sal 91.1; Gn 28.3; 35.11; 48.3; Ex 6.3. sutiywan Abrahamwan, Isaacwan, Jacobwan ima rejsichikorqani. Tata Dios#6.3 Tata Dios: Hebreo rimaypi “Yahvé” (YHWH). Qhawariy Ex 3.14 chijllaypi sut'inchay kashan, chayta. sutiywanrí mana paykunaman rejsichikorqanichu. 4Chantapis, paykunawan uj tratota ruwarqani, Canaán suyuta qonaypaj. Paykunarí chay suyupi waj llajtayoj jina tiyakorqanku. 5Kunantaj Egipto llajtayojkuna israelitakunata ñak'arichisqankurayku, israelitakunaj ayqosqankuta uyarispa, noqaqa aylluywan trato ruwasqaymanta yuyarikuni.
6Chayrayku qan israelitakunata ninki: Diosqa kay jinata nisunkichej: Noqamin Tata Dios kani. Noqataj Egiptopi sinch'i ruwanamanta orqhosqaykichej, wata runa kasqaykichejmantapis pagota qospa kacharichisqaykichej. Ajinamanta jatun atiyniywan Egipto llajtayojkunata sinch'ita ñak'arichispa, kay suyumanta pusakapusqaykichej. 7Noqa qankunata aylluypaj jap'ikapusqaykichej, noqataj Diosniykichej kasaj.#Jer 31.33; Os 2.23. Ajinamanta yachankichej noqa Tata Diosniykichej Egiptopi wata runa kanaykichejmanta kacharichisqayta. 8Chantá mayqen jallp'atachus Abrahamman, Isaacman, Jacobman ima tiluspa qonayta nerqani, chay jallp'aman noqa pusasqaykichej. Chay jallp'atataj qankunaman qopusqaykichej. Noqamin Tata Dios kani, nispa.
9Chantá Moisés israelitakunaman chay tukuyta willarqa. Paykunatajrí mana kasuta ruwarqankuchu, imaraykuchus wata runa jina sinch'i ruwanapi kaspa, sonqonku p'akisqa kasharqanku.
10Jinapi Tata Dios Moisesta ujtawan nerqa: 11Rispa, Egipto suyupi kuraj kamachej faraonta nimuy: Israelitakunata kacharipuy suyuykimanta ripunankupaj, nispa.
12Moisestajrí kuticherqa: Ni israelitakunapis uyarishawankuchu. Imaynatataj faraón uyariwanqari? Noqaqa mana sumajta parlayta atinichu, nispa. 13Chaywanpis Tata Diosqa Moiseswan, Aaronwan ima parlaspa, kamacherqa israelitakunaman, chantá faraonman ima kay jinata ninankuta: Tata Dios noqaykuta kachamuwayku israelitakunata Egiptomanta orqhonaykupaj, nispa.
Aaronpata Moisespatawan ñawpa tatankukuna
14Kaykuna Israelpa wakin ayllukunaj kurajninkukuna karqanku: Israelpa kuraj kaj churin Rubenpa churinkuna karqanku: Janoc, Falú, Jesrón, Carmi ima. Chaykuna Rubenpa wasi ayllun karqanku.
15Simeonpata churinkunataj karqanku: Jemuel, Jamín, Oad, Jaquín, Sojar, Saúl ima. Saulpata maman Canaán llajtayoj karqa. Chaykuna Simeonpata wasi ayllun karqanku.
16Levijpata churinkunaj sutinku kurajmanta sullk'akama karqa: Gersón, Coat, Merari ima. Leviqa 137 watata kawsarqa. 17Gersonpata churinkunataj wasi ayllunkuman jina kaykuna karqanku: Libni, Simey ima. 18Coatqa 133 watata kawsarqa. Churinkunataj karqanku: Amirán, Isar, Hebrón, Uziel ima. 19Merarij churinkunataj karqanku: Mali, Musi ima. Chaykuna Levijpata wasi ayllun, listasqa kasqankuman jina karqanku.
20Amiranqa tian Jocabedwan casarakorqa,#6.20 Aswan qhepanejman Moisés kamacherqa ayllu masintin manaña casaranankuta. Lv 18.12-13. churinkunataj karqanku Aaronwan, Moiseswan ima. Amiranqa 137 watata kawsarqa.
21Isarpata churinkuna karqanku: Coré, Nefeg, Zicri ima.
22Uzielpata churinkunataj karqanku: Misael, Elzafán, Sitri ima.
23Aaronqa Elisabetwan casarakorqa. Payqa Nasonpata panan, Aminadabpata ususintaj karqa. Aaronqa warminpi tawa wawakunata rejserqa: Nadabta, Abiuta, Eleazarta, Itamarta ima.
24Coréj churinkuna karqanku: Asir, Elcana, Abiasaf, ima. Chaykuna Coréj wasi ayllun karqanku.
25Aaronpata ujnin kaj churin Eleazarqa Futielpata ususinwan casarakorqa, paypa churintaj Finés karqa. Paykuna Leví jatun ayllu ukhupi kurajkuna karqanku.
26Ñawpajpi listasqa karqanku, chay Aaronta, Moisestawan ima Tata Dios kamacherqa israelitakunata soldadokunata jina Egiptomanta orqhomunankuta. 27Moiseswan, Aaronwan ima kallarqankutaj, pikunachus Egiptopi kuraj kamachej faraonwan parlamorqanku israelitakunata orqhomunankupaj, chaykuna.
Diosqa Moisesta, Aarontawan wajyan
28Maypachachus Tata Dios Egiptopi Moiseswan parlarqa chaypacha, pay nerqa: 29Noqamin Tata Dios kani. Kunantaj qan rispa, Egiptopi kuraj kamachej faraonta niy, imatachus noqa nisqayki, chay tukuyta, nispa. 30Moisestajrí kuticherqa: Noqaqa mana sumajta parlayta atinichu. Imatataj noqata faraón uyariwanqari? nispa.
Currently Selected:
Éxodo 6: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
