Éxodo 40
40
Moisés Dioswan Tinkukuna Toldota sayachin
1Chantá Tata Dios Moisesta nerqa: 2Wata qallariy killapi, killa qallariy p'unchayta Dioswan Tinkukuna Toldota sayachinki. 3Chaymantaj kamachisqakuna qhelqasqayoj kashan, chay arcata churanki, chantá velowan qhataykunki. 4Chantataj Dioswan Tinkukuna Toldo ukhuman mesata, tukuy imantinta apaykuspa, maychus kananman churanki. Toldo ukhuman candelerota apaykullankitaj, chantá lamparakunata jap'ichinki. 5Jinallataj incienso q'oshñichina qorimanta altarta arcaj ñawpaqenman churanki. Chantá Dioswan Tinkukuna Toldo punkupi cortinata warkhunki. 6Chantaqa Dioswan Tinkukuna Toldoj ñawpaqenman uywa ñak'asqata q'olachinapaj altarta churallankitaj. 7Chaymantaqa Dioswan Tinkukuna Toldowan, altarwan kashan, chay chawpiman jatun ch'illamita churallankitaj. Jinaspataj chay jatun ch'illamiman yakuta junt'achinki. 8Chaymantataj toldoj pationta cortinawan muyuykuchinki, punkunmantaj uj cortinata warkhuykunki.
9Chantá Diospaj t'aqanapaj aceiteta jap'ispa, Dioswan Tinkukuna Toldota jawiykunki. Jinallataj chay ukhupi imachus kajtapis jawillankitaj. Ajinata chaypi tukuy ima kajta Diospaj t'aqanki. 10Jinallataj uywa ñak'asqata q'olachina altarta, tukuy imantawan jawina aceitewan jawiykunki. Ajinata altarta noqapaj t'aqanki, jinamantataj altarqa llimphu llimphumin kanqa. 11Jatun ch'illamitapis sayanantinta jawina aceitewan jawillankitaj. Ajinata Diospaj chay ch'illamita t'aqanki.
12Chaymantataj Aaronta, churinkunatawan ima Dioswan Tinkukuna Toldo punkuman pusanki, chaypitaj paykunata yakuwan mayllanki. 13Chantá Aaronta sumaj ruwasqa p'achawan p'achallichinki, aceitewantaj jawispa, sacerdotey kananpaj payta t'aqanki. 14Chaymantaqa churinkunatañataj qayllachimuspa, sumaj ruwasqa p'achawan p'achallichillankitaj. 15Jinaspataj, sacerdoteykuna kanankupaj aceitewan paykunata jawinki, imaynatachus tatankuta jawerqanki, ajinata. Aceitewan jawisqaykirayku paykuna, jinataj mirayninkuna wiñay wiñaynintinpaj sacerdoteykuna kanqanku, nispa.
16Moisesqa Tata Diospa kamachisqanman jina tukuy imata kikinta ruwarqa. 17Ajinaqa israelitakuna Egiptomanta llojsimusqankumanta iskay watanman, killa qallariy p'unchaypi Dioswan Tinkukuna Toldo sayachisqa karqa. 18Moisesqa Dioswan Tinkukuna Toldota sayacherqa. Chukukunata churararqa, tablakunata sayaricherqa, jinaspataj k'aspinkunata pasacherqa, chaymantataj sayantakunata sayacherqa. 19Chantá Moisesqa Tata Diospa kamachisqanman jina, Diospa tiyakunan kanan karqa, chay patanman toldota aysaspa, qhataykorqa.
20Chaymanta Moisesqa rumipi Diospa kamachisqan qhelqasqa karqa, chayta arcaman churaykorqa. Chantá arcaj ninrinkunamantaj k'aspita pasacherqa. Jinaspataj, kirpanawan arcata kirpaykorqa. 21Chantá Moisesqa Tata Dios kamachisqanman jina, arcata Dioswan Tinkukuna Toldoman apaykorqa. Velota warkhuykuspataj, chaywan arcata pakaykorqa. 22Chaymantataj mesata Dioswan Tinkukuna Toldoman apaykullarqataj, churarqataj Dioswan Tinkukuna Toldomanta wichaynejman, velomanta ñawpaqenman. 23Chay mesamantaj Tata Diospa ñawpaqenpi churana t'antata sumaj suk'asqata churarqa, Tata Dios payman kamachisqanman jina. 24Jinallataj Moisés Dioswan Tinkukuna Toldoman candelerota apaykullarqataj, churarqataj mesaj chimpanman, Dioswan Tinkukuna Toldoj urannejman. 25Chaymantataj Moisesqa Tata Dios kamachisqanman jina, Diospa ñawpaqenpi lamparakunata jap'ichillarqataj.
26Chantá Moisesqa Dioswan Tinkukuna Toldoman veloj ñawpaqenman, qorimanta ruwasqa altartapis churallarqataj. 27Chantá altar patapi k'achituta q'aparishaj inciensota q'oshñicherqa, Tata Dios payman kamachisqanman jina.
28Chaymantataj Moisesqa Dioswan Tinkukuna Toldo punkuman uj cortinata warkhuykorqa. 29Jinallataj Moisesqa Tata Dios kamachisqanman jina, Dioswan Tinkukuna Toldo punkuman uywa ñak'asqata q'olachina altarta churarqa. Chantá chay altar patapi uywa ñak'asqata, ch'aki mikhuy ofrendatawan Tata Diosman q'olacherqa.
30Chaymantaqa Dioswan Tinkukuna Toldowan, altarwan kashan, chaynejman jatun ch'illamita churaykorqa, chaymantaj mayllakunapaj yakuta junt'acherqa. 31Moiseswan, Aaronwan, chantá churinkuna ima chaymanta yakuta wisispa makinkuta, chakinkuta mayllakoj kanku. 32Tata Dios Moisesman kamachisqanman jina, sacerdotekuna Dioswan Tinkukuna Toldoman yaykunankupaj, jinallataj altarman qayllaykunankupaj chaypi mayllakoj kanku.
33Chaykunata ruwayta tukuytawan, Moisesqa Dioswan Tinkukuna Toldoj pationpa muyuyninta, altarpa muyuyninta ima cortinawan muyuykucherqa. Chaymantataj patioj punkuman uj cortinata churallarqataj. Ajinata Moisés chay tukuy imata ruwayta tukuycharqa.
Dioswan Tinkukuna Toldota phuyu p'ampaykun
(Nm 9.15-23)
34Chantá Dioswan Tinkukuna Toldota phuyu p'ampaykorqa, Tata Diospa jatun kayninpa lliphipiynintaj toldoman junt'aykorqa.#1 R 8.10-11; Is 6.4; Ez 43.4-5; Ap 15.8. 35Chayraykumin Moisesqa chayman mana yaykuyta aterqachu, imaraykuchus tukuyninta phuyu p'ampaykorqa. Tata Diospa jatun kayninpa lliphipiynintaj toldoman junt'aykorqa.
36Dioswan Tinkukuna Toldomanta phuyu oqharikojtintaj, israelitakuna tukuy imankuta oqharikuspa, purirej kanku. 37Mana phuyu oqharikojtintaj, israelitakuna puririnankupaj mana oqharikojchu kanku. Mayk'ajchus phuyu oqharikunanta suyaj kanku. 38P'unchayqa Tata Diospa phuyun Dioswan Tinkukuna Toldo patapi karqa, tutantaj nina k'anchay karqa. Ajinata israelitakunaqa tukuy puriyninkupi sapa p'unchay phuyuta, ninatawan rikorqanku.#Ex 13.21-22.
Currently Selected:
Éxodo 40: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
