Éxodo 39
39
Sacerdotekunapaj p'acha
(Ex 28.1-43)
1Tata Dios Moisesman kamachisqanman jina, Dioswan Tinkukuna Toldopi Aarón imachus ruwananta ruwananpaj p'achakunata ruwarqanku, anqa telamanta, puka panti telamanta, puka telamantawan.
2Besalelqa unkuta qorimanta ruwallarqataj, anqa telamanta, puka panti telamanta, puka telamanta, linomanta sumaj awasqa telamantawan. 3Qorita martillowan takaspa, sillp'ayacherqa, chaymantataj ñañu q'aytuta jina ruwarqa. Chantá qorimanta q'aytuwan ima munay pallayniyojta ruwarqa, anqa telapi, puka panti telapi, puka telapi, linomanta sumaj awasqa telapi ima. 4Chantá unkuman iskay watanata churarqa, chaykunataj puraj puntanwan watasqa karqa. 5Unkuta watanapaj chumpipis kikillantaj ruwasqa karqa, qorimanta, anqa telamanta, puka panti telamanta, puka telamanta, linomanta sumaj awasqa telamanta ima, Tata Dios Moisesman kamachisqanman jina.
6Chantá ónice nisqa rumita ch'eqospa, qorimanta jap'ichina pataman churararqanku. Chaymantaj t'illmispa Israelpa churinkunaj sutinkuta churarqanku. 7Chantá Besalelqa, Tata Dios Moisesman kamachisqanman jina, unkoj watanaman chay rumikunata k'askaykucherqa, Israelpa churinkuna yuyarisqa kanankupaj.
8Jinallataj pecherata unkuta jina sumaj k'achituta ruwallarqataj qorimanta, anqa telamanta, puka panti telamanta, puka telamanta, linomanta sumaj awasqa telamanta ima. 9Pecheraqa phatu karqa, sapa kantun chhikachajkama iskay chunka iskayniyoj centimetrokama karqa. 10Pecheramanqa lliphipirishaj rumikunata tawa sinruta churarqanku. Ñawpaj kaj sinrupi, sárdico rumi karqa, chaymanta topacio rumi, chaymantataj esmeralda rumi. 11Iskay kaj sinrupitaj rubí rumi, chaymanta zafiro rumi, chaymantataj diamante rumiwan ima karqa. 12Kinsa kaj sinrupitaj jacinto nisqa rumi, chaymanta ágata nisqa rumi, chaymantataj amatista nisqa rumiwan ima karqa. 13Tawa kaj sinrupitaj berilo rumi, ónice rumi, jaspe nisqa rumiwan ima karqa. Chay lliphipirishaj rumikunaqa qoriwan jap'ichisqa karqanku. 14Chay rumikunaqa chunka iskayniyoj karqanku, Israelpa churinkuna chunka iskayniyoj kasqanman jina. Sapa uj rumipi uj jatun aylloj sutin t'illmisqa karqa.
15Jinallataj pecherapaj sumaj qorimanta ñañu cadenata ruwallarqankutaj, chaytataj watanata jina simp'arqanku. 16Chaymantaqa qorimanta iskay jap'ichinata, chantá iskay ninrikunatawan ruwallarqankutaj. Chaytataj pecheraj patannejpi puraj kantunman chhitarqanku. 17Chantá qorimanta ñañu cadenata pecheraj ninrinman pasacherqanku. 18Jinallataj qorimanta ruwasqa cadenata iskaynin chhitasqaman jap'icherqanku, chantá unkoj ñawpaqenpi watananta jap'icherqanku. 19Chaymantaqa qorimanta iskay ninrikunata ruwaspa, chaykunata pecheraj ura kantunman, unkuwan tinkuypi churarqanku. 20Qorimanta iskay ninritawan ruwaspataj, unkoj ñawpaqenpi watananman churarqanku, siraynin chaynejman, unkoj chumpinmanta patanpi. 21Jinaspataj, pecheraj ninrinta, unkoj ninrintawan anqa q'aytuwan wataykorqanku, pechera unkoj chumpinmanta patanejpi kananpaj, pechera ama unkumanta t'aqasqa kananpaj. Ajinata Tata Dios Moisesman kamachisqanman jina ruwarqanku.
22Jinallataj unkoj patanpi kaj poncho jina qhatanata, anqa telamanta ruwallarqankutaj. 23Chayqa chawpinpi khallayoj karqa. Khallanqa qara chaleco jina sumaj q'empisqa karqa, ama llik'ikunanpajtaj sirasqa karqa. 24Poncho jina qhatanaj muyuyninpitaj granadaman rijch'akojta jina ruwaspa churarqanku, anqa q'aytumanta, puka q'aytumanta, puka panti q'aytumanta, chantá sumaj t'ullkusqa linomanta ima. 25Chaymantaqa sumaj qorimanta campanillakunata ruwallarqankutaj, chaykunatataj qhatanaj muyuyninman, q'aytumanta ruwasqa granadakunatawan chawpinchasqata churarqanku. 26Tata Dios Moisesman kamachisqanman jina, poncho jina qhatanaj kantunman uj campanillata, chantá uj granadata ima churarqanku. Ajinata poncho jina qhatanaj tukuy muyuyninman churarqanku. Aaronpa p'achan ajina karqa Tata Diospa ñawpaqenpi imachus ruwananta ruwayta atinanpaj.
27Jinallataj Aaronpaj, chantá churinkunapajwan ima sumajnin kaj linomanta p'achata ruwapullarqankutaj. 28Kikillantataj mana ninriyoj chhoqo ch'uluta, uma watakunata, chantá calzoncillotapis sumajnin kaj linomanta ruwarqanku. 29Chumpitapis sumajnin kaj t'ullkusqa linomanta, anqa telamanta, puka panti telamanta, puka telamanta ima ruwarqanku, Tata Dios Moisesman kamachisqanman jina.
30Jinallataj sumaj qorimanta sillp'a tablitata jina ruwarqanku. Chay qorimanta tablitaqa kuraj kaj sacerdote Diospaj t'aqasqa kasqanmanta señal karqa. Chaymantaj sellopi jina qhelqasqata churarqanku: “Tata Diospaj T'aqasqamin”, nispa. 31Jinaspataj, qorimanta tablitaman anqa q'aytuta churaspa, uma watanaj patanman churarqanku. Ajinata Tata Dios Moisesman kamachisqanman jina ruwarqanku.
Dioswan Tinkukuna Toldota ruwayta tukunku
(Ex 35.10-19)
32Dioswan Tinkukuna Toldota ajinata ruwayta tukorqanku. Israelitakuna Dioswan Tinkukuna Toldota ruwaspa, Tata Dios Moisesman kamachisqanman jina kikinta ruwarqanku. 33Dioswan Tinkukuna Toldota, chantá tukuy imanta Moisesman apamorqanku: Jap'ichinata, tablakunata, k'aspikunata, sayantakunata, chukukunata, 34qhatanapaj pukaman tiñisqa mocho qarata, tejonmanta qarata, arcata qhatanapaj velotawan. 35Apamullarqankutaj Diospa kamachisqanwan kaj arcata, k'aspinkunata, arcaj kirpanantawan. 36Apamullarqankutaj mesata, tukuy imantinta, chantá Diospa ñawpaqenpi churana t'antatawan. 37Apamullarqankutaj sumaj qorimanta ruwasqa candelerota, lamparakunata tukuy imantinta, k'anchanapaj aceitetawan ima. 38Apamullarqankutaj, qorimanta ruwasqa altarta, jawina aceiteta, k'achituta q'apashaj inciensota, Dioswan Tinkukuna Toldo punkuman churana cortinatawan. 39Apamullarqankutaj broncemanta ruwasqa altarta, rejillantinta, iskaynin k'aspinta, tukuy imantintawan. Apamullarqankutaj jatun ch'illamita, churanapaj chukuntawan. 40Apamullarqankutaj patiota jark'achinapaj cortinakunata, sayantakunata, chukukunata, patioj punkunpi churanapaj cortinata, waskhanta, estacankunata, Dioswan Tinkukuna Toldopi imachus ruwanata ruwanapaj, chaykunatawan ima. 41Apamullarqankutaj Dioswan Tinkukuna Toldopi ruwajkunapaj p'achakunatapis: Kuraj kaj sacerdote Aarón Diospaj t'aqasqa kasqanmanta p'achakunata, jinataj churinkuna sacerdote jina churakunanku p'achatawan.
42Israelitakunaqa tukuy imata ruwarqanku Tata Dios Moisesman kamachisqanman jina. 43Moisestaj tukuy chaykunata qhawaspa, rikorqa Tata Diospa kamachisqanman jina ruwasqankuta. Chantá paykunata samincharqa.
Currently Selected:
Éxodo 39: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
