Éxodo 29
29
Sacerdotekuna Diospaj t'aqasqa
(Lv 8.1-36)
1Tata Dios ujtawan Moisesta nillarqataj: Aaronwan, churinkunawan ima sacerdoteykuna kanankupaj t'aqaspa, kaykunata ruwanki: Mana iman imanasqa uj torillota, iskay corderotawan ima apamunki. 2Chantá sumaj trigo jak'umanta mana levadurayoj t'antatawan, olivo aceitewan puñasqa mana levadurayoj tortillatawan ruwanki. Jinallataj aceitewan jawisqa, mana levadurayoj tortillata ruwallankitaj. 3Chantá chaykunata juch'uy canastaman churaykuspa, torillotawan, iskay corderotawan khuska jaywanawaykipaj apanki.
4Chaymantataj Aaronta, churinkunatawan ima Dioswan Tinkukuna Toldo punkuman pusanki, chaypitaj paykunata yakuwan mayllanki. 5Chantá kuraj kaj sacerdotekunaj p'achankuta jap'ispa, Aaronman churaykunki. Ñawpajta jatun p'achata, patanmantaj poncho jina qhatanata, patanmantaj unkuta, chaypaj patanmantaj pecherata churaykunki. Chaymantataj unkoj kantunpi ruwasqa chumpiwan chumpiykuchinki. 6Chaymantataj umanman chhoqo ch'uluta churanki, chaypa patanmantaj “Diospaj t'aqasqa”, nispa nishaj sillp'a tablitata churanki. 7Chantá jawina aceiteta umanman jich'aykuspa, Aaronta jawinki.
8Chaymantaqa churinkunatañataj qayllamunankuta kamachinki, chantá paykunata p'achallichinki. 9Chaymantá Aaronta, jinallataj churinkunatapis chumpiwan chumpinki, jinaspataj sapa ujman ch'uluta churaranki. Ajinamanta paykunaqa kamachisqaman jina wiñaypaj sacerdoteykuna kanqanku. Ajinata Aaronta, churinkunatawan ima wiñaypaj sacerdoteykuna kanankupaj t'aqanki.
10Chaymantaqa Dioswan Tinkukuna Toldo punkuman torillota aysanki, chaypitaj Aarón, churinkunawan ima torilloj umanman makinkuta churanqanku.#29.10 Sacerdotekuna ñawpajta paykunaraykuraj Diosman uywata ñak'aspa, jaywananku karqa. Uywaj umanman makinkuta churaspa, niyta munarqanku uywaqa paykunaj cuentankumanta wañunanta. 11Chaymantataj Dioswan Tinkukuna Toldo punkupi, Tata Diospa ñawpaqenpi chay torillota ñak'anki. 12Chantá torilloj yawarninta jap'ispa, ruk'anaykiwan altarpi wajrakunata jawinki. Puchoj yawartataj altar k'uchuman jich'anki. 13Chantá ch'unchulamanta, k'iwichamanta, lurunkunamantawan ima wiranta orqhospa, altarpi q'olachinki. 14Torilloj aychanta, qaranta, wanuntawan imataj, jaramanta jawaman apaspa, chaypi ruphachinki. Chaymin kanqa juchata pampachanapaj q'olachispa jaywanaqa.
15Chaymantaqa corderokunamanta ujninta aysamunki. Chantá Aaronwan, churinkunawan ima corderoj umanman makinkuta churallanqankutaj. 16Chantá corderota ñak'aspa, yawarninwan altarta, chantá altarpa muyuyninta ima ch'ajchunki. 17Chaymantataj chhikan chhikanta corderoj aychanta khuchunki. Chantá ch'unchulanta, piernantawan ima mayllaspa, umantawan khuska aycha pataman churanki. 18Jinaytawantaj, tukuy corderota altar patapi ruphachinki. Chayta q'olachispa, Tata Diosman jaywanki, sumajta q'aparisqantaj Tata Diospa sonqonman chayanqa.#29.18 Sumajta q'aparishaj: Niyta munan Dios kusisqa jap'ikusqanta uywa ñak'asqa q'olachisqata, chantá jaywasqankuta ima. Gn 8.21; Ef 5.2; Flp 4.18.
19Chaymantaqa ujnin kaj corderotañataj aysamunki. Chantá Aaronwan, churinkunawan ima ujtawan corderoj umanman makinkuta churallanqankutaj. 20Chantá chay corderota ñak'aspa, uj chhika yawarta jap'inki. Chaywantaj Aaronpata paña ninrinpa uranta jawiykunki, jinallataj churinkunaj paña ninrinkoj uranta jawiykullankitaj. Jawillankitaj paña makinkoj machu ruk'ananta, paña chakinkoj machu ruk'anantawan ima.#29.20 Yawarwan uj runaj makinpa, chakinpa machu ruk'ananta jawina, niyta munarqa Diospaj t'aqasqa kasqanta. Puchoj yawarwantaj altarpa tukuy muyuyninta ch'ajchunki. 21Altar patapi kaj yawarwan, jinataj jawina aceitewan Aaronta, chantá p'achantapis ch'ajchullankitaj. Jinallataj churinkunata, p'achankutapis ch'ajchullankitaj. Ajinamanta Aarón, churinkuna ima, jinallataj p'achankupis Diospaj t'aqasqa kanqanku.
22Chaymantataj corderoj wiranta, chupanmanta, ch'unchulanmanta, k'iwichanmanta, chantá iskaynin lurunninmanta orqhonki. Chantá paña piernantawan orqhollankitaj, imajtinchus chay corderoqa sacerdotekunata Diospaj t'aqanapaj karqa. 23Tata Diospa ñawpaqenpi kashaj canastapi mana levadurayoj ruwasqa t'antamanta, uj t'antata oqharinki. Oqharillankitaj aceiteyoj puñasqamanta ruwasqa tortillata, aceitewan jawisqa tortillatapis. 24Chantá tukuyninta Aaronpa makinman, jinallataj churinkunaj makinman ima churanki. Paykunataj ikhaspa, Tata Diosman jaywanqanku. 25Chantataj makinkumanta chay t'antakunata jap'ispa, q'olachinapaj aychatawan khuska altar patapi ruphachinki, noqapaj ima munayta q'aparishaj jaywana kananpaj. Chayqa noqapaj q'olachisqa jaywana kanqa. 26Aaronta kuraj kaj sacerdotey kananpaj t'aqashaspa, corderoj qhasqonta ikhaspa, noqaman jaywawanki. Chaytaj qanpaj kanqa.
27Aaronwan, churinkunawan ima Tata Diospaj t'aqasqa kanankupaj, corderoj qhasqonta, piernantawan ima ikhasqa jaywawasqaykita t'aqanki. Chaykunataj Aaronpaj, churinkunapajwan kanqa. 28Tukuy chaykunataqa Aaronman, churinkunamanwan ima qonki. Kayqa israelitakunapaj wiñaypaj kamachisqa kanqa. Israelitakuna Tata Diosman allinyakuna jaywanata jaywaspa, corderoj qhasqonta, piernantawan sacerdotekunaman qonqanku.
29Aarón wañupusqanmanta qhepaman, sacerdote jina churakunan p'achakunaqa churinkunapaj kanqa. Paykuna chay p'achata churakonqanku, aceitewan jawisqa, chantá sacerdote t'aqasqa kanankupaj. 30Aarón wañupojtin, mayqen churinpis cuentanmanta kuraj kaj sacerdote jina sayanqa, payqa chay sacerdote p'achata churakonqa. Chantá Dioswan Tinkukuna Toldoman yaykuspa, qanchis p'unchayta Diospaj T'aqasqa Cheqapi qhepakonqa kuraj kaj sacerdotej ruwananta ruwaspa.
31Chantá sacerdote kanankupaj t'aqaspa jaywasqayki corderoj aychanta Diospaj T'aqasqa Cheqapi chayachinki. 32Chaymantataj Aaronwan, churinkunawan ima Dioswan Tinkukuna Toldo punkupi cordero aychata, canastamanta t'antatawan mikhonqanku. 33Sacerdote kanankupaj t'aqasqa karqanku, chantá juchanku pampachasqa kananpaj Diosman jaywasqa karqa, chay corderoj aychanta canastamanta t'antawan mikhonqanku. Chaykunataqa sacerdotekunalla mikhonqanku, wajkunarí mana, Diospaj t'aqasqa kasqanrayku. 34Sichus Diosman jaywasqa aychamanta, t'antamantawan ima puchunman chayqa, ruphachinki. Chay puchojta mana pipis mikhunanchu tiyan, imaraykuchus chayqa Diospaj t'aqasqamin.
35Imaynatachus kamachisusqayman jina, ajinata Aaronwan, churinkunawan ima ruwanki. Sacerdoteykuna kanankupaj t'aqaspa, qanchis p'unchayta chay tukuy imata ruwanki. 36Chantaqa jucha pampachasqa kananpaj, uj torillota ñak'aspa, sapa p'unchay q'olachispa Tata Diosman jaywanki. Chantá altarta llimphuchanki jucha pampachasqa kananpaj, jinataj altarta Diospaj t'aqanki Diosman jaywanata jaywaspa chantá aceitewan jawispa ima. 37Qanchis p'unchayta altarpi, jucha pampachasqa kananpaj, uywa ñak'asqata Diosman jaywanki. Ajinata ruwaspa altarta Diospaj t'aqanki. Altartaj may llimphupaj qhawasqa kanqa. Imallapis altarman chayaykojqa Diospaj t'aqasqa kanqa.
Sapa p'unchay jaywanamanta
(Nm 28.1-8)
38Sapa p'unchay mana qonqaspa, uj watayoj iskay corderota altarpi Diosman jaywanki. 39Ujnin kajta tutamanta, ujnin kajtataj inti yaykuyta Diosman jaywanki. 40Ñawpaj kaj corderotawan khuska, trigo jak'umanta sumaj kajta iskay kilota jina, uj litro olivo aceitewan chajrusqata jaywallankitaj. Chaymantaj uj litro vinota ofrendata jina ch'ajchuykunki. 41Chay ujnin kaj corderotataj inti yaykuykuyta jaywanki, imaynatachus tutamanta jak'utawan, vinotawan ima jaywarqanki, ajinallatataj. Chayqa ima munayta q'apashaj Tata Diospa sonqonman chayaj kanqa.
42Ajina noqaj sutiypi q'olachisqa jaywanataqa wawaykichejkuna wiñaypaj wiñayninkama ñawpaqeypi jaywallanqankupuni. Chaytaqa Dioswan Tinkukuna Toldo punkupi, maypichus noqa qanwan parlanaypaj tinkusaj, chaypi jaywanqanku. 43Chaypi israelitakunawan tantakullasajtaj. Chay cheqataj, chaypi noqa kasqayrayku, noqajta kananpaj t'aqasqa kanqa. 44Jinallataj Dioswan Tinkukuna Toldota, altarta ima noqapaj t'aqasaj. Chantá Aaronta, churinkunatawan ima sacerdoteykuna kanankupaj t'aqallasajtaj. 45Israelitakuna ukhupi noqa tiyakusaj, Diosninkutaj kasaj. 46Ajinamanta paykunaqa noqamin Tata Diosninku kasqayta yachanqanku. Noqa paykunaj chawpinkupi tiyakunaypaj Egiptomanta orqhomorqani. Noqa, Tata Diosmin Diosninku kani.
Currently Selected:
Éxodo 29: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
