Éxodo 30
30
Inciensota q'oshñichinapaj altar
(Ex 37.25-28)
1Jinallataj inciensota q'oshñichinapaj, acacia maderamanta uj altarta ruwallankitaj. 2Altarpa tawantin ladonqa chhikachajkama kanqa, sapa ladontaj tawa chunka phishqayoj centimetroyoj kanqa, sayayninmantajrí jisq'on chunka centimetroyoj kanqa. Sapa esquinapi wajra jina ruwasqaqa altarwan ujlla kanqa. 3Chay altartataj patanta, urantawan ima sumaj qoriwan lluch'iykunki, jinallataj kirpananta, wajrankunata ima qorillawantaj lluch'inki. Kantuntataj qorimanta jark'achata jina ruwaspa, muyuykuchinki. 4Jark'acha jina uranmantaj qorimanta ruwasqa ninrikunata churanki. Sapa esquinaman iskaytakama churanki, k'aspiwan chayninta pasachispa wantunapaj. 5K'aspitaqa acacia maderamanta ruwanki, chantá qoriwan lluch'iykunki. 6Kay altartaqa Diospa trato ruwasqan arcata, chantá kirpanantawan pakashan, chay veloj ñawpaqenman churanki. Chaypimin noqa qanwan tinkukusaj.
7Aaronqa altar patapi ima munayta q'apashaj inciensota q'oshñichenqa. Chaytaqa sapa paqarin lamparakunata jap'ichinapaj wakichishaspa ruwanqa. 8Jinallataj Aaronqa inti yaykuykuyta, lamparakunata jap'ichishaspa, inciensota q'oshñichillanqataj. Ajinata Aarón, jinataj churinkukunapis Tata Diospa ñawpaqenpi, wiñaypaj ruwallanqanku. 9Chay altar patapeqa amapuni waj jina inciensota q'oshñichinkichejchu, ni uywa ñak'asqa q'olachinata, ni ch'aki mikhuy jaywanata, nillataj vinota jich'aspapis jaywankichejchu. 10Aaronqa watapi uj kutita#30.10 Watapi uj kutita: Ajinata nispa, jucha pampachasqa kananta tarina p'unchaymanta parlan. Jucha pampachasqa kananpaj watapi uj kutita uywata ñak'aspa, Diosman jaywananku karqa. Lv 16. altarpa wajrankunata, uywa ñak'asqaj yawarninwan jawenqa. Ajinata ruwanqa jucha pampachasqa kananpaj. Chaytaqa sapa watapi uj kutillata jucha pampachasqa kananpaj ruwanqa. Chay altartaj Tata Diospaj may llimphumin kanqa, nispa. Ajinata Tata Dios nerqa.
Diosman paganamanta
11Tata Dios Moiseswan parlaspa, nillarqataj: 12Maypachachus israelitakunata yupanki chaypacha, ama wañunankupaj sapa uj qhari Tata Diosman qolqeta paganqanku, yupasqa kashajtinku, ama ima onqoypis paykunaman chayananpaj. 13Sapa yupasqa kajkuna phishqa gramo qolqe metalta Tata Diosman paganqanku, Dioswan Tinkukuna Toldopi precio churasqa kasqanman jina. Chayqa Tata Diospaj ofrenda kanqa. 14Yupachikojkunamanta iskay chunka watayojmanta pataman Tata Diosman chay ofrendata qonqanku. 15Sapa uj qhari ama wañunankupaj Tata Diosman qolqe metalta paganqa. Qhapajkunaqa mana astawanchu, nitaj pisi tiyapuyniyojkunapis aswan pisitachu paganqanku. 16Israelitakuna ama wañunankupaj, sapa uj qhari pagasqanku qolqe metalta qan jap'inki. Chantá Dioswan Tinkukuna Toldopi Diosta yupaychanapaj qonki. Chay jinapi Tata Dios yuyarikonqa israelitakuna ama wañunankupaj pagasqankuta, nispa.
Broncemanta ch'illami
(Ex 38.8)
17Ujtawan Tata Dios Moiseswan parlaspa, nillarqataj: 18Ruwallankitaj mayllakunapaj broncemanta uj ch'illamita, sayananpis broncellamantataj kanqa. Ruwasqayki ch'illamitaqa altarwan, Dioswan Tinkukuna Toldowan kashan, chay chawpiman churanki. Chantá ch'illamiman yakuta jich'anki.#Ex 38.8. 19Chay yakuwan Aaronpis, churinkunapis makinkuta, chakinkutawan mayllakonqanku. 20Dioswan Tinkukuna Toldoman yaykunankupaj mayllakonqanku. Jinallataj q'olachispa jaywanata Tata Diosman jaywanankupaj, altarman qayllashaspa, mayllakullanqankutaj. Ajinata ruwaspa, mana wañonqankuchu. 21Ama wañunankupaj makinkuta, chakinkutawan mayllakonqanku. Kay kamachisqayqa Aaronpaj, churinkunapaj, chantá mirayninkupaj ima wiñaypaj wiñayninkama kanqa, nispa.
Diospaj t'aqanapaj aceite
(Ex 37.29)
22Tata Dios ujtawan Moisesta nillarqataj: 23Sumaj k'achituta q'apaj qhorakunata tantay: Sojta kilo sumaj mirrata, kinsa kilo canelata, kinsa kilo jina sumaj k'achituta q'apashaj cañata, 24sojta kilo acaciata, kinsa litro khuskanniyoj olivo aceitetawan. Kay tukuyta Dioswan Tinkukuna Toldopi tupunaman jina tupuspa tantanki. 25Chaykunamanta Diospaj t'aqanapaj jawina aceiteta ruwanki, imaynatachus sumaj q'apashaj jawinata ruwajkuna ruwanku, ajinata. Chaymin Diospaj t'aqanapaj aceite kanqa. 26Chay aceitewan Dioswan Tinkukuna Toldota jawinki, jinallataj Diospa trato ruwasqan arcatapis jawillankitaj. 27Jawillankitaj mesata tukuy imantinta, candelerota tukuy imantinta, inciensota q'oshñichina altartapis. 28Jawillankitaj q'olachina altarta tukuy imantinta, mayllakuna ch'illamita, maypichus sayasqa kashan, chaynintinta. 29Ajinata chaykunata Tata Diospaj t'aqanki. Tukuynintaj may llimphu nisqa Tata Diospaj t'aqasqa kanqa. Tukuy imachus chayman chayaykojqa Tata Diospaj t'aqasqallataj kanqa.
30Chaymantaqa chay aceitewan Aaronta, churinkunatawan ima jawillankitaj, noqapaj t'aqasqa sacerdoteykuna kanankupaj. 31Chaymantataj israelitakunata ninki: Kaymin wiñaypaj Diospaj t'aqanapaj jawina aceite kanqa. 32Ama kay aceitewanqa pi runallatapis jawinkichejchu, nitaj kayman rijch'akojta waj aceiteta ruwankichejchu. Kay aceite Diospaj t'aqanapaj kasqanrayku, Tata Diospaj t'aqasqata jina qhawankichej. 33Pillapis kay aceiteman rijch'akojta ruwajqa, chayrí kay aceitewan pitapis jawejqa israelitakuna ukhumanta wijch'usqa kanqa, nispa.
Inciensota ruwanamanta
(Ex 37.29)
34Chantá Tata Dios Moisesta nillarqataj: Sumaj k'achituta q'apashaj imakunata tantay: Mirra sutiyoj sach'aj waqayninta, yakupi kawsaj ch'uroj waqayninta, gálbano sach'aj waqayninta, chantá sumajnin kaj inciensotawan ima. Sapa ujta chhikakama tantanki. 35Chaykunawan sumaj k'achituta q'apashaj inciensota ruwanki, sumaj kachinchasqata, llimphituta, Diospaj t'aqasqa kananpaj jina. Chaytaqa imaynatachus sumaj q'apashaj jawinata ruwayta yachaj ruwan, ajinata ruwanki. 36Wakinta sumaj ñut'ituta kutanki. Chantá Dioswan Tinkukuna Toldopi, Diospa trato ruwasqan arcaj ñawpaqenman chayta churanki, maypichus noqa, qanwan tinkukusaj, chayman. Chay inciensotaqa Tata Diospaj t'aqasqata jina qhawankichej. 37Kay inciensoman rijch'akojta jinaqa qankunapaj amapuni ruwankichejchu, imaraykuchus kay inciensoqa Tata Diospaj t'aqasqamin. 38Sichus mayqellanpis kay inciensota jina q'aparichikunanpaj ruwanqa chayqa, israelitakuna ukhumanta wijch'usqa kanqa, nispa.#Ex 37.29.
Currently Selected:
Éxodo 30: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
