Éxodo 27
27
Broncemanta altar
(Ex 38.1-7)
1Ruwallankitaj acaciamanta uj altarta, chay altarqa tawa esquinayoj kanqa. Altarqa sapa ladoman iskay metro cuartayoj kanqa, sayayninmantaj uj metro cuartayoj. 2Altarpa tawantin esquinapi mut'u wajrata jina ruwallankitaj, chay altartataj tukuyninta broncewan lluch'iykunki.#27.2 Wajra: Altarpi tawantin k'uchu jawaman llojsisqa kasqanrayku, wajraman rijch'asqa karqa. Wajra niyta munan: Kallpa. Dt 33.17. 3Altarpi imachus ruwanata ruwanapaj imakunataqa, tukuyninta broncemanta ruwanki: Ushpha oqharinata, palakunata, jatuchaj qerukunata, trinchekunata, nina k'ajata apaykachanatawan. 4Chantá broncemanta uj rejillata ruwallankitaj. Chay rejillaj tawantin esquinamantaj broncemanta ruwasqa ninrita churanki. 5Rejillataqa altarpa uranman churanki, altarpa khuskanninpi jina kananpaj. 6Jinallataj altarta wantunapaj, acaciamanta k'aspikunata ruwallankitaj, jinaspataj broncewan lluch'iykunki. 7Chantá chay k'aspikunataqa altarpa ninrinnejta pasachinki, altarpa sapa kantunpi kananpaj, chaymanta oqharispa, altarta wantunapaj. 8Altartaqa maderamanta ruwanki, ukhuntaj soqolla kanqa. Imaynatachus orqopi rikucherqayki, kikisitunta ruwanki.
Dioswan Tinkukuna Toldoj pation
(Ex 38.9-20)
9Dioswan Tinkukuna Toldopaj patiota ruwallankitaj. Uray kantunpi t'ullkusqa linomanta ruwasqa cortinayoj kanqa. Cortinaqa sayt'unman tawa chunka phishqayoj metro kanqa. 10Iskay chunka k'aspikunaqa, broncemanta ruwasqa iskay chunka chuku patapi sayachisqa kanqa. Ganchonkuna, ninrinkuna imaqa qolqe metalmanta ruwasqa kanqanku. 11Jinallataj pata kaj ladonpi cortinapis tawa chunka phishqayoj metro kanqa. Broncemanta ruwasqa iskay chunka chuku patapitaj, iskay chunka k'aspikuna sayachisqa kanqa. K'aspikunaj ganchon, ninrin imaqa qolqe metalmanta ruwasqa kanqa. 12Inti yaykuynejman patioqa iskay chunka iskayniyoj metro khuskanniyoj kanqa, cortinapis ajinallataj kanqa. K'aspikunaqa chunka kanqa, jinallataj k'aspi sayananpaj chukukunapis chunkallataj kanqa. 13Inti llojsimuynejman patioj kinrayninpi cortina kallanqataj iskay chunka iskayniyoj metro khuskanniyoj. 14Punkumanta uj ladonman cortinaqa qanchis metro khuskanniyoj kanqa, kinsa k'aspiyoj, kinsa chukuyoj ima. 15Uj ladonpi cortinapis kikillantaj kanqa, kinsa k'aspiyoj, kinsa chukuyoj ima. 16Patioman yaykuna punkupi cortinaqa jisq'on metroyoj kanqa. Anqamanta, puka pantimanta, pukamanta, t'ullkusqa linomanta ruwasqa kanqa. Chay cortinaqa ima munay pallayniyoj awasqa kanqa. Chay jawa tawa k'aspiyoj, tawa chukuyoj ima kallanqataj. 17Patiota muyurej tukuy k'aspeqa qolqe metalmanta ninriyoj, qolqe metalmanta ganchoyoj, chantá broncemanta chukuyoj ima kanqanku. 18Patioqa sayt'unman tawa chunka phishqayoj metro kanqa, kinrayninmantaj iskay chunka iskayniyoj metro khuskanniyoj kanqa, ujnin ladonpis jinallataj kanqa. Sayayninmanqa iskay metro cuartayoj kanqa. Cortinaqa t'ullkusqa linomantapuni kanqa, chukuntaj broncemanta ruwasqa. 19Dioswan Tinkukuna Toldopi Diosta yupaychanapaj tukuy imaqa broncellamantapuni kanqa. Jinallataj tukuynin estaca, patiopi estacapis broncemanta ruwasqallataj kanqa.
Lamparakunata k'anchachinapaj aceite
(Lv 24.1-4)
20Israelitakunata kamachiy lamparakunata k'anchachinapaj olivomanta ruwasqa sumaj aceiteta apamunankuta. Lamparakunaqa tuta p'unchay k'anchanan tiyan. 21Aaronwan, churinkunawan ima lamparakunata allinchanqanku. Chantá lamparakunata churanqanku Dioswan Tinkukuna Toldopi, arcaj ñawpaqenpi kashan, chay velomanta jawaman, noqaj ñawpaqeypi tuta p'unchay k'anchananpaj. Kay kamachisqayqa israelitakunapaj, mirayninkupajwan ima wiñaypaj kanqa.
Currently Selected:
Éxodo 27: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
