Éxodo 26
26
Dioswan Tinkukuna Toldo
(Ex 36.8-38)
1Tata Dios nillarqataj: Dioswan Tinkukuna Toldotaqa linomanta sumaj awasqa, chunka cortinayojta ruwanki. Chay cortinaj colornintaj kanqa, anqa, puka, puka panti ima kanqa. Cortinata awashaspa k'achanchananpaj, iskay querubín pallayniyojta awanki. 2Tukuynin cortinakunaqa uj rejlla kanqanku: Sayt'unmanqa chunka iskayniyoj metro khuskanniyoj kanqa, kinrayninmantaj iskay metro kanqa. 3Phishqa cortinakunataqa ujllaman siraykunki, jinallataj chay ujnin phishqa kaj cortinakunatapis ujllaman siraykullankitaj. 4Ñawpaj kaj sirasqayki cortinaj puntanmanqa anqa q'aytumanta ninrikunata churanki, jinallataj iskay kaj k'askachisqaykej puntanpipis. 5Ñawpaj kaj sirasqaykej puntanpeqa phishqa chunka ninrikunata ruwanki, qhepan kajpipis kikillantataj, jinamanta ninripura tinkunankupaj. 6Ruwallankitaj qorimanta phishqa chunka ganchokunata, sirasqayki purajmanta t'inkisqa kananpaj, jinamanta Dioswan Tinkukuna Toldo ujlla sayarinanpaj.
7Chaymantaqa Dioswan Tinkukuna Toldota qhatanapaj cabra millmamanta chunka ujniyoj bayetata awallankitaj. 8Tukuynin bayetaqa chhikachajkama kanqanku: Sayt'unman chunka kinsayoj metro khuskanniyoj kanqa, kinrayninmantaj iskay metro kanqa. 9Phishqa bayetakunataqa ujllaman t'inkiykunki. Chaymanta wajtataj sojta bayetakunata ujllaman t'inkiykullankitaj. Sojta kaj bayetataqa Dioswan Tinkukuna Toldoj ñawpaqenpi uraman q'empiykunki. 10Ñawpaj kaj t'inkisqayki cortinaj kantunpi phishqa chunka ninrita ruwanki. Jinallatataj iskay kaj t'inkisqayki cortinaj kantunpipis ruwanki. 11Chaymanta ruwallankitaj broncemanta phishqa chunka ganchokunata. Chantá chay cortinaj ninrikunaman chhitaranki, ajinamanta toldoqa ujlla kananpaj. 12Toldoj cortinankuna kurajyajtaqa khuskanta Dioswan Tinkukuna Toldoj wasanman warkhuykunki. 13Cortinamanta sapa puntanman phishqa chunka centímetro puchojqa Dioswan Tinkukuna Toldota puraj ladonmanta qhatanqa.
14Toldota qhatanaykipaj cordero qarata pukaman tiñispa, uj qhatanata ruwallankitaj. Chaypaj pataman qhatanaykipajtaj waj animalkunaj sumaj kaj qaranmanta uj qhatanatawan ruwallankitaj. 15Jinallataj Dioswan Tinkukuna Toldota sayachinaykipajqa acacia maderamanta tablakunata ruwanki, chaytataj cheqanta sayachinki. 16Sapa tabla sayt'unman tawa metro khuskanniyoj kanqa, kinrayninmantaj sojta chunka phishqayoj centímetro kanqa. 17Sapa tablaqa purajmanta tarukiyasqa kanqa, chaywan t'inkinasqa kananpaj. Ajinata Dioswan Tinkukuna Toldopaj sapa tablata ruwanki. 18Toldopaj tablakunata ruwaspaqa, uranejpaj iskay chunka tablakunata ruwanki. 19Iskay chunka tablakunapaj, qolqe metalmanta tawa chunka chukuta ruwanki. Sapa tablapaj iskay chuku kanqa, jinataj sapa tablaj tarukun yaykunanpaj jina jusk'uyoj kanqa. 20Jinallataj toldomanta patanej kaj ladonpaj, iskay chunka tablakunata ruwallankitaj, 21qolqe metalmanta tawa chunka chukutawan. Iskay chukutataj uj tablaj uranpaj ruwanki. 22Toldoj qhepanman sojta tablakunata churanki, chayqa Dioswan Tinkukuna Toldomanta inti yaykuynejpi kashan. 23Dioswan Tinkukuna Toldoj qhepan kaj esquinanpaj iskay tablakunatawan ruwallankitaj. 24Chay tablakunaqa uramantapacha, jinallataj patamantapis, ñawpaj kaj ganchowan t'inkinasqa kanqa. Qhepannejpi, iskaynin esquinapipis jinallataj kanqa. 25Tukuyninpi pusaj tabla kanqa. Qolqe metalmanta ruwasqa, chunka sojtayoj chukupi kanqa. Iskay chuku uj tablaj uranpi kanqa.
26Chaymantaqa acacia maderamanta phishqa k'aspikunata ruwallankitaj, Dioswan Tinkukuna Toldomanta uj lado tablakunapaj. 27Jinallataj phishqa k'aspikunata ruwanki uj ladon tablakunapaj, phishqatataj qhepannejpaj, inti llojsimuynejta qhawarisqa kashan, chaypaj. 28Chawpita rej k'aspeqa tablakunaj chawpinta, uj kantunmanta uj kantunkama llojsenqa. 29Chantá tablakunataqa tukuyninta qoriwan lluch'inki. Jinallataj qorimanta ninrikunata ruwallankitaj, chay ninrikunanejta k'aspikunata pasachinaykipaj. K'aspikunatapis qorillawantaj lluch'iykunki. 30Dioswan Tinkukuna Toldotaqa, imaynatachus kay orqopi rikuchiyki, kikinta ruwanki.
31Jinallataj t'ullkusqa linomanta uj velota awanki, colornintaj anqa, puka, puka panti ima kanqa. Chay velotataj iskay querubinkunaman rijch'asqa pallayniyojta awanki. 32Chay velota acacia maderamanta ruwasqa tawa sayantaman warkhuykunki. Chay sayantakunataj qoriwan lluch'isqa kanan tiyan. Sayantakunataqa qolqe metalmanta ruwasqa tawa chuku patapi sayachinki. 33Velotaqa ganchokunaj uranman warkhunki. Veloj wasanmantaj Diospa kamachisqan qhelqawan kashan, chay arcata churanki. Jinamanta veloqa “Diospaj T'aqasqa Cheqata”, “Diosllapaj T'aqasqa Cheqamanta” t'aqanqa.#Heb 6.19; 9.3-5. 34Chaymantataj Diosllapaj T'aqasqa Cheqapi Arcaj kirpananta churanki. 35Mesatataj velomanta jawaman churanki, Dioswan Tinkukuna Toldoj pata ladonnejman. Candelerotatajrí Dioswan Tinkukuna Toldoj uranejman, mesaj chimpanpi churanki.
36Dioswan Tinkukuna Toldoj punkunta wisq'anapajtaj, t'ullkusqa linomanta uj cortinata ruwanki. Cortinaj colornintaj kanqa anqa, puka, puka panti ima. Cortinataj sumaj pallayniyoj awasqa kanqa. 37Cortinata warkhunaykipajqa acacia maderamanta phishqa k'aspita ruwanki, chaykunatataj qoriwan lluch'iykunki. K'aspikunaqa sapa uj qorimanta ruwasqa ganchoyoj kanqa. K'aspikunata sayachinapajtaj, broncemanta phishqa chukuta ruwanki.
Currently Selected:
Éxodo 26: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
