Éxodo 25
25
Dioswan Tinkukuna Toldota ruwanapaj
(Ex 35.4-9)
1Tata Dios Moisesta nerqa: 2Israelitakunata niy noqapaj t'aqasqa ofrendata apamunawankuta. Tukuy pichus ofrendata apamuyta munajkunaqa tukuy sonqomanta apamuchunku. 3Paykunamanta ofrendata kay imakunata jap'inkichej: Qorita, qolqe metalta, cobreta, 4anqa telata, puka telata, puka panti telata, linomanta awasqa sumaj telata, cabraj millmanta ima. 5Jap'illankichejtaj apamusqanku pukaman tiñisqa mocho qarakunata, waj sumajnin kaj qarakunata ima. Kay imakunatapis apamullachunkutaj: Acacia sach'amanta kurkuta, 6k'anchachinapaj aceiteta, jawina aceitepaj inciensopajwan ima sumajta q'apashaj imakunata. 7Kay imakunatapis apamullachunkutaj ónice rumikunata, ashkha lliphirishaj rumikunatawan ima unkuman, chantá kuraj kaj sacerdotej pecheranman churanapaj. 8Chaykunawan yupaychana toldota ruwapuwanqanku, noqa paykuna ukhupi tiyakunaypaj. 9Tiyakunay toldota, jinataj chaypi tukuy imachus kajta, noqa rikuchisqayki, chayman jinapuni ruwanqanku, nispa.
Arca ruwanapaj kamachisqakuna
(Ex 37.1-9)
10Tata Dios nillarqataj: Jinallataj israelitakunata niy: Arca nisqa cajonta acacia maderamanta ruwankichej. Arcaqa sayt'unman uj metro chunka centimetroyoj kanqa, kinrayninmantaj sojta chunka phishqayoj centimetroyoj, sayayninmantaj sojta chunka phishqayoj centimetroyoj kanqa. 11Chay cajonpa ukhunta, jawantawan sumaj qoriwan lluch'inki, kantuntataj q'empisqata jina qorillawantaj muyuykuchinki. 12Jinallataj sumaj qorimanta jatuchaj ninrita jina tawata ruwanki. Chaykunatataj tawantin chakinman churanki, iskayta ñawpajman, iskaytataj qhepaman. 13Chantá acaciamanta iskay jatuchaj k'aspita ruwallankitaj, jinaspataj qoriwan lluch'iykunki. 14Chay k'aspikunatataj qorimanta ruwasqa ninriman churanki, chaykunawan arcata wantunaykichejpaj. 15Chay k'aspikunaqa arcaj ninrinkunapi churasqa kallanqapuni. Chaymanta ni pipis orqhonqachu. 16Chantá arca ukhuman, p'alta rumipi qhelqasqa kamachisqakuna qosqayki, chayta churanki.
17Arca kirpanata sumaj qorimanta ruwallankitaj. Sayt'unman uj metro chunka centimetroyoj kanqa, kinrayninmantaj sojta chunka phishqayoj centimetroyoj. 18Chaymantaqa qorita martillowan takaspa, iskay querubinkunata ruwanki,#25.18 Lijrayojkuna: Hebreo rimaypi: Kerubim. Ñawpa Testamentopi “lijrayojkunaj” ruwananku imachus kasqanta nin: Edén sutiyoj huertata qhawaj kasqankuta. Gn 3.24. Diospa kamachinan tiyanata qhawaj kasqankuta. 1 S 4.4. Chantá Tata Diostaj sumaj kayninpa lliphipiyninta rikuchishajtin, chaypi paykunapis kasqankuta nin. Ez 1.22-28; 1 R 6.23-29, Sal 18.10. chantá kirpanaj kantunman churanki. 19Querubinkunawan, arcaj kirpananwanqa ujlla ruwasqa kanqanku. Uj kaj querubenqa ujnej kantupi kanqa, uj kajtaj ujnej kantupi. 20Querubinkunaqa Khuyakuyta Tarina nisqa kirpana patapi purajmanta qhawarinasqa kanqanku, lijrankuwan arcata ojllaykoj jina. Uyankupis kirpana qhawarisqa kanqa. 21Chantá kirpanata arca pataman churanki. Arcaj ukhunmantaj rumipi noqaj qhelqasqay kamachisqakunata churanki. 22Chaypi qanman rikhurisqayki, chantá Khuyakuyta Tarina nisqamanta, arca patapi kashanku, chay querubinkunaj chawpinmanta qanwan parlasaj. Willasqaykitaj israelitakunaman imatachus kamachisqayta.
Diospaj t'anta churana mesa
(Ex 37.10-16)
23Jinallataj acaciamanta uj mesata ruwanki. Chaytaj sayt'unman jisq'on chunka centimetroyoj kanqa, kinrayninmantaj tawa chunka phishqayoj centimetroyoj, sayayninmantaj sojta chunka phishqayoj centimetroyoj. 24Chantá sumaj qoriwan tukuyninta lluch'iykunki. Kantuntapis qorillawantaj q'empisqata jina muyuykuchinki. 25Jinallataj mesaman qanchis centímetro khuskanniyojta jina jark'achata jina churanki. Chantá kantunta q'empisqata jina qoriwan muyuykuchillankitaj. 26Ruwallankitaj qorimanta tawa ninrikunata, chaytataj mesaj tawantin chakinman churanki. 27Ninrikunaqa mesaj kantun chaypi churasqa kanqa, chayninta k'aspikunata pasachispa, mesata wantunapaj. 28Mesa wantuna k'aspikunataqa acaciamanta ruwanki, chaykunatataj qoriwan lluch'iykunki. 29Jinallataj mesaman churanapaj ruwanki, wisllakunata, chuwakunata, yurukunata, vino ofrendata jap'inapaj copakunatapis, chay tukuyninta sumaj qorimanta ruwanki. 30Chantá chay mesaman churanki noqaman qonawaykichej t'antata, chaytaj ñawpaqeypi kanallanpuni tiyan.
Qorimanta candelero
(Ex 37.17-24)
31Jinallataj martillowan takaspa, sumaj qorimanta candelerota ruwanki. Ruwallankitaj candeleroj jap'inanta, sayananta, k'ancha churananta, t'ika mut'unta, t'ikankunata ima. Chaytaj ujllapis kanman jina sumaj qorimanta ruwasqa kanqa. 32Candeleroqa sojta palqayoj kanqa, uj ladopi kinsa, uj ladopitaj kinsa. 33Sapa palqaqa almendra t'ika jina kanqa, mut'uyoj, t'ikayojtaj. 34Kikin candeleroj chawpinpi tawa copayoj kanqa, almendro t'ikaman rijch'asqa, mut'untin, t'ikantin ima. 35Sapa palqaj uranpitaj uj t'ika mut'uyoj kanqa. Ñawpaj palqakunaj uranpi, jinallataj iskay kaj uranpipis kallanqataj. Sojtantin palqakunaj uranpi ajina kanqa. 36Palqakuna, t'ika mut'unkuna imaqa candelerowan ujlla ruwasqa kanqa. Chantá sumaj qorimanta martillowan takaspa ruwasqa kanqa. 37Ruwallankitaj qanchis lamparakunata, chaykunatataj jap'ichispa, ñawpajman jina k'anchanankupaj churanki. 38Jinallataj pábilo k'utunata, ushpha jap'ina chuwitatapis qorillamantataj ruwanki. 39Candelerota, chantá imanchus kajtawanqa kinsa chunka kinsayoj kilo qorimanta ruwanki. 40Tukuy chaykunataqa Sinaí orqopi rikuchisqayman jina ruwanki.
Currently Selected:
Éxodo 25: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
