Éxodo 24
24
Tata Dios israelitakunawan tratota ruwan
1Tata Dios Moisesta nerqa: Maypichus noqa kashani, chayman Aaronwan, Nadabwan, Abiuwan, chantá israelitakunamanta qanchis chunka kurajkunapiwan ima wicharimuy. Paykunaqa noqamanta karullapi qonqorikonqanku. 2Qanlla noqaman qayllamuwanki. Paykunarí karunejllapi kanqanku, nitaj waj runakuna qanwan jamonqankuchu, nispa.
3Moisés chaymanta kutirispa, payman Tata Dios imatachus parlasqanta, kamachisqantataj runakunaman willarqa. Paykunataj uj similla kuticherqanku: Noqaykoqa Tata Diospa tukuy kamachisqanta ruwasqayku, nispa.#24.3 Diospa nisqanta kasunanku, tratota ruwanankupaj ancha necesario karqa. Mana kasukuy kajtin, Dios mana paykunawan trato ruwayta atinmanchu karqa. Ex 19.8; Dt 5.27.
4Chaymanta Moisesqa Tata Diospa tukuy nisqanta qhelqarqa. Q'ayantintaj tutamanta jatarispa, orqo k'uchupi chunka iskayniyoj rumiwan uj altarta jataricherqa. Jinallataj chunka iskayniyoj rumita sayacherqa, sapa jatun ayllumanta uj rumi karqa.#24.4 Trato ruwaspa, altarta sayarichina niyta munarqa, imatachus parlasqankuta Dios uyarishasqanta. Rumikunatajrí niyta munarqa trato ruwasqankumanta testigo kasqankuta, chayrí tratota ruwasqankumanta yuyarinankupaj kasqanta. Gn 31.44-53; Jos 4.7; 24.27. 5Chantá Moisesqa waynakunata kacharqa, torillokuna ñak'asqata q'olachispa, Tata Diosman jaywanankupaj. Jaywallarqankutaj k'achata kawsakuy jaywanatapis. 6Moisestaj torillokuna ñak'asqaj yawarninmanta khuskanta jap'ispa, juch'uy ch'illamipi jallch'arqa. Khuskan yawarwantaj altar ruwasqanta ch'ajchorqa. 7Jinaspataj, trato ruwasqamanta qhelqata runakunaj uyarinankuta ñawirerqa. Runakunataj nerqanku: Noqaykoqa Tata Diospa tukuy kamachisqanta kasusqayku, nispa.
8Chantá Moisés yawarta jap'iytawan, runakunata ch'ajchuspa, nerqa: Kay yawarwanmin Tata Diosqa qankunawan trato ruwasqanta sut'inchan, tukuy kay nisqaman jina, nispa.#24.8 Uywa ñak'asqaj yawarninta altarman ch'ajchuy, chantá tantasqa israelitakunaman yawarta ch'ajchuna niyta munarqa: K'achata kawsakuy, mana p'akikuyta atej kasqanta. Jinallataj niyta munarqa Dioswan chantá israelitakunawan khuska kawsakuy kasqanmanta. Mt 26.28; Mc 14.24; Lc 22.20; 1 Co 11.25; Heb 9.19-20; 10.29.
9Chaymanta Moisesqa Aaronwan, Nadabwan, Abiuwan, israelitakunamanta qanchis chunka kurajkunawan khuska orqoman wicharerqa. 10Chaypitaj Israelpa Diosninta rikorqanku. Chakin urapitaj safiromantapis pampan ruwasqa kanman jina lliphipirishajta, janajta jina pichasqata rikorqanku. 11Diosqa israelitakunaj kurajninkunata mana imanarqachu.#24.11 Dios mana imanarqachu: Niyta munan Diosqa jasut'inanpaj mana makinta oqharisqanta. Paykunaqa Diosta rikorqanku,#24.10-11 Tata Diosta rikuspa, mana imanasqa kanaqa Ñawpa Testamentopi ujwan mana kanchu. chantá mikhorqanku, ujyarqankutaj.
Moisés Sinaí orqoman wicharin
12Chaymanta Tata Dios Moisesta nerqa: Maypichus noqa kashani, kay orqoman wicharimuy, chantá chaypi suyaway. Noqataj p'alta rumipi kamachisqakuna qhelqasqayta israelitakuna yachanankupaj qosqayki, nispa.
13Chantá Moisesqa yanapajnin Josuewan khuska Diospa orqonman wicharerqa. 14Kurajkunatataj Moisés nerqa: Kutimunaykukama kayllapi suyashawayku. Kaypi qankunawan Aaronwan, Jurwan ima qhepakushanku. Pejpatapis imamanta quejan kanman chayqa, paykunaman richunku, nispa.
15Chantá Moisesqa orqo pataman wicharerqa, phuyutaj chay orqota p'ampaykorqa. 16Jinapi Tata Diospa jatun kayninpa lliphipiynin Sinaí orqoman urayk'amorqa. Chay phuyoqa orqota sojta p'unchayta p'ampaykorqa, qanchis kaj p'unchaypitaj Tata Dios phuyu ukhumanta Moisesta wajyamorqa. 17Tata Diospa jatun kayninpa lliphipiynintaj nina lawrarishaj jina israelitakunaj rikunankuta rikhurimorqa. 18Moisestaj phuyu ukhuman yaykuspa, orqoman wicharerqa. Chaypitaj payqa tawa chunka p'unchayta, tawa chunka tutatawan qhepakorqa.
Currently Selected:
Éxodo 24: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
