Éxodo 23
23
Justicia ruwanapaj kamachisqakuna
1Tata Dios israelitakunata kamachillarqataj: Ama llullakuspa imatapis parlallankichu.#Ex 20.16; Lv 19.11-12; Dt 5.20. Amataj millay runawan yachachinakunkichu, llullakuspa parlanaykipaj.
2Ama mana allin kajta ruwanaykipaj ashkha runaj nisqanta qhatinkichu. Amallataj quejapi ashkha runaj nisqankuwan apachikunkichu, imachus cheqan kajta q'ewinaykipaj. 3Amallataj quejapi wajcha runa kasqanraykulla sayakunkichu.#Lv 19.15.
4Sichus awqaykej chinkasqa wakanta, chayrí burronta tarinki chayqa, qhaterqapuy. 5Sichus awqaykej burron cargawan ñit'isqa kaspa urmajta rikunki chayqa, ama qhawakullankichu, astawanqa sayarichiyta yanapanki.#Dt 22.1-4.
6Wajcha runaj quejakusqanmanqa justiciata cheqanta ruwanki.
7Ama pitapis llullakuspa tumpankichu. Amallataj mana juchayoj runata wañuchichinkichu, imajtinchus pichus juchayojpa juchanta mana pampachasajchu.
8Ama lluk'ichikunkichu, imaraykuchus lluk'i jap'ikoyqa allin sonqoyoj runata pierdechin, jinallataj mana juchayojta, juchayojta rikhurichin.#Dt 16.19.
9Waj llajtayojta ama waqachinkichu, imajtinchus qanpis Egiptopi waj llajtayoj jina karqanki. Chayrayku runaj llajtanpi tiyakuy imachus kasqanta yachallanki.#Ex 22.21; Lv 19.33-34; Dt 24.17-18; 27.19.
Samarinamanta kamachisqakuna
10Sojta watata jallp'aykipi tarpunki, poqosqantapis oqharinki. 11Qanchis kaj watapitaj jallp'aykita samarichinki, ama tarpunkichu. Sichus payllamanta p'utuspa poqonman chayqa, wajcha runa mikhunanpaj kanqa, puchojtaj uywakuna mikhunankupaj kanqa. Ajinallatataj uva huertaykiwan, olivo sach'aykiwan ima ruwanki.
12Sojta p'unchayta llank'anki, qanchis kaj p'unchaypitaj samarinki,#Ex 20.9-11; 31.15; 34.21; 35.2; Lv 23.3; Dt 5.13-14. wakayki, burroyki samarinankupaj. Ajinata ruwanki wata runayki kallpanman kutirinanpaj, jinallataj waj llajtayoj runapis.
13Tukuy kamachisqayta kasuychej. Ama jayk'ajpis waj dioskunaman k'umuykuychejchu, nitaj sutillankutapis oqharinkichejchu.
Kinsa jatuchaj raymikuna
(Ex 34.18-26; Dt 16.1-17)
14Sapa watapi kinsa kutita sutiypi jatun raymita ruwapuwankichej. 15Mana Levadurayoj T'anta raymita ruwankichej.#23.15 Mana levadurayoj t'anta ruwana raymi: Mana levadurayoj t'anta mikhuna raymita Pascua sutiyoj raymej qhepantapacha ruwananku karqa. Ex 12.14-20; Lv 23.6-8; Nm 28.17-25. Imaynatachus nisusqayman jina, qanchis p'unchayta mana levadurayoj t'antata mikhunkichej. Chaytaqa Aviv killapi mikhunkichej, imaraykuchus chay killapi Egiptomanta llojsimorqankichej. Amataj pipis noqaman ch'usaj makilla jamuwanqachu.
16Chantá tukuy tarpusqaykichejmanta Ñawpaj Kaj Poqojta Oqharina raymitapis ruwallankichejtaj. Jinallataj Chajra Poqoyta Oqharina Tukukuy raymitapis.#23.16 Ñawpajta poqojta oqharina raymi: Poqoy Oqharina raymi ujnin sutin, Semana raymi kallarqataj. Poqoy oqharina raymita junio killapi ruwaj kanku, trigo oqharinata raymichanankupaj. Lv 23.15-21; Nm 28.26-31. Poqoy oqharina raymeqa aswan qhepanejman Pentecostés sutiwan sutichasqa karqa. Hch 2.1.
17Tukuy qharikunaqa watapi kinsa kutita Tukuyta Kamachej Tata Diospa ñawpaqenpi rikhurinanku tiyan.
18Uywa ñak'asqa jaywanata qoshawaspa, ama yawarninta, levadurayoj t'antatawan khuska jaywawankichejchu. Amallataj wiranta q'ayantinkama jallch'ankichejchu.
19Jallp'aykej ñawpajta poqosqanmanta sumajnin kajta Tata Diosniykej wasinman apamunki.#Ex 22.29. Cabra uñataqa ama mamanpa lechenpi chayachinkichu.
Diospa angelnin israelitakunata pusan
20Noqa angelniyta kachamusaj, ñanta rishajtiyki waqaychasunanpaj, qankunapaj wakichipusqay jallp'amantaj chayachisunaykichejpaj. 21Paypa nisqanta uyarispa kasukuy, amataj mana uyarikuyta munajqa kaychu. Payqa noqaj sutiypi ruwanqa, mana uyarikoj kasqaykitataj mana pampachanqachu. 22Sichus cheqatapuni payta kasunki chay, tukuy nisqantataj ruwanki chayqa, noqa awqaykej awqan kasaj. Pichus contraykipi sayaykusojman noqa sayaykullasajtaj. 23Angelniy ñawpaqeykichejta rispa, amorreoj suyunman pusaykusonqachej, jinallataj jeteoj suyunman, ferezeojpaman, cananeojpaman, heveojpaman, jebuseojpaman ima pusaykullasonqachejtaj. Noqa paykunata ni uj puchuyojta chinkachisaj. 24Ama chay runakuna jina ruwankichejchu. Amallataj diosninkukunaman qonqorikunkichejchu, nitaj yupaychankichejchu. Manachayqa lantinkuta yupaychana ruminkutapis phirinkichej.#23.24 Yupaychana rumikuna: Gn 28.18, Chay rumikunaqa diosninkukunaj sutinpi sayachisqa rumikuna karqa.
25Qankunaqa noqa Tata Diosnillaykichejta yupaychawankichej, noqataj mikhunata, yakutapis may chhikata qosqaykichej. Tukuy onqoymantataj qankunata jark'asqaykichej. 26Unayta kawsachisqayki. Llajtaykipeqa onqoj kashaspa, sulluj warmi mana kanqachu, nitaj mana wawayoj kayta atejpis kallanqatajchu.
27May llajtamanchus chayankichej, chaypi tiyakojkunata noqa manchachisaj, awqaykichejkunataj qankunamanta ayqenqanku. 28Ñawpaqeykichejta wayronqokunata kachaykusaj,#23.28 Wayronqokuna: Ichapis niyta munan sinch'i manchachikuy. Ajinata kay chijllaykunapi nillantaj. Dt 7.20; Jos 24.12. heveokunata, cananeokunata, heteokunatawan ima ayqechinankupaj. 29Chay llajtayojkunataqa mana uj watallapichu wijch'usaj, ama chay jallp'a ch'inman tukunanpaj, nitaj k'ita animalkunapis miraykuspa manchachisunankupaj. 30Pisimanta pisi paykunata qharqosaj, qankuna ashkhata miraspa jallp'ata jap'inaykichejpaj jina kanaykichejkama. 31Jallp'aykichejpa mojonnenqa ajina kanqa: Puka Mama Qochamantapacha, filisteokunaj mama qochankukama. Chantá ch'innejmantapacha Éufrates mayukama kanqa. Chay jallp'api tiyakojkunata makiykichejman churaykusaj, qankunataj paykunata qharqonkichej. 32Ama paykunawanqa ni ima tratota ruwankichejchu, nitaj diosninkuwanpis. 33Paykunatachus llajtaykipi tiyakojta saqellanki chayqa, noqaj contrayta juchallichisunkiman. Ama llajtaykipi jap'ikuychu, imaraykuchus diosninkuta yupaychanaman qokuwaj, chaytaj llakiynillaykipaj kanman, nispa. Ajinata Tata Dios israelitakunata nerqa.
Currently Selected:
Éxodo 23: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
