Éxodo 18
18
Jetro Moisesta watukun
1Madianmanta sacerdote Jetroqa Moisespa suegron karqa, paytaj uyarisqa Dios imatachus Moisesnejta israelitakunapaj ruwasqanta. Chantá uyarillasqataj israelitakunata Tata Dios imaynatachus Egiptomanta orqhomusqanta.
2Moisesqa warmin Seforata, iskaynin churinkunatawan suegronpa wasinpajman kachasqa, suegron Jetrotaj paykunata wasinpi jap'ikullasqa. 3Moisespa ujnin churinpata sutin “Gersón” karqa. Chayta Moisés wawanta suticharqa: Noqaqa runaj llajtanpi tiyakushani, nispa. 4Ujnin churinpatataj “Eliezer” sutin karqa. Chayta suticharqa: Tataypa Diosnin yanapawan, faraón espadawan wañuchinawanmantataj jark'awan, nispa.
5Moisesqa ch'innejpi, Diospa orqon nisqa qayllapi jarakorqa. Chaypi kashajtin, suegron Jetroqa Moisespa warminta, iskaynin churinkunatawan pusariykukuspa, watukoj rerqa. 6Jetrotaj Moisesman willajta kacharqa: Noqa suegroyki Jetro qanta waturikusoj jamushani, warmiykita, iskaynin churiykikunatawan pusariykukuspa, nispa.
7Chantá Moisesqa suegron Jetrota taripaj llojserqa. Ñawpaqenpi k'umuykuspataj, much'aykorqa. Chaymantataj, imaynachus kashasqankuta tapunakuytawan, Moisés suegron Jetrota toldonman pusaykorqa. 8Chantá Moisés suegronman willarqa Tata Dios israelitakunata munakusqanrayku imatachus ruwasqanta. Jinallataj willarqa imaynatachus faraonta, jinataj Egipto llajtayojkunatapis jasut'ispa ñak'arichisqanta, chantá ñanta jamushaspa imakunatachus israelitakuna muchusqankuta. Willallarqataj imaynatachus paykunata Tata Dios waqaychasqanta ima.
9Jetroqa israelitakunarayku Tata Diospa sumaj ruwasqanmanta uyarispa, mayta kusikorqa. Kusikullarqataj Egipto llajtayojkunaj makinkumanta paykunata kacharichisqanmanta. 10Chantá Jetro nerqa: Tata Dios jatunchasqa kachun, israelitakunata Egipto llajtayojkunaj makinkumanta, chantá faraonpa makinmantawan kacharichisqanmanta. 11Kunan yachani Tata Diosqa tukuy dioskunamanta nisqaqa astawan atiyniyoj kasqanta. Payqa runaykachaj Egipto llajtayojkunaj ñak'arichisqankumanta ayllunta kacharicherqa, nispa.
12Chantá Moisespa suegron Jetroqa uj uywata ñak'aytawan, q'olachispa Diosman jaywarqa. Pay jaywallarqataj waj imakunatawan. Chaymantataj Aaronwan, Israelmanta kurajkunawan ima Jetrowan khuska Diospa ñawpaqenpi mikhorqanku.
Moisés juezkunata churan
(Dt 1.9-18)
13Q'ayantin Moisés israelitakuna ima jawa ch'ajwachinakusqankuta allinchananpaj tiyaykukorqa. Israelitakunaqa sut'iyaymanta ch'isiyanankama Moiseswan parlanankupaj jamorqanku. 14Suegron Jetrotaj Moisesllapuni tukuy imata ruwasqanta rikuspa, nerqa: Imatataj kayta ruwashankiri? Imaraykutaj sapallayki quejankuta uyarinkiri? Runaqa tutamantapacha ch'isiyanankama qanwan parlanankupaj suyakushanku, nispa.
15Moisestaj kuticherqa: Runakunaqa Diosta tapuripunaypaj jamuwanku. 16Paykuna ukhupi ima jawa ch'ajwachinaku kajtin, noqaman jamuwanku. Ajinata jamunku pichus cheqanpi kasqanta, pitajchus juchayoj kasqanta noqa ninaypaj. Chantá Dios imatachus kamachisqanta, jinataj imatachus yachachisqanta ima noqa yachachini, nispa.
17Chantá Moisespa suegron nerqa: Imatachus ruwashasqaykeqa mana allinchu, 18imaraykuchus qan sayk'unki, qanman jamojkunapis sayk'ullanqankutaj. Ruwanaykeqa ancha, qanllaqa mana ruwayta atiwajchu. 19Uyariway Moisés, noqaqa kay jinata yuyaychaykiman, Diostaj ruwayta yanapasuchun. Paykunaj sutinpi qan Diosman qayllay, paykuna ukhupi imachus mana allinchu kashan, chaykunata Diosman rejsichinaykipaj. 20Diospa kamachisqanta, yachachisqantawan paykunaman yachachiy. Jinallataj imaynatachus kawsanankuta, chantá imatachus ruwanankutapis yachachillaytaj.
21Chantapis israelitakuna ukhumanta allin yuyayniyojkunata, Diosta may jatun respetowan qhawayta yachajkunata, mana llullakojkunata, lluk'ichikuyta chejnejkunata ajllay. Chaykunamanta churay wakinta waranqa runata, wakintaj pachajta, wakintaj phishqa chunkata, wakintaj chunka runata kamachinankupaj. 22Chay kurajkunaqa runapura tukuy ch'ajwachinakuyta allinchanqanku. Imachus mana allinchay atinallata qanman apamusonqanku. Allinchanapaj jina kajtatajrí paykuna allinchanqanku. Ajinata ruwajtiyki, qanpa ruwanayki pisiyanqa, paykunataj yanapasonqanku. 23Sichus yuyaychasusqayta ruwanki, Diostaj ajinata ruwanaykita kamachisonqa chayqa, qanqa mana anchata sayk'unkichu. Israelitakunapis sonqo junt'asqa wasinkuman riponqanku, nispa. Ajinata Jetro Moisesta nerqa.
24Moisestaj suegronpa yuyaychasqanta kasuspa, imatachus nisqanta ruwarqa. 25Israelitakuna ukhumanta sumaj yuyayniyojkunata ajllaspa, paykunata kurajkuna jina kamachinankupaj churarqa. Wakenqa waranqa runakunata, wakenqa pachajta, wakintaj phishqa chunkata, wakintaj chunkata kamachinanku karqa.#Dt 1.9-18. 26Paykuna runapura ch'ajwachinakuyta sapa p'unchay allincharqanku. Mana allinchay atikojllata Moisesman aparqanku, imachus allinchanapaj jinalla kajtarí paykunallaña allincharqanku. 27Chaymantataj Moisés suegronta kacharpayarqa, paytaj llajtanman riporqa.
Currently Selected:
Éxodo 18: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
