Éxodo 12
12
Ñawpaj kaj Pascua raymi
1Moiseswan, Aaronwan ima Egiptopi kashajtinku, Tata Dios kay jinata nerqa: 2Kunanmanta qankunapaj kay killaqa maypaj qhawana killa kanqa, wata qallariy killa.#12.2 Wata qallariy killa: Israelitakunapaj wata qallariy killa Aviv sutiyoj killa karqa. Aviv killajta ujnin sutin, Nisán kallarqataj. Aviv killaqa kunan rejsinchej chaypacha watanamanta, marzo khuskan killamanta, abril khuskan killakama kanman. Ex 13.4; Neh 2.1; Est 3.7. 3Qankuna tukuy israelitakunata ninkichej: Kay killamanta chunka kaj p'unchaypi sapa wasi ayllu uj corderota, chayrí chivota t'aqaychej. Sapa ayllupaj uj uywa kachun. 4Sichus uj wasipi pisilla kasqankurayku, mana corderota mikhuspa tukunankupaj jinachu kankuman chayqa, wasi masillanwan khuskachakuchun. Corderotaqa mashkhachá kasqankuman jina rak'inakuchunku, sapa runa mashkhatachus mikhuyta yachasqanman jina. 5Chay t'aqasqaykichej uywaqa mana iman imanasqachu kanan tiyan. Chantapis orqo, uj watayoj kanan tiyan. Chay uywataj cordero chayrí chivopis kanan tiyan.
6T'aqasqaykichej uywataqa kay killamanta chunka tawayoj p'unchaykama wisq'aspa, jap'inkichej. Chantá chay p'unchayta inti yaykuykushajtin, tukuy israelitakuna chay uywata ñak'ankichej. 7Uywaj yawarninta jap'ispataj, may wasipichus mikhunkichej, chay wasej kijunninta, chantá punku patata ima yawarwan ch'ajchunkichej. 8Chay ch'isitaj aychata kankaspa, jaya qhorayojta, chantá mana levadurayoj t'antatawan ima mikhunkichej. 9Chantá ñak'asqaykichej uywaj aychantaqa ama chawata mikhunkichejchu, nitaj yakupi chayasqatapis, manachayqa ninapi kankasqatapuni mikhunkichej. Umanta, chakinta, ch'unchulantapis ninapi kankasqatapuni mikhunkichej. 10Q'ayantinpajqa amapuni ni imata puchuchinkichejchu. Sichus puchunman chayqa, ruphaykuchinkichej.
11Qankuna corderota kay jinata mikhunkichej: Puririnaykichejpaj p'achallisqa, juk'uta churaykusqa, tojnuykichej jap'irisqa mikhunkichej. Chantapis usqhayllata mikhunkichej, imaraykuchus kayqa Tata Diospa Pascuanmin.#12.11 Diospa Pascuanmin: Israelitakuna sapa wata Pascua raymita ruwananku karqa Egiptomanta kacharichisqa kasqankumanta yuyarikuspa. Pascuaqa tukuy israelitakunapaj manchay yuyarisqa raymi kanan karqa. Lv 23.5; Nm 9.1-5; 28.16; Dt 16.1-2. Jn 1.29; Mt 26.2-29; 1 Co 5.7; 1 P 1.18-19; Jn 19.14; 19.36. 12Chay ch'isi noqaqa tukuy Egipto suyuta pasasaj, chantá Egipto llajtayojkunaj tukuy kuraj kaj churinkunata, jinallataj tukuy uywankukunaj phiwi uñantapis wañuchisaj. Ajinata ruwaspa, Egiptoj tukuy diosninkunata castigasaj. Noqa Tata Diosmin chayta nini. 13Maypichus kashankichej, chay waseqa yawarwan señalasqa kanqa. Punkuykichejpi yawarta rikuspataj, noqaqa qankunata pasallasqaykichej. Ajinaqa Egiptopi kuraj kaj churikunata wañuchishajtiy, qankuna ukhupi mana ni uj wañusqapis kanqachu.
14Chay p'unchayqa qankuna yuyarikunaykichejpaj kanqa. Watan watanta qankuna sutiypi kay raymita ruwankichej. Jinallataj chay raymita qankuna Tata Diospaj miraymanta miray wiñaypaj ruwankichej. 15Qanchis p'unchayta mana levadurayoj t'antata mikhunkichej. Ajinaqa, raymi qallariymantapacha wasiykichejpi manapuni levadura kananchu tiyan. Pillapis chay qanchis p'unchaypi levadurayoj t'antata mikhojqa israelitakuna ukhumanta wijch'usqa kanqa. 16Chantá ñawpaj kaj p'unchayta, jinallataj qanchis kaj p'unchaytapis yupaychanawaykichejpaj tantakunkichej. Chay p'unchaykunapeqa ama ni imata ruwankichejchu, manachayqa imatachus sapa uj mikhunkichej, chayllata wayk'ukuyta atinkichej.
17Ajinata Mana Levadurayoj T'anta Mikhuna raymita ruwankichejpuni, Egiptomanta qankunata orqhomusqayta yuyarikunaykichejpaj. Chayrayku wiñay wiñaypaj kamachisqa kasqanta qhawaspa, qankuna sapa wata raymita ruwankichejpuni. 18Wata qallariy killapi, chunka tawayoj p'unchaymantapacha, iskay chunka ujniyoj p'unchay ch'isiyaykama, mana levadurayoj t'antata mikhunkichej. 19Qanchis p'unchayta wasiykichejpi mana levadura kananchu tiyan. Sichus pipis levadurayojta imatapis mikhunman chayqa, pay israelitakuna ukhumanta wijch'usqa kanqa, Israel llajtayoj kachun, chayrí waj llajtayojpis. 20Chayrayku levadurayojta amapuni imatapis mikhunkichejchu. Maypi tiyakushaspapis, mana levadurayoj t'antata mikhunkichej, nispa. Ajinata Tata Dios Moisesta nerqa.
21Chantá Moisesqa israelitakunamanta tukuy kurajkunata tantachispa, nerqa: Rispa, sapa wasi ayllupaj uj watayoj corderota, chayrí watayoj chivituta jap'ispa, Pascua raymita ruwanaykichejpaj ñak'ankichej. 22Corderoj yawarnintataj uj ch'illamipi jap'inkichej. Chantá hisopo qhorata yawarman chhapuspa jawinkichej, wasiykichejpa punkunpa pata chakanta, chantá iskaynin k'aspintawan. Chantá sut'iyamunankama ni pipis wasimanta llojsinanchu tiyan, 23imaraykuchus Tata Diosqa Egipto llajtayojkunaj kuraj kaj churinkunata wañuchispa pasanqa. May punkutachari yawarwan jawisqata rikonqa, chaytaqa pasallanqa. Ajinata Tata Diosqa wañuchej angelta wasiykichejman yaykojta mana saqenqachu chaypi pitapis wañuchinanpaj.
24Qankuna kay kamachisqata kasuychej. Chayqa qankuna, chantá wawaykichejkuna wiñaypaj kasunankupaj churasqa kanqa. 25Maypachachus Tata Diospa qosqan jallp'aman chayankichej, chaypachapis Pascua raymita ruwallankichejpuni.
26Sichus wawaykichejkuna tapusonqachej: Imatachus ruwashanchej, chay ima niytataj munanri? nispa chayqa, 27qankuna ninkichej: Kay uywaqa Pascuapi Tata Diospa sutinpi ñak'aspa jaywanapaj kashan. Payqa Egipto llajtayojkunaj kuraj kaj churinkukunata wañuchishajtin, israelitakunaj wasinkuta pasallarqa. Ajinata ruwaspa, Diosqa mana wañuchisqa kanaykumanta jark'akuwarqayku, nispa wawaykichejman ninkichej.
Moisés parlayta tukojtinkamataj, israelitakuna qonqorikuspa, Tata Diosta yupaycharqanku. 28Chantá israelitakuna rispa, tukuy imata ruwarqanku Tata Dios imatachus Moisesman, Aaronman ima kamachisqanman jina.
Kuraj kaj churikuna wañunku
29Jinapi chawpi tutata Tata Diosqa Egipto llajtayojkunaj tukuy kuraj kaj churinkunata wañuracherqa. Wañucherqa faraonpa kuraj kaj churin, pichus kamachinan tiyanapi tiyaykunan karqa, chaymanta, carcelpi wisq'asqa kasharqa, chaypa kuraj kaj churinkama. Jinallataj tukuy uywakunaj phiwi uñantapis wañuchillarqataj. 30Chaypacha faraón, jinallataj yanapajninkuna, chantá tukuy Egipto llajtayojkuna ima chawpi tutata jatarerqanku. Tukuy Egiptopi manchay sonqo nanayta waqarqanku, imaraykuchus ni uj wasipis mana wañusqayojqa karqachu.
31Chayrayku chay tutapacha faraonqa Moisesta, Aarontawan ima wajyachispa, nerqa: Llajtaymanta qankuna, israelitakuna ima ripuychej, nisqaykichejman jina Tata Diosta yupaychamunaykichejpaj. 32Jinallataj ovejaykichejta, wakaykichejtapis qhatikapuychej, chantá usqhayllata ripuychej. Chantá noqaraykupis Diosmanta mañapuwaychej, nispa.
33Jinapi Egipto llajtayojkunaqa israelitakuna llajtankumanta ripunankupaj usqhay usqhayta yanaparqanku. Ajinata ruwarqanku, imaraykuchus nerqanku: Manachus riponqanku chayqa, tukuyninchej wañusunchej, nispa. 34Israelitakuna mana levadurayoj masasqankuta llijllankuman q'epichaspa, apakaporqanku. 35Chantapis Moisespa nisqanman jina, israelitakuna Egipto llajtayojkunamanta mañakorqanku qolqe metalmanta ruwasqa, chantá qorimanta ruwasqa imakunata ima, jinataj p'achatawan. 36Tata Diostaj ruwarqa Egipto llajtayojkuna israelitakunapaj manchay k'acha kanankuta. Chayrayku israelitakuna imatachá mañakusqankuta egipciokuna qorqanku. Ajinata israelitakunaqa Egipto llajtayojkunata mana imayojta saqerparerqanku.#Ex 3.21-22; 11.2-3; Sal 105.37.
Israelitakuna Egiptomanta ripunku
37Israelitakunaqa Ramesés llajtamanta puririspa, Sucotman rerqanku. Mana wawakunata yupaspa, tukuyninpi 600.000 qharikuna maqanakuman rinankupaj jina karqanku. 38Paykunawan khuska tukuy imaymana may chhika runakunapis llojsillarqankutaj. Jinallataj paykuna may chhika ovejankukunata, wakankukunata ima qhatiriykukuspa, riporqanku.#12.38 Israelitakuna Egiptomanta llojsishaspa, mana paykunallachu llojsisqanku. Paykunawan khuska waj llajtayojkuna may chhika llojsillasqankutaj. 39Israelitakuna Egiptomanta usqhay usqhayta puririsqankurayku, ñanpi mikhunankupaj qoqawita mana wayk'ukuyta atisqankuchu. Chayrayku Egiptomanta mana levadurayoj masata apakamusqankumanta t'antata ruwakorqanku.#Dt 16.3.
40Egiptopi israelitakuna tiyakusqankoqa 430 wata karqa.#Gn 15.13-16; Hch 7.6; Gl 3.17. 41Chay watakuna junt'akojtin, chay kikin p'unchaypi israelitakuna Tata Diospa soldadonkuna jina, Egiptomanta llojsiporqanku. 42Chay tuta Tata Diosqa israelitakunata Egiptomanta orqhonanpaj qhawasharqa. Chayrayku israelitakunaqa wiñay wiñaypaj sapa wata chayta yuyarikunanku karqa.
Pascuata ruwanapaj kamachisqakuna
43Chaypacha Tata Dios Moisesta, Aarontawan ima nerqa: Kaymin Pascuata ruwanamanta kamachisqakuna. Pascuapi mikhunaykichej aychata mana waj llajtayoj runa mikhonqachu. 44Rantikusqayki wata runakunarí mikhuyta atenqanku, sichus circuncidasqa karqanku chayqa. 45Waj llajtayoj, chantá qanpaj llank'apusoj runarí Pascua mikhunata mana mikhonqachu. 46Chantá Pascuapi mikhuna aychataqa wasi ukhupi mikhunkichej. Aychataqa ni uj chhikallantapis jawaman orqhonaykichejchu tiyan, nitaj ima tulluntapis p'akinaykichejchu tiyan.#Nm 9.12; Jn 19.36. 47Tukuy israelitakuna Pascua raymita ruwanaykichej tiyan.
48Sichus qankunawan tiyakoj waj llajtayojqa Tata Diospaj Pascua raymita ruwayta munanman chayqa, ayllunpi tukuy qhari circuncidachikunanku tiyan. Chaypacharaj Pascua raymita ruwayta atenqa, imajtinchus circuncidasqaqa llajta masiykichejman tukonqa. Mana circuncidasqa kajrí, Pascuapi mikhuna aychamanta manapuni mikhuyta atenqachu. 49Qankuna israelitakuna, jinallataj qankuna ukhupi waj llajtayojkunamanta tiyakojkunapis kay kamachisqata kasunanku tiyan, nispa.
50Chaypacha, Tata Dios imaynatachus Moisesman, Aaronmanwan ima kamacherqa, ajinata israelitakuna ruwarqanku. 51Chay kikin p'unchayllataj Tata Diosqa israelitakunata t'aqa t'aqapi t'aqasqata Egiptomanta orqhorqa.
Currently Selected:
Éxodo 12: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
