Éxodo 13
13
Kuraj kaj churikuna Diospaj t'aqasqa
1Tata Dios Moisesta nerqa: 2Tukuy kuraj kaj qhari wawakunata noqapaj t'aqapuwankichej. Israelitakunamanta tukuy kuraj kaj churikuna, jinallataj uywamanta tukuy phiwi uñakuna noqajtamin kanqanku, nispa.#13.1-2 Tukuy kuraj kaj churikunata Diosman qopunankuta kamacherqa. Dios ajinata nerqa, imajtinchus Pascua ch'isita payqa tukuy Egipto llajtayojkunaj kuraj kaj churinkukunata wañucherqa, israelitakunaj kuraj kaj churinkunatarí mana. Chayrayku Diosqa israelitakunata kamacherqa, kuraj kaj churinkuta payman qopunankuta. Lc 2.23; Ex 22.29-30; 34.19-20; Nm 3.13.
3Moisestaj israelitakunata nerqa: Kay p'unchaymanta yuyarikunkichej, imajtinchus kay p'unchayta Tata Diosqa Egiptopi wata runa kanamanta may jina atiyninwan orqhomusorqachej. Chayrayku kay p'unchaypi levadurawan ruwasqa t'antata ama mikhunkichejchu. 4Qankunaqa Aviv killapi llojsishankichej. 5Kay kikin killallataj yuyarikuna raymita Diospaj sapa wata ruwankichej, maypachachus Tata Dios lechewan, abeja misk'iwan purishaj jallp'aman chayachisonqachej, chaypacha. Chay jallp'api kunan tiyakushanku cananeokuna, jeteokuna, amorreokuna, heveokuna, jebuseokuna ima. Jinapis Tata Dios chay jallp'ata ñawpa tataykichejkunaman tiluspa qonanta nerqa.
6Qankuna mana levadurayoj ruwasqa t'antataqa qanchis p'unchayta mikhunkichej, qanchis kaj p'unchaypitaj Tata Diospaj raymita ruwankichej. 7Qanchis p'unchayta mana levadurawan ruwasqa t'antata mikhunkichej. Chaypachataj tukuy llajtaykichejkunapi mana levadura kananchu tiyan, ni levadurawan ruwasqa t'antapis.
8Chantá chay p'unchaypi qankuna wawaykichejta ninkichej: Kay raymita ruwashanchej chayqa, imaynatachus Tata Dios Egiptomanta orqhomuwasqaykuta yuyarikunapaj kashan, nispa. 9Sapa wata ruwankichej, chay raymeqa yuyarikunaykichejpaj kanqa, imaynachus makiykichejpi, manachayqa frenteykichejpi k'illpasqa señal jina, Tata Diospa kamachisqanmanta parlanaykichejta yuyarikunaykichejpaj. Chayrayku ninakunkichej: Tata Diosqa may jina atiyninwan Egiptomanta orqhomuwarqanchej. 10Chayrayku Pascua raymita sapa wata Aviv killapipuni ruwananchej tiyan, nispa.
11Maypachachus Tata Dios ñawpa tataykichejkunaman, jinataj qankunamanpis tiluspa nisqanta junt'anqa chaypacha, qankuna kayta ruwankichej. Maypichus cananeokuna kunan tiyakushanku, chay jallp'ata qankunaman qosojtiykichej, 12qankuna Tata Diosman tukuy kuraj kaj churiykichejta qopunkichej, jinallataj tukuy uywaykichejkunamanta phiwi uñanmanta orqo kajtawan. Tukuy chaykunaqa Tata Diospata kanqa. 13Munaspaqa, burroj phiwi uñanta kacharichispa, cuentanmanta corderota jaywankichej. Mana jinata ruwasparí, burro uñata kunkanmanta q'ewispa wañuchinkichej. Kuraj kaj churiykichejtarí pagota qospa kacharichinkichejpuni.
14Qhepanejman sichus wawaykichej tapusunkichej: Imaraykutaj kayta ruwashanchejri? nispa chayqa, ninkichej: Tata Diosmin Egiptopi wata runa kashajtiyku, may jina atiyniywan orqhomuwarqayku. 15Faraón sonqonta rumiyachispa, mana kacharipuyta munawarqaykuchu. Chayrayku Tata Diosqa Egipto llajtayojkunaj tukuy kuraj kaj churinkukunata wañucherqa, jinallataj uywankukunaj phiwi uñankutapis wañuchillarqataj. Chayrayku uywaj phiwi orqo uñankuta Tata Diosman jaywanchej. Jinallataj kuraj kaj churiykuta kacharichinaykupaj Diosman preciota pagayku, nispa. Ajinata wawaykichejkunaman ninkichej. 16Chayrayku kay raymi ruwasqanchejqa makinchejpi, frentenchejpi ima k'illpasqa jina señal kanqa. Chay raymi kanqa yuyarikunanchejpaj Tata Dios may jina atiyninwan Egiptomanta orqhomuwasqanchejmanta, nispa. Ajinata Moisés Pascua raymimanta israelitakunaman yachacherqa.
Dios israelitakunata ch'innejman pusan
17Maypachachus faraón israelitakunata kachariporqa chaypacha, Filistea suyunejta pasaj ñan aswan qaylla karqa.#13.17 Filistea suyunejta pasaj ñanqa Jatun Mama Qochanej kantunta rerqa. Chay ñanqa israelitakuna maymanchus risharqanku, chayman astawan qaylla karqa. Chaywanpis chay ñan astawan runaj purinan kasqanrayku, chaypi qhawaj soldadokuna churasqa karqanku. Sichus israelitakuna chay ñannejta rinkuman karqa chayqa, chaypi qhawaj soldadokunawan maqanakunkuman karqa, manaraj maqanakunankupaj jina wakichisqarajchu kashaspa. Gn 21.32-34. Chaywanpis, Dios mana paykunata chaynejtachu pusarqa, imajtinchus pay nerqa: Sichus israelitakuna contrankupi maqanakoj llojsimojta rikunkuman chayqa, mancharikuspa, Egiptoman kutiripuyta munankuman, nispa. 18Chayrayku Diosqa israelitakunata ch'innejta muyurichimorqa, Puka Mama Qochaman rej ñannejta. Israelitakunataj Egiptomanta sumaj wakichisqa llojserqanku.
19Chaypacha Moisesqa Joséj tulluntapis apallarqataj, imaraykuchus José kawsashaspallaraj israelitakunata tiluchispa, nisqa: Maypachachus Dios yanapasonqachej chaypacha, kaymanta ripushaspa, tulluyta apankichej, nispa.#Gn 50.25; Jos 24.32.
20Israelitakunaqa Sucotmanta puririspa, ch'innejman yaykuna qayllanejpi, Etam nisqa cheqanejpi jarakorqanku. 21Chantá ñanta rikuchinanpaj Tata Dios paykunaj ñawpaqenkuta rerqa, p'unchayqa chhoqo phuyupi, tutantaj ninapi, ajinamanta israelitakuna tuta p'unchay purinankupaj. 22P'unchaypi chhoqo phuyoqa paykunaj ñawpaqenkuta rillarqapuni, tutantaj nina k'anchayñataj ñawpaqenkuta rillarqataj.#Ex 40.34-38; Nm 9.15-23.
Currently Selected:
Éxodo 13: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
