Éxodo 11
11
Kuraj kaj churikuna wañunankumanta willan
1Chantá Tata Dios Moisesta nerqa: Uj llakiytawanraj faraonman, Egipto llajtayojkunaman ima kachaykamusaj. Chay ñak'ariy pasaytaraj kacharipusonqachej. Kikin faraonpuni kaymanta wijch'usonqachej. 2Kunantaj israelitakunata niy sapa qhari, sapa warmi, Egipto llajtayoj wasi masinmanta mañakunankuta, imachus qolqe metalmanta, qorimanta ruwasqa kashan, chay tukuyta, nispa.#Ex 3.21-22; 12.35-36. 3Tata Dios ruwarqa Egipto llajtayojkuna israelitakunapaj manchay k'acha kanankuta. Chantapis faraonta yanapajkuna Moisesta manchay respetowan qhawarqanku, jinallataj tukuy Egiptopi runakunapis.
4Chantá Moisés faraonta nerqa: Tata Dios ajinatamin nin: Chawpi tutata jamuspa, tukuynin Egipto suyuta pasasaj. 5Chaypacha wañonqanku tukuy Egipto llajtayojkunaj kuraj kaj qhari wawaykichejkuna. Wañonqanku kamachinan tiyanapi tiyaj faraonpata kuraj kaj churinmantapacha molinota muyuchej kamachi warmej kuraj kaj churinkama. Chantá tukuy uywakunaj phiwi uñankunapis wañullanqankutaj. 6Tukuynin Egiptopi qankuna llakiywan manchayta waqankichej. Chay jina llakeyqa ni jayk'aj karqachu, nitaj jayk'ajpis kanqachu.
7Chantá yachankichej imaynatachus Tata Dios Egipto llajtayojkunata uj jinamanta qhawasqanta, israelitakunatatajrí waj jinamanta,#Ex 8.22-23; 9.4. imaraykuchus israelitakunamantaqa ni runapis, nitaj uywapis wañonqachu, ni alqollapis ayñanqachu.#Ex 9.26; 10.23. 8Chaymantaqa tukuy yanapasojkuna jamuwanqanku, ñawpaqeyman qonqoriykukuspataj, niwanqanku: Ripuychej ari, qan, chantá pikunachá qanwan kashanku, chaykunapis, nispa. Chaypacharaj noqa ripusaj, nispa. Ajinata Moisés faraonta niytawan, faraonpa ñawpaqenmanta manchay phiñasqa llojsiporqa.
9Ajina karqa, imajtinchus Tata Dios Moisesta nisqaña: Faraonqa manapuni kasusonqachejchu. Chayrayku Egipto suyupi t'ukunapaj jina astawanraj ruwasaj, nispa. 10Moiseswan, Aaronwan ima faraonpa rikunanta t'ukunapaj jina may chhika imakunata ruwarqanku. Tata Diostajrí faraonpa sonqonta rumiyacherqa, chayrayku israelitakuna Egiptomanta ripunankupaj mana kacharipuyta munarqachu.
Currently Selected:
Éxodo 11: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
