Éxodo 10
10
Phinki phinkikuna Egiptoman junt'aykun
1Chantá Tata Dios Moisesta nerqa: Riy faraonwan parlaj, imaraykuchus noqa paypa sonqonta, jinallataj yanapajninkunaj sonqonkutapis rumiyachini. Ajinata runaj mana jayk'aj rikusqan t'ukunata ruwasaj, atiyniyoj kasqayta rikuchinaypaj. 2Noqa Egiptopi imatachus ruwasqayta, paykuna ukhupi t'ukunakunata ruwasqaytapis, wawaykikunaman, allchhiykikunaman ima willanaykipaj ruwarqani. Ajinata ruwasqayrayku, qankuna yachankichej noqamin Tata Dios kasqayta, nispa.
3Chaymanta Moiseswan, Aaronwan ima rispa, faraonta nerqanku: Tata Dios, Israelitakunaj Diosnin ajinata nisunki: Mayk'ajkamataj mana k'umuykuyta munankichuri? Kachariy israelitakunata, noqata yupaychamunawankupaj. 4Manapunichus kacharipuyta munanki chayqa, q'ayapacha phinki phinkikunata tukuy Egiptoman kachaykamusaj. 5Phinki phinkikunaqa phuyu jina pampaman tiyaykuspa, p'ampaykonqanku, mikhonqankutaj chijchi paramanta imachus puchojta. Jinallataj tukuy sach'atapis q'ara k'aspillata ruwanqanku. 6Phinki phinkeqa wasiykiman, kamachiykikunaj wasinkuman, jinataj tukuy Egipto llajtayojkunaj wasinkukunaman junt'aykonqa. Chay jinataqa, tatayki, nitaj jatun tataykipis kasqankumantapacha kunankama ni jayk'aj rikorqankuchu, nispa. Jinata faraonta niytawantaj, Moisesqa kutirispa, faraonpa kamachinan wasimanta llojsiporqa.
7Chantá faraonta yuyaychajkuna nerqanku: Mayk'ajkamataj kay runa umanchejta nanachiwasunri? Chay runakunata kacharipuy, ch'innejman rispa Tata Diosninkuta yupaychamunankupaj. Manachu yachanki Egiptoqa kay jina sonqo nanay phirisqaña kashasqanta? nispa.
8Chantá faraonqa Moisesta, Aarontawan ima wajyachispa, nerqa: Riychej Tata Diosniykichejta yupaychaj. Chaywanpis ñawpajta willawaychej pikunachus rinankuta, nispa.
9Moisestaj kuticherqa: Noqaykoqa juch'uy wawaykukunawan, machu runaykukunawan, churiykukunawan, ususiykukunawan, ovejaykukunawan, wakaykukunawan ima rinayku tiyan. Tukuyniykupuni rinayku tiyan, imaraykuchus Tata Diospa sutinpi jatun raymita ruwanayku tiyan, nispa.
10Chantá faraón Moisesta, Aarontawan ima nerqa: Ajá, qankunaqa ima mana allin kajta ruwayta yuyashankichej. Tata Dios qankunawan kashanman chaypis, qankunata, wawaykichejkunantinta mana kachariykichejmanchu. 11Mana jinachu kanqa. Sichus Tata Diosta yupaychaj riytapuni munankichej chayqa, qhari kajkunalla rinkichej, nispa. Faraón ajinata niytawan, Moisesta, Aarontawan ima ñawpaqenmanta wijch'uchimorqa.
12Chantá Tata Dios Moisesta nerqa: Egipto suyunejman makiykita oqhariy. Jinataj phinki phinkikuna rikhurimuspa, chijchi paramanta puchojta, jinataj pampapi tukuy q'omer kajta tukunankukama mikhonqanku, nispa.
13Chantá Moisesqa Egipto suyunejman varanta oqharerqa. Tata Diostaj inti llojsimuynejmanta uj p'unchayta, uj tutatawan wayrachimorqa. Sut'iyamuypajtaj wayraqa tukuy Egiptoman phinki phinkikunata apamorqa. 14Phinki phinkeqa tukuy Egipto suyuman phuyu jina tiyaykorqa. Chay chhika phinki phinkeqa mana jayk'ajpis karqachu, nitaj jayk'ajpis kanqachu.#Ap 9.2-3. 15Phinki phinkikunaqa pampaman yanalla tiyaykusqanrayku, mana jallp'a rikukorqachu. Chantá jallp'api tukuy q'omer kajta, sach'akunaj poqoyninta, chijchi paramanta imachus puchojta ima mikhuykorqanku. Chayrayku tukuy Egiptopi ni ima q'omer, ni ima sach'a laqhe, nitaj qhorapis puchorqachu. Q'arallata saqerqanku.
16Chantá faraonqa usqhay usqhayta Moisesta, Aarontawan ima wajyachispa, nerqa: Noqaqa Diosniykichej Tata Diospa contranta, qankunaj contraykichejtawan ima juchallini. 17Chayrayku nirikuykichej: Kunallantawanña juchayta qhespichispa, Tata Diosniykichejmanta mañapuwaychej, kay millay khuruta noqamanta karunchananpaj, nispa.#10.16-17 Faraón yuyayninman kutirisqanqa mana cheqapunichu karqa, imajtinchus payqa manchayta runaykachaj runa karqa. Faraonqa Diospa t'ukuna ruwasqanwan ñak'arisqanrayku, juchallisqanta rimarerqa, chantá israelitakunata kacharipunanta nerqa. Chaywanpis manaraj imapi imatachus nisqanmanta kutirispa, israelitakuna ripunankupaj mana ruway atinata nerqa.
18Chayrayku Moisés faraonpata kamachinan wasimanta llojsiytawan, Tata Diosmanta mañarqa. 19Chantá Tata Dios inti yaykuynejmantañataj wayrata wayrachimorqa. Chaytaj phinki phinkikunata aparpaspa, Puka Mama Qochaman wijch'uykamorqa. Jinamanta Egiptopi phinki phinkikunamanta mana ni ujpis puchorqachu. 20Chaywanpis Tata Diosqa faraonpa sonqonta ujtawan rumiyachillarqataj, israelitakunata mana kacharipunanpaj.
Egiptopi tuti laqhayay
21Chantá Tata Dios Moisesta nillarqataj: Janajman makiykita oqhariy, tukuy Egiptopi manchay tuti laqha kananpaj, nispa. 22Moisestaj makinta janajnejman oqharerqa, chantá kinsa p'unchay junt'ata tukuy Egiptopi manchay laqha karqa.#Sal 105.28; Ap 16.10. 23Sinch'i laqha kasqanrayku, kinsa p'unchayta mana pipis rikunakorqankuchu, nitaj pipis, maypichus kasharqa, chaymanta kuyurerqachu. Chaywanpis maypichus israelitakuna tiyakusharqanku, chayllapi k'anchay karqa.
24Chantá faraonqa usqhayta Moisesta wajyachispa, nerqa: Riychej, wawaykichejtawan pusariykukuspa, Tata Diosta yupaychamuychej. Chaywanpis ovejaykichejta, wakaykichejtawan ama qhatiychejchu, nispa.
25Moisestajrí kuticherqa: Tata Diosniykuman jaywanaykupaj chantá uywata ñak'aspa q'olachinaykupaj, qanpuni qonawayku tiyan. 26Jinallataj tukuy uywaykukunaqa noqaykuwan rinanku tiyan. Mana ujpis qhepakonqachu, imaraykuchus Tata Diosniykuta yupaychanaykupaj chaykunamanta wakinta ajllanayku tiyan. Jaqayman chayanaykukama, manaraj yachaykuchu mayqen uywatachus Tata Diosman jaywanaykuta, nispa.
27Tata Diosrí ujtawan faraonpa sonqonta rumiyachillarqataj, israelitakunata ama kacharipuyta munananpaj. 28Chantapis faraonqa Moisesta nerqa: Llojsiy kaymanta, amaña ujtawan kutimuwaychu. Sichus ujtawan kutimuwanki chayqa, wañuchichisqayki, nispa. 29Moisestaj kuticherqa: Allinta ninki: Manaña ujtawan uyaykita rikusajchu, nispa.
Currently Selected:
Éxodo 10: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
