Éxodo 9
9
Uywapaj onqoy rikhurin
1Chantá Tata Dios Moisesta nillarqataj: Rispa, faraonta nimuy: Israelitakunaj Tata Diosninku ajinata nisunki: Aylluyta kacharipuy, rispa yupaychamunawankupaj. 2Sichus mana kachariyta munaspa, jap'iyllatapuni munanki chayqa, 3noqa manchay millay onqoywan tukuy uywaykikunata wañuchisaj: Caballokunata, burrokunata, camellokunata, wakakunata, ovejakunata ima, nispa. 4Chaywanpis Tata Diosqa israelitakunaj uywankuta Egipto llajtayojkunaj uywankumanta t'aqanqa. Chayrayku israelitakunaj uywankumanta ni ujpis wañonqachu. 5Chay jawa Tata Diosqa mayk'ajchus chay kananta ninña: Q'ayapacha chayta ruwasaj, nispa.
6Q'ayantinpacha Tata Dios nisqanta ruwarqa. Jinataj Egiptopi tukuy uywakuna wañurarqanku. Israelitakunaj uywankunamantarí ni ujpis wañorqachu. 7Faraonqa israelitakunaj uywankunata qhawajta kacharqa, nitaj uj wañusqatapis tarerqankuchu. Chaywanpis faraonqa sonqonta rumiyachillarqapuni, manataj israelitakunata kachariporqachu.
Llejti onqoy
8Chaymanta Tata Dios Moisesta, Aarontawan ima nillarqataj: Hornomanta ushphata orqhospa, Moisés faraonpa rikunanta chay ushphata pataman qhallichun. 9Ushpha qhallisqantaj tukuy Egiptoman junt'aykonqa. Chantá runakunapi, uywakunapi ima llejti onqoy rikhurenqa, nispa.
10Jinapi Moiseswan, Aaronwan hornomanta ushphata orqhospa, faraonpaman rerqanku. Chaypitaj Moisés ushphata pataman qhallerqa. Chaymantataj runapi, uywapi ima, tukuy ukhunkupi llejti onqoy rikhurerqa.#Ap 16.2. 11Layqakunapis Moisespa ñawpaqenman mana riyta aterqankuchu, imaraykuchus paykunapis, jinallataj tukuy Egipto llajtayojkunapis llejtiwan onqosqa karqanku. 12Chay tukuywanpis Moisesman Tata Dios nisqanman jina, faraón astawan sonqonta rumiyacherqa. Chayrayku Moisesta, Aarontawan ima mana kasuta ruwarqachu.
Chijchi para
13Chaymanta Tata Dios Moisesta nillarqataj: Q'aya paqarin tutamanta jatarispa, faraonta nimuy: Israelitakunaj Tata Diosnin nisunki: Kachariy israelitakunata, ch'innejman rispa yupaychamunawankupaj. 14Manachus kacharinki chayqa, kunan sinch'i ñak'ariyta tukuy Egiptoman kachaykamusaj qanpa contraykita, yanapajniykikunaj, chantá runaykikunaj contrankuta ima. Ajinamanta yachanki tukuy kay pachapi noqa jina mana waj dios kasqanta.
15Sichus noqa qanta, jinataj tukuy Egipto llajtayojkunata sinch'ita ñak'arichispa, may jina atiyniyoj kasqayta rikuchiykiman karqa chayqa, kay pachamanta chinkachisqaña kawaj karqa. 16Noqarí kawsanaykita munaniraj, atiyniyoj kasqayta rikunaykipaj, ajinamanta qannejta tukuy kay pachantinpi uyarisqa kanaypaj.#Ro 9.17. 17Chaywanpis qanqa aylluypa contranpi churanakushankiraj, manataj paykunata kachariyta munashankichu. 18Chayrayku q'aya, kunanta jina, jatuchaj chijchi parata parachimusaj. Chay jina chijchi paraqa Egipto rikhurisqanmantapacha mana ni jayk'aj karqachu. 19Chayrayku kachaspa, tukuy uywaykikunata kanchaman wisq'anaykipaj tantachimuy, jinallataj campopi imachus tiyapusojta. Sichus runa, chayrí ima uywallapis jawallapi qhepakonqa chayqa, chijchi para paykunata wañurachenqa, nispa.
20Ajinaqa faraonpa wakin yanapajninkuna Tata Diospa nisqanta uyarispa, manchachikorqanku. Chayrayku kamachinkunata, uywankukunatapis wasiman pakarqanku. 21Pikunachus Tata Diospa nisqanta mana kasuta ruwajkunarí kamachinkuta, uywankukunatapis jawallapi saqerqanku.
22Chantá Tata Dios Moisesta nillarqataj: Makiykita janajnejman oqhariy, tukuynin Egipto suyupi runakunaman, uywakunaman, tukuy q'omer kaj chhikaman ima chijchi para paramunanpaj, nispa.
23Chantá Moisés varanta janajnejman oqharerqa. Tata Diostaj tukuy Egipto suyuman illapata, chijchi paratawan ima kachaykamorqa. 24Chijchi paraqa illapaj t'ojyasqanwan khuska mana samarispa paramorqa. Chay jina chijchi paraqa Egipto suyu rikhurisqanmantapacha ni jayk'aj kasqachu.#Ap 8.7; 16.21. 25Chijchi paraqa Egiptopi tukuy imata t'unaykorqa. Runakunata, uywakunata wañuracherqa, jinallataj tukuy q'omer kajta ch'anqarparerqa, sach'akunatapis q'ara k'aspillata sayacherqa. 26Chaywanpis Gosenman, maypichus israelitakuna tiyakusharqanku, chaynejmanqa mana chijchi para chayarqachu.
27Chaymanta faraonqa Moisesta, Aarontawan ima wajyachispa, nerqa: Juchallini. Tata Dios cheqanta ruwan, noqawan, llajta masiykunawantajrí juchayoj kayku. 28Tata Diosmanta mañaychej ari, illapakuna, chijchi para ima sayananpaj. Chantá noqa kacharipusqaykichej, manaña astawan jark'asqaykichejchu, nispa.
29Moisestaj nerqa: Kay llajtamanta llojsiytawanpacha, makiyta oqharispa, Tata Diosmanta mañakusaj. Chantá illapakuna ch'inyanqa, chijchi parapis thañenqa. Ajina kanqa kay pacha Tata Diospata kasqanta yachanaykipaj. 30Chaywanpis noqa yachani, ni qan, nitaj kamachiykikunapis manaraj Tata Diosta manchachikusqaykichejta, nispa.
31Chijchi paraqa linota, cebadatawan ima sonqo nanayta ch'anqarparerqa, imaraykuchus cebada umasharqaña, linopis t'ikasharqaña. 32Trigotawan, centenotawanrí mana imanarqachu, imaraykuchus qhepatallata tarpusqankurayku manaraj p'utumorqachu.
33Moisesqa faraonpa qayllanmanta llojsispa, llajtamanta jawaman rerqa. Chantá makinta oqharispa, Tata Diosmanta mañakorqa. Jinataj chaypacha illapakuna, chijchi parawan ima thañiporqanku. Jinamanta illapakuna manaña karqachu. 34Chantá faraón, para thañisqanta, chijchipis, illapapis sayasqanta rikuspa, ujtawan juchallillarqataj. Chantá pay, jinallataj yanapajninkunapis astawan sonqonkuta rumiyacherqanku. 35Faraón sonqonta rumiyachispa, mana israelitakunata kacharipuyta munarqachu, Tata Dios Moisesnejta nisqanman jina.
Currently Selected:
Éxodo 9: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
