Khà Làng Bol 14
14
Làng bol tòmdră
1Tòm mang hơ̆ jơh làng bol tòm mpồl jơnum driau dờng ñìm rac. 2Jơh ală cau Israel yoam tòmdră mơ Môise mơ Arôn, jơh mpồl jơnum đơs mơ bol khai lah: “Niam rlau la bol hi neh chơt jơh tòm Ejiptơ! Hala tòm ƀlàng ngềt ngơt do! 3Ñchi bơh tài Yàng Jehôwa cèng bol hi tus hơ lơgar do nàng lòi bol hi gơpừ chơt bơh đào tiah? Ală bau ùr mơ ală kòn sau bol hi dê rơp kong kup cèng kung be phan cau tòmpìt geh. Ò di niam rlau bol hi in la rê wơl hơ Ejiptơ ò ơ?” 4Mơ bol khai đơs bal mơ gơp lah: “Bol he pal sac rwah dô nă cau at bồ mơ rê wơl hơ Ejiptơ.”
5Gen Môise mơ Arôn bic blup mat tòm ù di đap jơh mpồl jơnum cau Israel dê neh pơjum tềng hơ̆. 6Jôsue kòn klau Nun dê mơ Kalep kòn klau Jephune la ală cau tòm mpồl neh lòt rwang sền lơgar crè ồi ào bol khai dê 7mơ đơs mơ jơh mpồl jơnum Israel lah: “Lơgar bol hi neh lòt gan mơ rwang sền la niam ngan ò git nđò. 8Dilah Yàng Jehôwa niam nùs wèt mơ bol he, Kơnràñ rơp lam bol he mut tòm lơgar hơ̆ la lơgar bềng lìu dà toh mơ dà lơwe, mơ Kơnràñ rơp ai lơgar hơ̆ bol he in. 9#Heb 3:16.Mìng bañ tòmdră mơ Yàng Jehôwa, mơ bañ rngòt di làng bol tòm lơgar hơ̆, tài bơh bol he rơp sa loan bol khai, bol khai ò gam gơs bơta sền gàr, mơya Yàng Jehôwa ơm bal mơ bol he. Bañ rngòt di bol khai.”
10Mơya jơh mpồl jơnum bơyai cơm lŭ tơnchơt bàr nă cau hơ̆. Gen bơta gơklŏ Yàng Jehôwa dê tơlik să mơ jơh Israel di Sàl Tòm Mat. 11Yàng Jehôwa đơs mơ Môise lah: “Nđò jŏ làng bol do gam sền òsơp di Añ taih? Nđò jŏ bol khai gam ò bài dòn di Añ bulah Añ neh lơh jơh ală tềl krơi digùl bol khai taih? 12Añ rơp tơnchơt bol khai bơh pluh plàng mơ tơnroh bol khai, mơya Añ rơp lơh mê in gơlik gơs dô nơm làng bol dờng rlau mơ pràn rlau mơ bol khai.”
13 #
Lik 32:11-14. Mơya Môise đơs mơ Yàng Jehôwa lah: “Ală cau Ejiptơ rơp kơno bơh bơta hơ̆. Kơnràñ neh ngui gơnap gơnoar Kơnràñ dê mơ cèng làng bol do lik lòt bơh di bol khai. 14Mơ bol khai rơp yal ală cau in ơm tòm lơgar do bơh bơta hơ̆. Ơ Yàng Jehôwa, bol khai neh kơno lah Kơnràñ ơm bal mơ làng bol do, mơ ơ Yàng Jehôwa, Kơnràñ neh tơlik mat bol khai in sền gŏ, mhwal Kơnràñ dê gam ơm hơđang bol khai, mơ Kơnràñ lòt di đap bol khai tòm dô nơm jrong mhwal tòm trồ ngai mơ dô nơm jrong ồs tòm trồ mang 15Dilah Kơnràñ tơnchơt jơh làng bol do tòm dô dơ̆ lĕ, jơh ală làng bol neh kơno jơnau yal do bơh Kơnràñ gen rơp đơs lah: 16‘Yàng Jehôwa ò rgơi cèng làng bol do tus tòm lơgar mơ Kơnràñ neh srat să ho ai bol khai in; behơ̆ Kơnràñ neh tơnchơt bol khai tòm ƀlàng bràs.’ 17Tŭ do, dan bơta pràn kơldang Yàng Jehôwa dê geh ràng tơlik, tòm toh jat be Kơnràñ neh yal tơlik lah: 18#Lik 20:5-6; 34:6-7; Yalw 5:9-10; 7:9-10.‘Yàng Jehôwa la Bơtau òbat gơjrañ, bềng lìu bơta kòñ gơboh, toh glài mơ bơta tòmdră. Bulah Kơnràñ ò sang lòi bơta lơh glài cau tìs glài; Kơnràñ lơh glài ală kòn sau bơh tồi glài ală ồng pàng bol khai dê jơl tus di rài dơ̆ pe mơ dơ̆ poan.’ 19Jat bơta kòñ gơboh dờng Kơnràñ dê, dan toh bơta tồi glài làng bol do, tòm toh jat be Kơnràñ neh toh glài bol khai bơh tòm tŭ bol khai sang lòi Ejiptơ jơl tus di tŭ do.”
20Yàng Jehôwa ho lah: “Añ neh toh glài bol khai jat be jơnau mê neh dan. 21#Heb 3:18.Bulah behơ̆, di ngan kung be Añ kis mơ di ngan kung be bơta gơklŏ Yàng Jehôwa dê bềng lìu làm jơh plai ù, 22ò gơs dô nă cau klau lơi neh sền gŏ bơta gơklŏ Añ jê mơ ală tềl krơi Añ neh lơh tòm Ejiptơ mơ tòm ƀlàng ngềt ngơt mơya neh ò dòn bơr Añ mơ lòng Añ jơt dơ̆, 23ò gơs dô nă cau klau lơi tòm bol khai rơp sền gŏ lơgar mơ Añ neh srat să ho ai ală ồng pàng bol khai in. Cau lơi neh sền òsơp di Añ rơp ò gơs tŭ lơi sền gŏ ù tiah hơ̆. 24#Jôs 14:9-12.Mơya tài bơh cau duh broă Añ jê la Kalep gơs hwềng nùs krơi is mơ jơh nùs lòt jat Añ, Añ rơp cèng khai mut tòm lơgar mơ khai neh lòt tus, mơ kòn sau khai rơp dòp geh lơgar hơ̆ lơh gơs sre brê. 25Tài bơh cau Amalek mơ cau Kanaan ơm tòm ală thòng; ngai hìng, rê wơl tĕ mơ lòt tus hơ ƀlàng ngềt ngơt rò gah gùng lòt tus hơ Dàlềng Pơrhê.”
26Yàng Jehôwa đơs mơ Môise mơ Arôn lah: 27“Gam nđò jŏ tai mpồl jơnum iơh bơsak do yoam joh tòmdră mơ Añ taih? Añ neh kơno jơnau yoam mơ ƀoah cau Israel dê. 28Behơ̆ đơs tĕ mơ bol khai lah: ‘Yàng Jehôwa đơs lah: Di ngan be Añ kis, Añ rơp lơh di bol mê tòm toh jat be jơnau Añ neh kơno bol mê đơs: 29#Heb 3:17.Tòm ƀlàng ngềt ngơt do să jan bol mê dê rơp gơpừ chơt, hơ̆ la kòp nă tòm bol mê gơs bàr jơt nam mơ dờng rlau, la cau neh geh kòp tòm bơta kòp khà làng bol mơ neh yoam tòmdră mơ Añ. 30Ò gơs dô nă cau lơi tòm bol mê rơp mut tòm lơgar mơ Añ neh pò tê srat să lơh gơs hìu tòm bol mê in, lòi mìng Kalep kòn klau Jephune mơ Jôsue kòn klau Nun. 31Ai đah pơnah ală kòn sau bol mê dê mơ bol mê neh đơs lah rơp gơkòl kup lơh gơs phan tòmpìt geh, Añ rơp cèng bol khai mut tòm hơ̆ nàng hòn chò tòm lơgar mơ bol mê sang lòi. 32Mơya đah pơnah mơ bol mê gen să jan bol mê dê rơp gơpừ chơt tòm ƀlàng ngềt ngơt do. 33#Broă 7:36.Ală kòn sau bol mê dê rơp lơh gơs ală cau ê belàt#14:33 Gsc: lòt nrah nring. tòm ƀlàng ngềt ngơt do tòm poan jơt nam, kong bòl glar tài bơh bơta ò dòn song bol mê dê, jơl tus di tŭ să jan cau lồi dut tòm bol mê rơp gơpừ tòm ƀlàng ngềt ngơt. 34Tòm poan jơt nam, dô nam ala dô ngai, tòm poan jơt ngai bol mê lòt rwang sền lơgar; bol mê rơp kong bòl glar tài bơh tồi glài bol mê dê mơ git bơta Añ tòmdră mơ bol mê la mbe lơi. 35Añ la Yàng Jehôwa neh đơs behơ̆ mơ ngan la Añ rơp lơh gơs ală bơta hơ̆ gơwèt mơ jơh dô mpồl jơnum làng bol iơh bơsak do neh lơh gơs dô bă bal tòmdră mơ Añ. Bol khai rơp tus di bơta lồi dut bol khai dê tòm ƀlàng ngềt ngơt do; bol khai rơp chơt tềng do.’”
36Behơ̆ ală cau mơ Môise neh sồr lòt rwang sền lơgar, bol khai neh rê wơl mơ lơh jơh dô mpồl làng bol in yoam tòmdră mơ Môise bơh neh yal tòm làm jơh làng bol ală jơnau yal broă iơh bơh lơgar hơ̆. 37Ală cau neh yal jơnau iơh bơh lơgar hơ̆ gơkòl gơpừ chơt bơh bơta pluh plàng di đap Yàng Jehôwa. 38Tòm digùl ală cau neh lòt rwang sền lơgar, gơs mìng Jôsue kòn klau Nun mơ Kalep kòn klau Jephune gam kis.
39Tòm tŭ Môise yal wơl bơh bơta hơ̆ jơh ală cau Israel in git, bol khai ñìm rac ròc dờng ngan. 40Rìng àng drim hìng, bol khai guh hơ đah kơnhwàl kơh mơnơm jòng. Bol khai đơs lah: “Bol he neh tìs glài, bol he rơp guh hơ tiah mơ Yàng Jehôwa neh ho ai.” 41Mơya Môise đơs lah: “Ñchi bơh tài bol mê ò lơh jat jơnau sồr Yàng Jehôwa dê taih? Bơta bol mê lơh hơ̆ ò gơlik cồng nha niam ò! 42Bañ guh hơ tiah hơ̆, tài bơh Yàng Jehôwa ò ơm bal mơ bol mê. Bol mê rơp kong ală cau sò tơm di bol mê lơh alah, 43bơh ală cau Amalek mơ cau Kanaan rơp tòmdră mơ bol mê tềng hơ̆. Tài bơh bol mê neh wơlke bơh di Yàng Jehôwa, Kơnràñ rơp ò ơm bal mơ bol mê mơ bol mê rơp kong sreh tơnchơt.” 44Bulah behơ̆, tòm bơta kơldang bồ bol khai dê, làng bol guh hơ đah tiah kơh mơnơm, bulah Môise mơ Đài Bơta Ho Bal Yàng Jehôwa dê ò lik lòt bơh di sàl ơm. 45Gen cau Amalek mơ cau Kanaan ơm tòm tiah kơh mơnơm mù brồ lơh bol khai mơ pha rlau mơ bol khai tus di Horma.
Currently Selected:
Khà Làng Bol 14: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
