Khà Làng Bol 15
15
Boh lam bơh ală phan ơn ndai
1Yàng Jehôwa đơs mơ Môise lah: 2“Yal tĕ mơ cau Israel mơ đơs mơ bol khai lah: ‘Tơnơ̆ mơ tŭ bol mê neh mut tòm lơgar mơ Añ ai bol mê in ơm 3mơ bol mê ơn Yàng Jehôwa in ală phan ơn chu pơrguc, bơh di mpồl kơnrồ hala mpồl belàt lơh gơs phan ƀô bơlhu niam nùs Yàng Jehôwa, bulah la ală phan ơn chu pơrguc hala ală phan ơn duh khoai, bơh ală jơnau srat să ho nền hala bơh nùs kòñ ơn, hala phan ơn tòm ngai pơjum sa, 4gen cau cèng phan ơn khai dê pal ơn Yàng Jehôwa in dô nơm phan ơn mơ kòi mbo la dô pơnah jơt epha#15:4 pơgap 1 kg. kơmbuh phe rhền bơcă bal mơ dô pơnah poan hin mơñà.#15:4 pơgap 1 lit. 5Bal mơ kòp nơm belàt kòn ơn lơh gơs phan ơn chu pơrguc hala phan ơn duh khoai, rcang gơs tĕ dô pơnah poan hin#15:5 pơgap 1 lit. tơrnòm lơh gơs phan ơn pơdơng. 6Bal mơ dô nơm belàt dam rcang gơs tĕ dô nơm phan ơn mơ kòi mbo la bàr pơnah jơt epha#15:6 pơgap 2 kg. kơmbuh phe rhền bơcă bal mơ dô pơnah pe hin#15:6 pơgap 1,5 lit. mơñà, 7mơ dô pơnah pe hin tơrnòm lơh gơs phan ơn pơdơng. Ơn tĕ gơlơh gơs dô nơm phan ƀô bơlhu niam nùs Yàng Jehôwa. 8Tòm tŭ bol mê rcang gơs dô nơm kơnrồ dam gam dềt lơh gơs phan ơn chu pơrguc hala phan ơn duh khoai, bơh dô nơm jơnau srat să ho nền hala bơh dô nơm phan ơn pơdơng ring lơngai Yàng Jehôwa in, 9cèng tĕ bal mơ kơnrồ dam gam dềt hơ̆ dô nơm phan ơn mơ kòi mbo la pe pơnah jơt epha#15:9 pơgap 6,5 lit. kơmbuh phe rhền bơcă bal mơ nggùl hin#15:9 pơgap 2 lit. mơñà. 10Kung cèng tĕ nggùl hin tơrnòm lơh gơs phan ơn pơdơng. Hơ̆ rơp la dô nơm phan ơn chu pơrguc, ƀô bơkah niam nùs Yàng Jehôwa. 11Kòp nơm kơnrồ dam hala belàt dam, kòp nơm belàt kòn hala be kòn pal geh rcang tòm toh behơ̆. 12Lơh tĕ kòp nơm in tòm jơh ală phan mơ bol mê rcang gơs nàng ơn. 13Kòp nă cau deh tòm lơgar pal lơh ală bơta do jat gùng do tòm tŭ khai cèng dô nơm phan ơn chu pơrguc ƀô bơlhu niam nùs Yàng Jehôwa.
14Tòm ală rài rơp tus, tŭ lơi gơs dô nă cau làng bơdìh hala cau lơi ndai ơm kis digùl bol mê ơn dô nơm phan ơn chu pơrguc gơs ƀô bơlhu niam nùs Yàng Jehôwa, khai pal lơh jat tòm toh kung be bol mê lơh. 15Mpồl jơnum làng bol kung pal gơs ală sơnoa rnoas ndròm bal bol mê in mơ cau làng bơdìh in ơm kis digùl bol mê; hơ̆ la dô bơta lơh nền gam sùm ală rài rơp tus in. Bol mê mơ cau làng bơdìh rơp gơs ndròm bal di đap Yàng Jehôwa. 16#Leb 24:22.Bol mê mơ cau làng bơdìh ơm kis digùl bol mê rơp gơs ală bơta boh lam mơ ală bơta sồr lam ndròm bal.’”
17Yàng Jehôwa đơs mơ Môise lah: 18“Yal tĕ ală cau Israel in mơ đơs mơ bol khai lah: ‘Tòm tŭ bol mê mut tòm lơgar mơ Añ cèng bol mê tus 19mơ bol mê sa phan sa lơgar dê, ơn tĕ dô pơnah lơh gơs phan ơn duh khoai Yàng Jehôwa in. 20Ơn tĕ dô nơm ƀañ lơh gơs bơh phan sơnròp bol mê piah di mpal mơ ơn tĕ gơlơh gơs dô nơm phan ơn bơh di làn jă kòi. 21Tòm jơh ală rài rơp tus bol mê pal ơn phan ơn duh khoai do Yàng Jehôwa in bơh di phan sơnròp bol mê piah bơh di mpal.’”
Ală phan ơn bơh ală bơta tồi glài gơtup gơtơl
22“‘Mơ tai, dilah bol mê nisơna gơtup tìs tòm ală bơta sồr lam mơ Yàng Jehôwa neh ai Môise in, 23bulah la bơta sồr lam lơi Yàng Jehôwa dê neh kơnòm di khai mơ yal bol mê in, bơh di ngai Yàng Jehôwa neh ai ală bơta hơ̆ gơpơnjat sùm tus di ală rài rơp tus, 24mơ dilah bơta neh lơh hơ̆ la ò di bơh nùs kòñ lơh, la bơta mơ mpồl jơnum làng bol ò git lài, gen jơh dô mpồl jơnum làng bol dê pal ơn dô nơm kơnrồ dam gam dềt lơh gơs phan ơn chu pơrguc gơs ƀô bơlhu niam nùs Yàng Jehôwa, bal mơ phan ơn mơ kòi mbo be neh cih mơ phan ơn pơdơng, mơ dô nơm be dam lơh gơs phan ơn tơwài glài. 25Cau gơnoar ơn phan duh khoai pal lơh gơs bơta tơwài glài jơh mpồl jơnum làng bol in, mơ bol khai rơp geh toh glài, bơh bơta tìs hơ̆ ò di la bơh nùs kòñ, mơ bơh bơta lơh tìs bol khai dê gen bol khai pal cèng ơn Yàng Jehôwa in dô nơm phan ơn chu tòm ồs mơ dô nơm phan ơn tơwài glài. 26Jơh dô mpồl jơnum làng bol dê mơ ală cau làng bơdìh ơm kis digùl bol khai rơp geh toh glài tài bơh jơh làng bol neh gơs pơnah tòm bơta lơh tìs ò di bơh nùs kòñ bol khai dê.
27 #
Leb 4:27-31. Dilah hơ̆ la tồi glài gơtup gơtơl mìng dô nă cau lơm, khai pal cèng dô nơm be dra tơl dô nam nàng lơh gơs phan ơn tơwài glài. 28Cau gơnoar ơn phan duh khoai rơp lơh gơs bơta tơwài glài di đap Yàng Jehôwa bơh cau neh tìs tòm tồi glài gơtup gơtơl, mơ tòm tŭ bơta tơwài neh lơh gơs khai in rau gen khai rơp geh toh glài. 29Dô bơta boh lam do rơp lơh gơs kòp nă cau in tìs glài gơtup gơtơl, bulah khai la cau deh tòm lơgar hala cau làng bơdìh. 30Mơya cau lơi kư̆ kòñ tìs glài, bulah la cau deh tòm lơgar hala cau làng bơdìh, đơs tràl sơrbil di Yàng Jehôwa, gen cau hơ̆ pal kong tă sang bơh di làng bol khai dê. 31Tài bơh khai neh sền òsơp di jơnau Yàng Jehôwa dê mơ neh lơh tìs ală jơnau sồr Kơnràñ dê, cau hơ̆ ngan la pal kong tă sang; bơta tìs glài khai dê gơ ơm hơđang khai.’”
Cau lơh tìs ngai Saƀat kong tơnchơt
32Tòm tŭ ală cau Israel gam ơm tòm ƀlàng ngềt ngơt, dô nă cau klau neh cau bàn khai dòñ lòng tòm ngai Saƀat. 33Ală cau neh gŏ khai dòñ lòng tòm ngai Saƀat lam khai tus hơ Môise mơ Arôn bal mơ jơh dô mpồl jơnum làng bol, 34mơ bol khai jàm khai tòm hìu jàm, tài bơh bol khai òhềt git loh mbe kòñ lơh di cau hơ̆. 35Gen Yàng Jehôwa đơs mơ Môise lah: “Cau klau hơ̆ pal kong chơt. Jơh dô mpồl jơnum làng bol pal cơm lŭ tơnchơt khai di đah bơdìh sàl ơm.” 36Behơ̆ mpồl jơnum làng bol lam khai tus hơ đah bơdìh sàl ơm mơ cơm lŭ tơnchơt khai, tòm toh jat be jơnau Yàng Jehôwa neh sồr Môise.
Mbrùi tiang ào
37Yàng Jehôwa đơs mơ Môise lah: 38#Yalw 22:12.“Yal tĕ cau Israel in mơ đơs mơ bol khai lah: Tòm jơh ală rài rơp tus, bol mê pal lơh ală mbrùi di mum tiang ào, gơs che brài dà tơlir trồ tòm kòp mbrùi. 39Bol mê pal gơs ală mbrùi hơ̆ nàng sền gŏ mơ rơp kah wơl jơh ală jơnau sồr Yàng Jehôwa dê, tồ bol mê dòn bơr lơh jat ală jơnau hơ̆ mơ ò lơh să tòm bol mê tìs glài lòt jat ală bơta hàm kòñ nùs tồr mơ mat tòm bol mê dê. 40Gen bol mê rơp kah wơl mơ dòn bơr lơh jat jơh ală jơnau Añ sồr mơ rơp geh ơn is sàng goh Yàng Tom Trồ bol mê in. 41Añ la Jehôwa Yàng Tom Trồ bol mê dê, bơtau neh cèng bol mê lik bơh Ejiptơ nàng lơh gơs Yàng Tom Trồ bol mê dê. Añ la Jehôwa Yàng Tom Trồ bol mê dê.”
Currently Selected:
Khà Làng Bol 15: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
