Khà Làng Bol 13
13
Lòt rwang còp Kanaan
1Yàng Jehôwa đơs mơ Môise lah: 2“Sồr tĕ dô êt nă cau klau lòt rwang sền lơgar Kanaan la lơgar Añ ai cau Israel in. Bơh di kòp jơi bơtiàn, mê sồr tĕ dô nă tòm ală cau kwang at bồ bol khai dê.” 3Behơ̆, jat jơnau sồr Yàng Jehôwa dê. Môise sồr bol khai lik lòt bơh di ƀlàng ngềt ngơt Paran. Jơh tơl nă bol khai la ală cau kwang at bồ cau Israel dê. 4Do la sơnđan bol khai dê: Sammua kòn klau Jakkur bơh di jơi bơtiàn Ruben; 5Saphat kòn klau Hôri bơh di jơi bơtiàn Simeôn; 6Kalep kòn klau Jephune bơh di jơi bơtiàn Juda; 7Igal kòn klau Jôsep bơh di jơi bơtiàn Issaka; 8Hôse kòn klau Nun bơh di jơi bơtiàn Epraim; 9Palti kòn klau Raphu bơh di jơi bơtiàn Benjamin; 10Gakdiel kòn klau Sôdi bơh di jơi bơtiàn Jebulun; 11Gatdi kòn klau Susi bơh di jơi bơtiàn Manase (dô nơm jơi bơtiàn Jôsep dê); 12Ammiel kòn klau Gemalli bơh di jơi bơtiàn Dan; 13Sethur kòn klau Mikael bơh di jơi bơtiàn Aser; 14Nabi kòn klau Bopsi bơh di jơi bơtiàn Neptali; 15Geuel kòn klau Maki bơh di jơi bơtiàn Gat.
16Hơ̆ la sơnđan ală cau klau mơ Môise neh sồr lòt rwang sền lơgar. (Môise neh tơmoh sơnđan Hôse kòn klau Nun la Jôsue.)
17Tòm tŭ Môise sồr bol khai lòt rwang sền Kanaan gen khai đơs lah: “Lòt gan tĕ đah đơm lơgar tus hơ tiah kơh mơnơm. 18Sền tĕ lơgar mbe gơlơh, mơ làng bol ơm tềng hơ̆ la pràn hala lơbơn, ntum khà bol khai dê la dô êt hala oă. 19Lơgar bol khai ơm la mbe lơi? Gơ la niam hala iơh? Ală ƀòn dờng bol khai ơm la mbe lơi? Ală ƀòn dờng hơ̆ ò gơs dơrñang gùt dar hala geh kơp gàr kơ̆ cê? 20Ù tiah la mbe lơi? Gơ la bơkah lơngồt hala bơsàp? Gơs chi che hơđang ù hala ò? Pơnđơl tĕ pràn bol mê dê nàng cèng brê wơl dô êt plai lơgar hơ̆ dê.” (Tòm tŭ hơ̆ la di dê bồ kơnhai dum plai ño).
21Behơ̆ bol khai lik lòt mơ rwang sền lơgar bơh di ƀlàng ngềt ngơt Jin, tus hơ Rehôp, rềp Lebô Hamat. 22Bol khai guh tus hơ Negep, tus hơ Hebrôn; mơ Ahiman, Sesai mơ Talmai, cau Anak neh ơm tềng hơ̆. (Hebrôn neh geh bơt bơtào poh nam lài mơ Jôan tòm Ejiptơ.) 23Tòm tŭ bol khai tus hơ thòng Eskol,#13:23 Eskol: tòm jơnau Hebrơ gơs gơtha la dơrkum plai ño. bol khai koh dô nơm ntê gơs mìng dô dơrkum plai ño. Bàr nă tòm bol khai tùng gơ hơđang dô nơm gai bal mơ ală plai lừu mơ plai chi ƀal. 24Tiah hơ̆ geh sơnđan la thòng Eskol tài bơh dơrkum plai ño mơ cau Israel neh koh bơh tềng hơ̆.
25Tòm tŭ neh lồi poan jơt ngai bol khai rê wơl bơh di bơta lòt rwang sền lơgar.
Yal wơl bơh bơta lòt rwang sền lơgar
26Bol khai rê wơl hơ Môise mơ Arôn mơ mpồl jơnum cau Israel tòm Kades tòm ƀlàng ngềt ngơt Paran. Tềng hơ̆ bol khai yal wơl broă bol khai dê mơ Môise, Arôn mơ jơh mpồl jơnum mơ sơnio bol khai in ală plai lơgar dê.
27Bol khai yal wơl Môise in lah: “Bol hi neh lòt mut tòm lơgar mơ ală ồng neh sồr bol hi lòt rwang sền, mơ hơ̆ la dô nơm lơgar bềng lìu dà toh mơ dà lơwe! Do la ală plai lơgar hơ̆ dê. 28Mơya làng bol kis tềng hơ̆ pràn ngan mơ ală ƀòn dờng la kơ̆ cê mơ dờng ngan. Bol hi kung neh gŏ ală kòn sau Anak dê ơm tềng hơ̆. 29Ală cau Amalek ơm đah đơm; ală cau Hetit, cau Jebusit mơ cau Amôr ơm tòm tiah kơh mơnơm; ală cau Kanaan ơm rềp dàlềng mơ rò gah Jordan.”
30Gen Kalep lơh làng bol ơm pal ơm mŏ mŏ di đap#13:30 Rct: gơrwàng gùt dar. Môise mơ đơs lah: “Bol he pal guh mơ tòmpìt lơgar lơh gơs lơgar tòm bol he dê, bơh ngan la bol he rgơi lơh bơta hơ̆.” 31Mơya ală cau neh lòt bal mơ khai đơs lah: “Bol he ò rgơi brồ lơh làng bol hơ̆; bol khai pràn kơldang rlau mơ bol he.” 32Mơ bol khai yal wơl jơnau ò niam digùl ală cau Israel bơh lơgar mơ bol khai neh lòt sền rwang. Bol khai đơs lah: “Lơgar mơ bol hi neh rwang sền la dô nơm lơgar sa loan làng bol ơm tòm hơ̆. Jơh làng bol mơ bol hi neh gŏ tềng hơ̆ la cau dờng jơnhoa. 33#Sơnròp 6:4.Bol hi neh gŏ ală cau Nephilim ơm tềng hơ̆ (hơ̆ la ală kòn sau Anak tus bơh Nephilim). Bol hi sền să tòm bol hi gơlơh kung be ală srah nting, mơ bol khai sền di bol hi gơlơh kung behơ̆ sơl.”
Currently Selected:
Khà Làng Bol 13: KPM2018
Highlight
Copy
Compare
Share
Want to have your highlights saved across all your devices? Sign up or sign in
© 2018 United Bible Societies. All rights reserved.
