Mathiơ 26

Bơta jê sồt, bơta chơt mơ kis wơl Yàng Jesu dê

(26:1 – 28:20)

Kai gơrmơ̆i sòdră di Yàng Jesu

(Mak 14:1-2; Luka 22:1-2; Jang 11:45-53)

1Tơnơ̆ tŭ Yàng Jesu neh bơto ală jơnau hơ̆ rau, gen đơs mơ ală cau bơtê lah: 2#Lik 12:1-27.“Bol mê git lah gam bàr ngai tai, gen tus di bơta pơjum sa Lòt Gan, mơ Kòn Mơnus rơp gơkòl bơtào nàng pơng di chi pơng.”

3Tŭ hơ̆ ală cau gơnoar lam bồ ơn phan duh khoai mơ ală cau kwang kra làng bol dê pơjum tòm gơlang cau gơnoar dờng lam bồ ơn phan duh khoai sơnđan la Kaiphe, 4Tòmbơyai jòi kai gơrmơ̆i lac lèo mơ tơnchơt Yàng Jesu. 5Mơya bol khai đơs lah: “Ò di lơh bơta hơ̆ tòm bơta pơjum sa ò, rngòt gơlik bơta nggồr nggàc digùl làng bol mòn.”

Yàng Jesu geh bong mơñà tòm Bethani

(Mak 14:3-9; Jang 12:1-8)

6Tòm tŭ Yàng Jesu ơm tòm Bethani, tòm hìu Simôn la cau dun, 7#Luk 7:37-38.Gơs dô nă cau ùr at dô nơm gri mơ lŭ màng gơs mơñà ƀô bơlhu kas ngan tus hơ Kơnràñ mơ tuh hơđang bồ Kơnràñ tòm tŭ Kơnràñ nggui sa. 8Ală cau bơtê gŏ behơ̆ gen gơjrañ mơ đơs lah: “Ñchi bơh tài lơh roh ò kwơ be gen taih? 9Bơh mơñà ƀô bơlhu do rgơi tac geh oă jền nàng pà cau rƀah lơòi in.” 10Yàng Jesu git bơta hơ̆ gen đơs mơ bol khai lah: “Ñchi bơh tài bol mê lơh kalke cau ùr do in taih? Bơh khai neh lơh broă niam Añ in. 11#Yalw 15:11.Bơh bol mê gơs cau rƀah lơòi ơm sùm mơ bol mê, mơya bol mê ò gơs Añ ơm sùm mơ bol mê. 12Khai tuh mơñà ƀô bơlhu hơđang să jan Añ hơ̆ la nàng rcang tơp Añ. 13Di ngan Añ đơs mơ bol mê, làm jơh dunnia tòm tiah lơi gơs bơto yal Jơnau Niam do, gen kung yal wơl broă khai neh lơh hơ̆ nàng kah bơh khai.”

Cau pơrlơ̆ dră di Yàng Jesu

(Mak 14:10, 11; Luka 22:3-6)

14Tŭ hơ̆ gơs dô nă cau tòm jơt bàr nă cau bơtê sơnđan la Juda Iskariôt, lòt tus hơ ală cau gơnoar lam bồ ơn phan duh khoai, 15#Sac 11:12.Mơ đơs lah: “Ală ồng kòñ ai añ in nđò nàng añ bơtào Khai ală ồng in?” Gen bol khai ai Juda in pe jơt pet priă. 16Bơh tŭ hơ̆ Juda jòi tŭ lơmpah nàng bơtào Kơnràñ bol khai in.

Bơta pơjum sa Lòt Gan

(Mak 14:12-21; Luka 22:7-13; Jang 13:21-30)

17Mơ tai, tòm ngai sơnròp pơjum sa piang lă ò gơs kañ dê, ală cau bơtê tus hơ Yàng Jesu mơ đơs lah: “Ntềng đah Kơnàñ kòñ bol hi rcang yò sa bơta pơjum sa Lòt Gan taih?” 18Kơnràñ sồr lah: “Lòt tĕ tòm ƀòn dờng, tus hơ hìu dô nă cau ne, mơ đơs lah: ‘Cau Bơto đơs lah: Jơ Añ mòr di; Añ rơp pơjum sa Lòt gan tòm hìu mê dê bal mơ ală cau bơtê Añ jê.’” 19Ală cau bơtê lơh jat be jơnau Yàng Jesu neh sồr mơ rcang bơta pơjum sa Lòt Gan.

20Trồ mho rau Kơnràñ nggui sa bal mơ jơt bàr nă cau bơtê. 21Tòm tŭ sa Kơnràñ đơs lah: “Di ngan Añ đơs mơ bol mê, dô nă tòm bol mê rơp pơrlơ̆ dră di Añ.” 22Bol khai moat jrùng ngan mơ kòp nă lùp Kơnràñ lah: “Ơ Yàng, hơ̆ la añ ơ?” 23#Đơs Crih 41:9.Kơnràñ ho lah: “Cau neh iurŭ tê di prềng bal mơ Añ hơ̆ la cau rơp pơrlơ̆ dră di Añ. 24Kòn Mơnus lòt, jat be jơnau neh cih bơh Khai, mơya bòl glar cau do in la cau pơrlơ̆ dră di Kòn Mơnus! Chan ò deh khai la niam rlau.” 25Juda la cau pơrlơ̆ dră di Kơnràñ lùp lah: “Ơ Rabi, hơ̆ la añ ơ?” Kơnràñ ho lah: “Ngan be mê neh đơs.”

Bơta sa kah Yàng

(Mak 14:22-26; Luka 22:14-20; I Kôrintô 11:23-25)

26Tòm tŭ sa, Yàng Jesu ai piang lă, ưnngài, dơrkă, gen tong ală cau bơtê in mơ đơs lah: “Ai tĕ mơ sa, do la să jan añ.” 27Kơnràñ ai mơngàn, ưnngài, gen tong bol khai in mơ đơs lah: “Jơh tơl nă hùc tĕ, 28#Lik 24:8; Jer 31:31-34.bơh do la mhàm Añ, hơ̆ la mhàm bơta ho bal dê, neh tuh nàng kòp nă cau in geh toh glài. 29Mơya Añ đơs mơ bol mê, bơh do jơl hìng nau Añ ò hùc dà plai ño tai, jơl tus di ngai Añ rơp hùc dà plai ño pa bal mơ bol mê tòm lơgar Bèp Añ jê.

30Tòm tŭ neh đơs chò rau, Yàng Jesu mơ ală cau bơtê lik lòt tus hơ mơnơm Ôlibe.”

Jơnau yal lài Pier in

(Mak 14:27-31; Luka 22:31-34; Jang 13:36-38)

31 # Sac 13:7. Tŭ hơ̆ Kơnràñ đơs mơ bol khai lah: “Mang do jơh ală bol mê rơp gơtup tìs tài bơh Añ, bơh neh cih lah:

‘Añ rơp pù lơh cau ê belàt,

Gen mpồl belàt rơp gơprah gơpring.’

32 # Mat 28:16. Mơya tơnơ̆ mơ tŭ Añ geh kis wơl rau, gen Añ rơp lòt tus hơ Galile lài mơ bol mê.” 33Pier đơs lah: “Bulah jơh tơl nă gơtup tìs tài bơh Kơnràñ, mơya añ ò tŭ lơi gơtup tìs ò.” 34Yàng Jesu đơs lah: “Di ngan Añ đơs mơ mê, tòm mang do lài mơ tŭ iar nrau, gen mê rơp pơndang sang Añ pe dơ̆.” 35Pier đơs mơ Kơnràñ lah: “Bulah añ pal chơt bal mơ Kơnràñ, añ kung ò pơndang sang Kơnràñ ò.” Jơh tơl nă cau bơtê kung đơs behơ̆ sơl.

Yàng Jesu hòi dan tòm suơn Getsemane

(Mak 14:32-42; Luka 22:39-46)

36Gen Yàng Jesu mơ ală cau bơtê lòt tus hơ dô bă tiah sơnđan la Getsemane. Kơnràñ sồr ală cau bơtê lah: “Nggui tĕ tềng do, tòm tŭ Añ lòt hòi dan đah ne.” 37Kơnràñ lam Pier mơ bàr nă kòn Sebede dê lòt bal, Kơnràñ moat jrùng mơ dơrcul ngan. 38Kơnràñ đơs mơ bol khai lah: “Hwềng soàn Añ moat jrùng jơl chơt; ơm tĕ tềng do mơ drơng kơp bal mơ Añ.” 39Gen Kơnràñ lòt dô êt cơnđòa tai, blup mat tòm ù mơ hòi dan lah: “Ơ Bèp, dilah rgơi, dan lòi mơngàn do klàs bơh di Kòn; bulah behơ̆, ò di jat nùs kòñ Kòn dê, mơya jat nùs kòñ Bèp dê.” 40Gen Kơnràñ rê wơl hơ ală cau bơtê, gŏ bol khai lơhă bic, gen đơs mơ Pier lah: “Behơ̆ gen bol mê ò rgơi drơng kơp bal mơ Añ dô jơ ơ? 41Drơng kơp tĕ mơ hòi dan, nàng bol mê ò gơtơmut tòm bơta ơniai; Hwềng nùs kòñ ngan mơya poac să lơbơn lơño.” 42Kơnràñ lòt dơ̆ bàr tai mơ hòi dan lah: “Ơ Bèp, dilah mơngàn do ò rgơi klàs bơh di Kòn, mơ Kòn pal hùc, gen dan nùs kòñ Bèp gơs di.” 43Kơnràñ rê wơl tai, gŏ bol khai gam lơhă bic, bơh mat bol khai yồp yồi#26:43 Cil: bic ñhơm ñhơm. ngan. 44Kơnràñ lòi bol khai mơ lòt hòi dan dơ̆ pe, đơs tai be jơnau dan lài sơl. 45Gen Kơnràñ rê wơl mơ ală cau bơtê mơ đơs lah: “Tŭ do gam bic lơhă mơ rlô ơ? Do, jơ neh tus rềp, Kòn Mơnus rơp gơkòl bơtào tòm tê ală cau glài. 46Guh tĕ, lòt ih; ne, cau pơrlơ̆ dră di Añ neh tus rềp.”

Yàng Jesu kong cau kup

(Mak 14:43-50; Luka 22:47-53; Jang 18:3-12)

47Tòm tŭ Kơnràñ gam đơs, gen Juda la dô nă cau tòm jơt bàr nă cau bơtê, tus bal mơ dô mpồl cau oă at đào mơ gai, tus bơh ală cau gơnoar lam bồ ơn phan duh khoai mơ ală cau kwang kra làng bol dê. 48Mơ tai, cau pơrlơ̆ dră di Kơnràñ neh ai bol hơ̆ in dô nơm tềl mơ đơs lah: “Cau lơi añ cum, hơ̆ la cau hơ̆; kup tĕ khai.” 49Juda tus rềp mo di Yàng Jesu mơ đơs lah: “Rabi, niam să sơl?” Gen cum Kơnràñ. 50Gen Yàng Jesu đơs mơ khai lah: “Ơ bơyô, ñchi bơta mê kòñ lơh gen lơh tĕ?” Gen bol khai tus ai tê sơmbat kup Yàng Jesu.

51Ne, gơs dô nă tòm ală cau ơm bal mơ Yàng Jesu tă đào, lơh cau dĭ cau gơnoar dờng lam bồ ơn phan duh khoai dê, sreh tac dô đah tồr khai. 52Gen Yàng Jesu đơs lah: “Srồm tĕ đào tòm sơmprồm, bơh kòp nă cau lơi at đào gen rơp chơt bơh đào. 53Mê kơlôi lah Añ ò rgơi dan mơ Bèp Añ, gen Kơnràñ sồr mo rlau jơt bàr mpồl cau gơnrơh tus mơ Añ ò ơ? 54Mơya dilah behơ̆, gen mbe lơi Sră Goh gơlik di ngan nàng broă do pal gơlik gơs taih?” 55#Luk 19:47; 21:37.Tòm jơ hơ̆ Yàng Jesu đơs mơ mpồl làng bol lah: “Bol mê at đào mơ gai tus kup Añ be kup cau phà ơ? Kòp ngai Añ neh nggui bơto sồr tòm hìu duh khoai mơ bol mê ò kup Añ. 56Mơya jơh ală bơta do neh gơlik tus nàng jơnau ală cau gơnoar hwơr dê gơlik di ngan.” Tŭ hơ̆ jơh ală cau bơtê sang lòi Kơnràñ mơ dô.

Yàng Jesu ơm di đap mpồl kwang tơrña

(Mak 14:53-65; Luka 22:54-55, 63, 71; Jang 18:13-14,19-24)

57Ală cau kup Yàng Jesu lam Kơnràñ tus hơ Kaiphe la cau gơnoar dờng lam bồ ơn phan duh khoai; tềng hơ̆ ală cau bơto bơta boh lam mơ ală cau kwang kra ơm pơjum bal. 58Pier jat Kơnràñ ngài ngài tus di gơlang cau gơnoar dờng lam bồ ơn phan duh khoai dê, mut nggui bal mơ ală cau ling nàng sền bơta lồi dut broă hơ̆ la mbe lơi.

59Mơ tai, ală cau gơnoar lam bồ ơn phan duh khoai mơ jơh Mpồl Kwang Tơrña jòi jơnau lơh cơng blac di Yàng Jesu, nàng tơnchơt Kơnràñ. 60Bulah gơs oă cau tus lơh cơng blac, mơya bol khai jòi ò gơs cơng tàng lơi. Lồi tơnơ̆ gơs bàr nă cau tus, 61#Jang 2:19.Mơ đơs lah: “Cau do neh đơs: ‘Añ rgơi sòr tơrlah hìu duh khoai Yàng Tom Trồ dê gen bơtào gơs wơl tòm pe ngai.’” 62Cau gơnoar dờng lam bồ ơn phan duh khoai ntào đơs mơ Kơnràñ lah: “Mê ò ho wơl jơnau ală cau do lơh cơng yă mê ơ?” 63Mơya Yàng Jesu ơm mŏ mŏ. Cau gơnoar dờng lam bồ ơn phan duh khoai đơs mơ Kơnràñ lah: “Añ sồr mê sơnio Yàng Tom Trồ gam kis sùm, srat să mơ yal tĕ bol hi in, mê ngan la Bơtau Krist, Kòn Yàng Tom Trồ dê ơ?” 64#Đơs Crih 110:1; Dan 7:13.Yàng Jesu ho lah: “Ngan be ồng neh đơs. Mơya Añ đơs mơ bol mê, bơh do jơl hìng nau bol mê rơp gŏ Kòn Mơnus nggui đah ma Bơtau Gơnap Gơnoar dê, ơm hơđang mhwal trồ mơ tus.” 65#Leb 24:16.Gen cau gơnoar dờng lam bồ ơn phan duh khoai crè ào khai mơ đơs lah: “Khai neh đơs tràl sơrbil. Ñchi bơh tài bol he gam jòi cau ndai lơh cơng taih? Do, bol mê pa kơno jơnau tràl sơrbil hơ̆. 66Mbe bol mê kơlôi taih?” Bol khai ho lah: “Khai pal chơt.” 67#Esai 50:6.Gen bol khai choh di mat Kơnràñ mơ pòng lơh di Kơnràñ; cau ƀà pah Kơnràñ, 68Mơ đơs lah: “Ơ Bơtau Krist, đơs hwơr tĕ bol hi in! Ñcau neh pù lơh mê taih?”

Pier pơndang sang Yàng Jesu

(Mak 14:66-72; Luka 22:56-62; Jang 18:15-18, 25-27)

69Tŭ hơ̆ Pier ơm nggui đah bơdìh tòm ƀlàng. Gơs dô nă cau dĭ ùr tus đơs mơ khai lah: “Mê kung ơm bal mơ Jesu cau Galile.” 70Mơya Pier pơndang mo di đap bol khai lah: “Añ ò git ñchi ai đơs.” 71Tòm tŭ khai tus hơ rơng hìu dờng, gơs dô nă cau dĭ ùr ndai gŏ khai, gen đơs mơ ală cau ơm tềng hơ̆ lah: “Cau do kung ơm bal mơ Jesu cau Nasaret sơl.” 72Mơ Pier srat să pơndang tai lah: “Añ ò git cau hơ̆ ò.” 73Dô ơthoa tai, ală cau ntào tềng hơ̆ tus đơs mơ Pier lah: “Ngan mê kung bal mơ mpồl hơ̆, bơh sap đơs mê yal tơlik mê.” 74Gen khai srat rma mơ srat să lah: “Añ ò git cau hơ̆ ò.” Tŭ hơ̆ iar nrau mo. 75Pier kah wơl jơnau Yàng Jesu neh đơs lah: “Lài mơ tŭ iar nrau, mê rơp pơndang sang Añ pe dơ̆.” Gen khai lik lòt, ñìm rac ròc pơt wòl.

Currently Selected:

Mathiơ 26: KPM2018

Highlight

Copy