Romans 8
8
Iakoháwi Ne Kasatsʼténsera Tsi Nitʼtkáhas Nonikónra Neh Rawenní꞉ioke
1Iáh ónen thènen teskarewathatseráien tsi niʼiákon neh thóhʼnon niʼiakonʼnhétie skát꞉ne íken ne Kerístos Ié꞉sos. 2Asèken nahoianerénsera nonikónra, neh iontiónnhets tsi teionkwateriwahsóntere neh Kerístos Ié꞉sos, shatsiatotaríshon tsi nòkwa ne ahoianerénsera ne kariwáneren tánon ne kenhéion. 3Tsi nahóten ne kaianerénsera iáh tehiotónʼon tsi naioiéren, neh iorihónʼni sóhtsi iotsihióhakwe tsi niʼiakonnhóten nónkwe, tsi naháiere ne Rawenni꞉io, waharéwate ne kariwáneren neh꞉ne tsi niwátstha tsi nihiakonnhótens ne ónhkwe tsi tahothéniete nénskat khók roiénha, neh꞉ne ahariwáthonʼne ne kariwáneren. 4Rawenni꞉io kíʼ thoʼnahása, neh tsi niwésaks ne kaianerénsera ne tkariwaiéri. Neh꞉ne kwáh thokènhen aihtewariwakanón꞉ni, tsi thónon niʼionkwathaihtáke neh꞉ne tsi niʼiáwens nhonikónra. Nók iáh neh tsi niʼiáwens tsi niʼiakorenʼnáhon nónkwe. 5Tsi niháti neh thóhʼnon niʼonhnonnhétie tsi niʼiorihióten ne ratiʼierónkes, tánon tsi niwaskáneks ne rathiʼiéronke neh tsioniarhótharon neh rahonanonthonʼnióntsera. Tsi niháti neh thóhʼnon niʼonhnonʼnhétie tsi nisakoróris ne Rawenni꞉io, tánon Rawenni꞉io thoʼniaróhtaron ne rahonanonthonʼnióntseras kwáh tsi nitʼthaskáneks. 6Tóhka nek khók ensanonthonʼniónseke tsi nitewaskáneks ne tiéronke neh ensaʼrhióte, nók kíʼ tòhka nek khók ensanonthonʼniónseke ne Rawenni꞉io rahoriwasónhas kwáh nen꞉ne oriwihioʼónwe ensónʼnheke tánon ensaiéntake ne skén꞉nen. 7Asèken tòhka nonikónra tiókonte owarón꞉ne non iewanontónʼnions ronikonratsátha ne Rawenni꞉io; áseh kén iáh tehontewennarákwa ne Rawenni꞉io rahoianerénsera, tánon ó꞉ni kwáh oriwí꞉io tsi iáh tahatikwéni nahontewénnaraʼkwe. 8Tsi niháti neh nek khók rothihióte ne ahontahontaʼtehnikonraiérite, iáh neh takakwéni naʼontahonwanikonraiérite ne Rawenni꞉io.
9Nók iáh kíʼ owarón꞉ne non tesanikonrahnentákon; neh saháwi tsi nisaróris nonikónra, ne sehnèkwa, Rawenni꞉io rahonikónra saháwi. Ónhka kíʼ ók iáh teháhawe neh Kerístos rahonikónra iáh kíʼ rahónha tehahonkwéta. 10Nók tòhka seh nikwékon ne Kerístos, neh nonikónra enkarihón꞉ni tsi ensónʼnheke. Éhthoh nenshiére iawerohátsien ne saieróntha tsi enkénheie neh꞉ne kariwáneren enkarihón꞉ni; tánon Kerístos kíʼ éhʼthoh nihoriwakanón꞉ni neh iorihónʼni neh tsi tiesariwiʼiosténʼni rahohénton ne Rawenni꞉io. 11Tóhka ne Rahonikónra ne Rawenni꞉io, tsi raónha shokhétskwen ne Ié꞉sos ne kenheiátʼne, seh nikwékon, éhʼtho káti tsi nikáien shokhétskwen ne Kerístos ne kenheiátʼne, neh káti ó꞉ni enrónʼnhete tsi nihiotsihióha sewaieróntas ne tsi niwéhne tsi sehwakwékon ne rahonikónra.
12Éhʼtho káti, tewatenrosónhas, ionkwateriwaiénʼni, nók nehʼne tóhsa thoʼní꞉ioht tsi aihtionʼnhétie tsi niwaskáneks nonkwáhieronta. 13Asehken tòhka thoʼní꞉ioht tsi entsioʼianénhawe naihtiónʼnheke neh tionháke, kwáh ensewénheie; nók kih tòhka nonikónra saiénawaʼse ne kwáh iaonhtsiáksʼtsi tsi nisaiérha ne sariwaneraháktsera. 14Tsi niháti neh꞉ne rotiháwi neh Rawenni꞉io Rahonikónra raónha Rawenni꞉io sakoienhokón꞉a. 15Nonikónra nètho Rawenni꞉io thiáwi iáh neh tesonniénʼnis ne senáskwa akénhake ó꞉ni naihsónnien naihsaterónseke; khék nonikónra neh sonniénʼnis ne Rawenni꞉io iaiénha akénhake, tánon kíʼ nahosatsʼténsera nonikónra iontionniénʼnis natsitewaróhri ne Rawenni꞉io “Rákeni! Í꞉se Takwaiénha!” 16Rawenni꞉io Rahonikónra tánon nonkwanikónra tetsiáron tsiatʼrhóris tsi Rawenni꞉io seh sonkwaienhokónha. 17Tsi náhe raónha sonkwaʼiohokón꞉a enkénhake, entewaiéna neh kahiataterítʼtseras ne sakonónstati neh rahonkwetaʼsón꞉a, tánon káti ó꞉ni satenʼionkwawénhake ne Kerístos tsi nahóten ne Rawenni꞉io rorakwén꞉ni; tòhka síken knaiawén꞉ne thoʼní꞉ioht tsi aitewaroniáken tsi nihoroniakén꞉en ne Kerístos, ehʼthóhne káti entewaiéna ne kaiatanerakwátsera tsi nihoienáʼon ne raónha.
Táweh Ne Kahiatanerakwátsera
18Watʼtiatórete tsi niʼionkwaronhiakénʼen tsi nióre nónwah iáh tahónton nehʼne tahontahionteniéntenste neh kahiatanerakwátsera nen ionkhirihotáshase 19Akwékon nahoténsons ne Rawenni꞉io rohsahánion iotiráres neh naiáwen ne Rawenni꞉io asakorihotáshiaʼse neh sakoienhokónhas. 20Rawenni꞉io waharíwente akwékon tsi nahoténsons kasahánion naionáti tsi nihiothirihóten, iáh ohnónha thoʼtihiotirihón꞉ni, nók neh kíʼ tsi Rawenni꞉io thoʼní꞉ioht tsi hiathoriwaiéntase. Iáh kíʼ thènen tehiotiéren Rawenni꞉io neh kíʼ raskánekskwe 21ne kasahánion iatekaiáti kátkek iensewatatewenʼní꞉ioʼne tsi konwahnaskónʼni neh꞉ne tóhsa ahiótʼken nók akaiéna ne kahiatanerakwátsera rahonathatewenniʼhiótsera ne Rawenni꞉io sakoienokónha. 22Asèken ionkwateriéntare nónwa tsi nióre niwatʼtháwi akwékon tsi nahoténson kasahánion ioroniáken tsi nihiokararénserons, kwáh tsi ní꞉ioht naiakowiraiéntaʼne. 23Nók iáh kíʼ nek khók tèken tsi nahoténsons ne kashahánion; onhtionháke nón nikénteron nonikónra, neh tewatierénta tesonkwáwis ne Rawenni꞉io káti ó꞉ni skát꞉ke tsi ionkwanikonranónwaks, tsi nihionkwárare ne Rawenni꞉io thoʼní꞉ioht tsi ahsonkwakenhénion tsi síken ní꞉ioht neh rahónha sonkwaiohokónhas íken, tánon ó꞉ni kwáh tewahiatakwékon tsi ahonsontatewenní꞉ioʼne. 24Asèken askanektserákon non nitsiawénon tsi tionkwaniakénʼen; nók tòhka aitewatkátho tsi nahóten tewaskáneks, kwáh káti iáh thènen askanéktsera tahonsakénhake, Asèken ónhka tsi nítsion tsi tewasʼkáneks nónen thènen iokwatʼkáton? 25Nók tòhka neh tewaskáneks tsi nahóten neh iáh tehionkwatʼkáthon, thetewahwisʼsátsʼte kíʼ tsi ionkwárare.
26Kwáh kíʼ neh saoríhwa nononikónra tewètha naionkwaiénawaseh, kwáh tsi ní꞉ioht tsi ionkwaʼtsihióha. Asèken iáh tehionkwateriéntare onhní꞉ioht tsi ahitewaterénʼnaien; íʼonhkwariwáke nonikónra tsi roniténtase ne Rawenni꞉io, tsi nihionikonranónwaks iáh taiewenʼnhatʼtshénri nehʼtaiéron. 27Tánon neh Rawenni꞉io, kwáh onhkweʼriah꞉ne non iatehakanere, rhoteriéntare tsi niwanonthónʼnions nonikónra; Asèken nonikónra ónhkwe ahkoriwake tsi roniténtase ne Rawenní꞉io tánon neh entsioʼhianénhawe tsi nihoskhanektseróten.
28Kwáh ohriwakwékons ionkwateriéntare ne Rawenni꞉io ioʼiáneres tsi nishakotsérahse tsi niʼiákon ne ronwanorónkwa, tsi niháti ne sakhoʼnháʼon, ne entioianénhawe tsi nihoskanektseróten. 29Tsi nihʼiákon ne Rawenni꞉io ónenk sakohiatarákwen tánon ó꞉ni sakokwatakwenʼni kwáh thoʼnahatiʼiatotenhake tsi ní꞉ioht ne Roiénha, neh káti neh Roiénha entakowanénke tsi nihátis nathatekénseras. 30Éhʼtho káti tsi niháti ne Rawenni꞉io sakohiatarákwen, iesakonáton; tánon tsi niháti ne iesakonáton, sahsakoriwakwathákwaʼse tsi natehóntere, tánon ó꞉ni tasakáwen neh rahohiatanerakwátsera.
Rahonháke Ne Ié꞉sos Kerístos Non Nihawenéston Ne Rawenni꞉io Tsi Nisonkwanorónkwa.
31Tsi akwékon kíʼ neh tewanontónʼnions, onh nahóten aihtewahkwéni aihtewénron? Tóhkaʼ neh Rawenni꞉io tewakwékon, ónhka káti aiekwéni nahionkihiatʼkónten. 32Sékon ó꞉ni neh kwáh roiénha iáh kih tehonónsthaton ne tóhsa aharoniáken, nók wahahónnien nahonthasónkwaʼne! Tsi wahshóntion neh Roiénha—iáh káti onhtèken ó꞉ni kwáh skenénstsi tsi entesóntion nohiáshon nihiorihoténsons? 33Ónhka ahiekwéni ahonwathiriwáhro neh Rawenni꞉io rahonkwetaʼsónha? Rahóna ne Rawenni꞉io sakoróris iáh tehothiníkon! 34Ónhka káti ónhte, ahiekwéni nahonwathiríwente? Kwáh iáh ónhka taiekwéni nahonwathiríwente, Kerístos Ié꞉sos rahónha neh rawenhéionʼne, tánon kíʼ áhre, tsi nikáien neh sonwakhétskwen tsi srónʼne tánon tsi raweientethákwen ne Rawenni꞉io ísrhes. Í꞉i onhkwariwáke tsi roniténthaʼse neh Rawenni꞉io rahohénton! 35Ónhka káti, ahiekwé꞉ni neh tahonwahsiotaríʼsih ne Kerístos tsi nikáien ne shonkwanorónkwa? Ne kariwahʼhétken ahkakwé꞉ni onhtèken, tòhka ó꞉ni neh thènen ahionkwanorónsten tòhka ó꞉ni neh thènen karonhiakénsera tòhka ó꞉ni natonkariákon tòhka ó꞉ni katentetserákon tòhka ó꞉ni ne thènen ahiotʼterontónhake tòhka ó꞉ni ne kenhéhiat? 36Tsi niwáton nohiatonseratokénti,
“Kwáh tsi niatewenniseráke nonkwesónha teionkihionnaríkʼkons nahionkihiásehʼte níse sarihónʼniat;
thonitiónkihte tsi ní꞉ioht ne teiotinakarontónha nakonwatírio.”
37Iáh, kíʼ noriwakwékons kwáh ionkwáien natesenniéntsera rahonháke tsi nikáien neh shonkwanorónkwahon! 38Kwáh wahkeriwaníron tsi iáh thènen takakwéni neh tahionkwakáshase tsi nòkwa ne rahononronkwátsera; kwa iáh thènen tewahsterístha tohkàken ahitewénheie tòhka ó꞉ni nahitiónʼnheke; ratironhiakerónons, ratirorásons, tánon neh tkasatsʼténseras ne karonhiáke iáh takakwéni ne tahionkwakháshases ne rahononronkwátsera, tánon tsi niʼiawénserons nónwa ó꞉ni tsi neniawénseron tsi niahawenonhátie iáh takakwéni ne tahionkwakháshion ne rahononronkwátsera, 39tánon iáh ó꞉ni tsi nahóten ne éhneken iothohetsʼtákwen ne tsi ionwentsiáte tòhka ó꞉ni nahóten ne nàkon iothohetsʼtákwen ne tsi ionwentsiáte takakwéni ne tahionkwakʼkháshion ne rahononronkwátsera ne Rawenni꞉io neh tsi Ié꞉sos Kerístos Sonkwaiáner sonkwasenhénʼni.
Currently Selected:
Romans 8: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
