Romans 7
7
“Kaniáktsera Ahoʼianerénsera”
1Kwáh thoʼkén꞉en ensanikonraiéntaʼne tsi nahóten enkíron, tewatenrosónhas, ne tsi sewakwékon sewaianerenseraʼientéri. Ne kaianerénsera tokʼkhók nióre iakotiatakweniʼióstha nonkwesónhas tsik nikaríwes iakónʼnhe. 2Ne ioniákon, tekariwaráston, neh ioneriénsthon ne kaniáktsera kaianerénsera tsi nòkwa ne róhne tsi nikaríwes enrónʼnheke, nók nónen enrénheie, sontatewenʼní꞉ioʼne tsi nòkwa ne kaianerénsera ne teiakonerénstonʼne ne rhothiniákonʼne. 3Nekáti, tòhka ohiaʼtheshiatsiásete ne rónkwe neh sékon rhothiniákon neh róhne, ne enkonwanathónkwaʼke watenakwaiesátha; nók kíʼ tòhka enrénheie ne róhne, kwáh kaiatanánon sontatewenní꞉ioʼne tánon iáh ó꞉ni teioriwanerahakténnis ne kaniáktsera tòhka óia ensewatateniátʼten. 4Ne aoríwa thonónnise ní꞉ioht ne tionhakéson, tewatatékens. Tsi shíken ní꞉ioht naihsewenhéion, tsi nióre iekéntons ne kaianerénsera, ne tsi éhʼtho sewahiatanentánon ne raiatátake ne Kerístos; ónen káti rahónha rahonkwéta sewatónʼon tsi nikáien ne sonwákheskwe ne kenheiátne ehnahontáwe khnahótenk aihtewarihontáko natsitewahiótense ne Rawenni꞉io. 5Tóhka thoʼní꞉ioht tsi entewathonʼnhaténti tsi nahitewanonwésekes ne iatethewaiáti, ne kaianerénsera hiontionniénʼnis naihtewariwánerake, káti kí꞉ken naskanéktseras neh enhiontiónnien nahitewénheie. 6Nónwa, tsi niʼiáwenhe, Rawenni꞉io sesonkwanerénshon, neh tsi aionkwenhéion tsi nióre ne kaianerénsera aoriwáke, neh ionkwaneréktonʼne. Iáh ónen thóhʼnon thetionkwataténron noriwakáion tsi nikahiatónʼnionkwe ne kaianerénsera, nók neh nonikonráses.
Kaianerénsera Tanon Ne Kariwáneren
7Nekáti kén aihtewénron, ne iatekaiáti ne kaianerénsera kwáh aóskon kariwáneren? Kwáh káti iáh thotèhiot! Nók kíʼ kaianerénsera onkehnésten nahóten nen꞉ne ne kariwáneren. Tóhka iáh ne kaianerénsera tahiáwen, “Tó꞉sa sehiaskà꞉nek nakorénhson nahó꞉ten ahiakoiéntake,” iáh nonwénton tahontienteráhon neh niwaskanektierhóten. 8Nók tsi nikéntons natsiawenrátsera wahiotesenʼnaiénthaʼne ne kariwáneren ne tahonkenikonráren kwáh tsik nahorihohténson nahonkathetʼtséntake ó꞉ni nahonkaskanékten nakonháke. Nahiotáron ne kaianerénsera, ne kariwáneren kenhéion íken. 9Í꞉i ne iatetiáti tewenniserátekwe thóhʼnon nikonnetiénekwe kwáh iáh thènen tèkenʼne neh kaianerénsera, nók sontsiatorén꞉ne neh ahtsawenrátsera, ne kariwáneren onthónʼnhete. 10Tánon wakíheie. Tanon nahtsawenrátʼtsera tsi neh kéntonskwe nahontahióha nathónʼnhets, nók neh wakarihón꞉ni naʼonkréwahte nakíheie. 11Kariwáneren wahkatʼtsénri nahiotesenʼnaiéntaʼne, ó꞉ni tsi nikéntons nahtsawenrátʼtsera neh onkenikonráhten ó꞉ni onkerí꞉io.
12Thoʼkáti, ne kaianerénsera iotokénti, ó꞉ni nahtsawenretiéra iotokénti nón꞉ne, tkaiéri, tánon ioiánere. 13Nók neh kén kéntons tsi nahóten ne ioiánere ne wakarihón꞉ni onkéʼrhiote? Iáh neh tekéntons! Kariwáneren thoʼnakásha; neh wakaniáhese ne ioiánereh, kariwáner en takáhawe ne kenhéion nakonháke, ehʼnahontáwe tsi niʼiorenʼnáhon ne kariwáneren nahiotáshon, Tanon káti, tsi nikéntons natsawenréhtsera kariwáneren wakonwéneste tsi sénha tehiotenonʼianíthon ioriwahtsáni.
Tsi Nahteionkwatatenikónrare
14Ne kaianerénsera neh kéntons nonkwanikónra; nók iáh tekonʼnhéhonwe, ionkatenʼnínon tsi shíken ní꞉ioht ne rahnáskwa ne kariwanerenháktsera. 15Kwáh iáh tewakenikonraiéntas tsi nikatiéra; Asèken iáh thotetiéra tsi nikaskáneks tsi nátiere, nók nehʼhe ken nietiéra tsi nahóten ne íkshons. 16Tsi neh ken nietiéra tsi nahóten ne iáh neh tèkereh ne kén niátiere, neh kíʼ wenéstha tsi keriwanónwes ne kaianerénsera tsi tkaiérits. 17Kwáh káti iáh iʼtèken kíʼ neh nitiérah; nekáti ne kariwáneren tsi nihión꞉nhe nakweriáne. 18Wahkateriéntare nahoténsons neh iotkwéniens iáh teiakenikwékon—neh tsi niʼiohrenʼnáhon ne tierónke. Iawerohátien tsi wákrhe naskanéktsera neh thoʼnátiere nahóten neh iotkwéniens, iáh tatkwéni neh thonátiere. 19Iáh neh kén tsientiéra neh tkariwaiéris; óʼias, neh꞉ne kariwáksens kén nietiéra iáh nènʼne neh tèkerhe. 20Tóhkaʼ ne ehʼnéntiere tsi nahóten ne iáh tèkereh, neh kíʼ kéntons iáh ónen í꞉i éhʼtho testiérah, nók neh kíʼ ne kariwáneren neh wahkatewehiaténʼni.
21Éhʼtho káti ní꞉hiot tsi ketʼtsiénries kí꞉ken kaianerénsera tsi iohiothátie; neh káti ónen ìkereh neh thoʼnátierhe ne tkariwaiéri, nahóten neh kariwáksen nek khók wáhtsien. 22Nakweriáne kwáh wahtsiennonʼniathákwa tsi nitkáhas neh Rawenni꞉io rahohianerénsera. 23Nók katʼkáthos kwáh thikaianerénserate iohióte natiéronke—kaianerénsera neh꞉ne iórhios neh kaianerénsera tsi niwakeriwaniráton nakenikónrake. Wahkonʼniénʼnis nahonkatenaskónniate ne kariwáneren ahoianerénsera tsi niʼióhiote natiéronke. 24Tsi ní iáh tewakhastsenʼnón꞉ni kí꞉ken kónkwe! Ónka éntion keniákenteh kí꞉ken oierónta hiahontiatenhawitonhátie neh kenheiátʼne? 25Tehonwanonweráton neh Rawenni꞉io, tsi kíʼ ehnihaiérah rahonháke ne Ié꞉sos Kerístos!
Kí꞉ken, tsi iehiotéson, tenkeriwáhraste; kwáh hiatetiáti akʼkwéni natiótense neh Rawenni꞉io rahohianerénsera nek iekénha nakenikónra, nók tsi nihiorenʼnáhon ne tiéronke iohiótense ne kariwáneren kaianerénsera.
Currently Selected:
Romans 7: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
