Romans 15
15
Taietʼtsinikonraiérit Nakorénsons, Nók Tóhsa Níse
1Tsi nítsion ne tewasátsʼten tsi nòkwati ne tewethákwen aiehthiriwáhwaʼse ne rotitsihióha naihtewatʼkéthaʼte ne rahothiriénʼnas, Iáh tatehiothonwentióʼon nahitewathatenikonraiériʼte. 2Khék, teiothonwentióʼon nakorénson aonʼtaietʼthinikonraiériʼte tsi nikáien ne thothinikonrakontákwen tsi ronnónha rahothiʼiatakenhátsera, ehnahontáwe ahathisátsʼtenʼne tsi nòkwati ne tewehthákwen. 3Asèken ne Kerístos iáh rahónhak khók tethotʼthatenikonraieríton. Khék, tsi niwáthon noriwatokéntis, “Tsi nahóten iesénʼni nonkwesónha neh sahesanikonrakaréwaʼte ónen í꞉i sontiatakári.” 4Kwáh tsi niateioriwáke kaiatónnion nohiathonseratokentíke neh kahiathónkwen naionkwariʼhónnien, ehnaʼontáwe nonʼtiérenk aionkwarahratieraiéntaʼne tsi nitsionkwáwis noriwatokénti naionkwanikonkátsʼteke tánon ó꞉ni ionkwaretiárons. 5Tánon ionkwaterennaiéntat rahonháke ne Rawenni꞉io, tsi nón tkáien ne kanikonriʼiótsera tánon ne kanikonranirátʼtsera, aihsewaiénawaʼse sakanikónrak akénhake, ehʼnahisewáiere tsi nihoiéren ne Kerístos Ié꞉sos, 6Kwáh káti sewakwékon iatahisewátieste skanikónrak akénhake tsi atsisewasénnaien ne Rawenni꞉io ó꞉ni neh Roiénha ne sonkwaiáner Ié꞉sos Kerístos.
Ne Kariwíʼios Ronwathiróri Nòn꞉ne Neh Iáh Tehotiriwiʼióstons
7Tesewatatʼkweniénstak, etʼthóhʼne, káti, kwáh tsi ní꞉ioht ne Kerístos tsi ehtsisewakweniénston; thóh nasewáier ehnahontáwe nonkwesónha tahonwanonweráthon ne Rawenni꞉io. 8Asèken kwahróris ne Kerístos tsi rónʼnhekwe ne nòn꞉ne sakoiotenséhaʼkwe ne Sitaeró꞉nons, ne naréneste neh Rawenni꞉io tsi roriwatóken, neh kíʼ, nahónton tsi nahóten ne Rawenni꞉io sakorarasténni ne ronwatinihokonkénhens ehnaiáwenʼne, 9tánon nahothiʼiénawaʼse ne iáh tehatisitaeronons ne tahonwanonweráton ne Rawenni꞉io rahotanitenráhtsera. Tsi niwáton noiatonseratokénti,
“Tanon káti nónen skát꞉ne iákwes ne iáh tehatisitaerónons tenkonnonweráton;
tenkonriwáhkwaʼse.”
10Àrok sékon sewáton noiatonseratokénti,
“I꞉se ne iáh tesewasitaeronons, skát꞉ne sewatonnharónnion ne Rawenni꞉io sakoiatarákwen!”
11Tánon àrok sékon,
“Thetsisewanonweráton ne Roiá꞉ner, sewakwékon ne iáh tesewasitaeronons;
tsi sewasénnaien, kwáh sewentiokwakwékon!”
12Tánon áreh, tsi niháwen ne Isaiah,
“Tsi nithotwahtsirínon ne Jesse enhatotáshon,
Éntʼreh nasakohentéseh ne iáh tehatiʼsitaerónons,
tánon rahonháke non nenhatíʼien neh rahonaskanéktseras.”
13Rinekénnis ne Rawenni꞉io, tsi nikáien tesonkwáwis naskanéktseras, ahiaiatánaʼne natʼtsennonniátseras tánon ne skénnen neh tsi nitseniahésen, neh káti ne iakakontákwen nahontehiáron ne saskanéktsera neh akenikwékon ne rahosatsʼténsera ne Ronikonriʼióston.
Kór Ranikonraientátha Nontiéren Tsi Rothetsaníton Tsi Nihohiatónnion
14Tewatenroshónhas: kwáh iaʼtetiáti keriwanírats ne tionhakésons kwáh íken tsi sewathonkwetakwaríshons, akwékon niesewáhaʼwe natʼthokhátsera, tánon ó꞉ni sewakwénion ne taisewataterihónnien. 15Nók neh kikahiatónhsera kwáh iáh othénen tewakótaron tsi nahorihoténshons sakwehiarákwen, kwáh íken tsi iewakenikonrakontákwen neh karihónnis tsi nikahiotenserótens ne Rawenni꞉io rakenáhon. 16Ne tsi rihiótense ne Kerístos Ié꞉sos nakhehiótense ne iáh tehatiʼsitaeronons. Watsióte tsi ní꞉ioht ne ratsihénstatsi ne kateriwahnhótha ne kariwí꞉ios ne Rawenní꞉ioke nitsawénon, ehnahontáwe ne iáh tehotiʼiánere nahontatiatakéna nahontahonwanikonraiériʼte ne Rawenni꞉io, neh tsi nihoriwathokenstén꞉ni ne Ronikonriʼióston ne Rawenni꞉io. 17Tsi teiakeníkʼken ne Kerístos Ié꞉sos, nekíʼ, enkʼkwé꞉ni nakenaiéhake tsi rihiótense ne Rawenni꞉io. 18Entewakenikonrahkontákwen ó꞉ni nek khók enkatróri tsi nihoiéren ne Kerístos nakonháke nakheiasáriʼne ne iáhʼtehatiʼsitaeronons neh꞉ne ahonwawénnaraʼkwe ne Rawenni꞉io. Neh iorihónʼni tsi nikawennhóten wakathatíhon ó꞉ni nakeweiénʼna, 19Ne kasatsʼténsera tsini watieronnísta ne ioriwanerakwaténions, ó꞉ni nahosatsʼténsera ne Rawenni꞉io Rahonikónra. Tanon káti, tsi nitewakatʼtahínon ne Jerusalem tsi nióre ne Illyricum, kwáh tewakeriwasaháthon tsi wakateriwánote ne kariwí꞉ios ne Kerístos rahonháke. 20Énskat khók tsi nahóten tiókonte kaskáneks neh꞉ne akateriwanóten ne kariwí꞉ios tsi nonwésons ne iáh nonwénthon tehonwasennarónken ne Kerístos, neh꞉ne tóhsa tahontakatnanétha nakorénson tiakotásaʼwe. 21Tsi niwáton nohiatonseratokénti,
“Tsi niʼiákon ne iáh tehiontatróri ne Rahonháke enhiontkátho,
tánon tsi niʼiákon ne iáh teiakonrónken eniakonikonraiéntaʼne.”
Kór Raskáneks Nahanátara Ne Rome
22Tánon káti éso ioriwáke wakatenikonrónni niakwanatarénaʼse nók knahótenk tiókonte watiotátisʼkwe. 23Nók kíʼ ónen wákson natioténseras nakʼtéson nonwéson tánon kíʼ ó꞉ni tsi ónen wéso ioseráke shikaskáneks ne iakwanatarénaʼse, 24Ónen káti aiáwens ehnaiáwenʼne. Tsi ní꞉ioht ne iakatʼtakwaríshaʼte ne Spain, tewakathonwentió꞉ni ne iatátʼtaʼne iakatketótaʼtse nohénton ne Spain niáke, tánon naskwaiénawaʼse ne thóhʼnon niáke, neh kíʼ nónen ienʼkwa ken nikariwésha ienkwanatarénaʼse. 25Nók kíʼ ónenk, Jerusalem niahonkenonhátie niaʼkehiótense ne Rawenni꞉io rahonkwetaʼsónha nehnónwe. 26Asèken ne tionterennaientákwas ne Macedonia tánon ne Achaia kwáh íken tsi iatehotiriwaiéntaʼse nasakotisniénon ne iakóten ne Rawenni꞉io rahonkwetaʼsónhas ne Jerusalem. 27Kwáh ronónha iatehotiriwaiéntaʼse; nók, kíʼ tsi nihióta, kwáh ronateriwaiénni naʼsakotisniénon. Ne Sitaeró꞉nons tesakonarehniaténis ne iahʼtehatiʼsitaeronons tsi nahoténsons ne iohiáneres ne Rawenni꞉io totkáwen ne rahonatónnhes, ne iáh tehotiʼiánere ne thonetákwens, nekáti, akarihónni nasakotiʼiénawaʼse ne Sitaeró꞉nons ne thonetákwen nasakónon tsi natahonatonwentiónike niaʼtewenniseráke. 28Neh nónen enkeriwaiériʼte kí꞉ken kahioténsera tánon enthekheiáwi nowísta ne ronwatirohróki, ehʼthóhʼne káti Spain non nienhénke tánon iekwanatarénaʼse tsi niahonkenonhátie neh non. 29Nónen ienkwáken, wakateriéntare tsi kwáh enkanánon enkháwi ne Kerístos rahohiataterítsera.
30Wakwaretiáron, tewatenrosónhas, neh tsi tetsitewetákwen ne Roiá꞉ner Ié꞉sos Kerístos tánon ne aoríwa tsi nitionkwáwis nètho onikónra, wakwaretiron skát꞉ne aihtewaterénnaien kwáh ahontaionkwanikonrakontákwen rahonháke ne Rawenni꞉io askwaterennaiénhase. 31Sewaterénnaien ne tsi niháti ne Judea ne iáh tethonwetákwen ne Ié꞉sos Kerístos tóhsa aiontkaréwate, tánon ó꞉ni ne Rawenni꞉io rahonkwetaʼsónhas ne Jerusalem nahontsennónni nahatiʼiéna naʼtsenawasétsera. 32Tanon káti thóh iénke kwáh enkananonhátie natsennonniátsera, thóh nithonikonriʼióʼon ne Rawenni꞉io, tánon tsi ienkwanatarénaʼse 33Nakaterénnaient ne Rawenni꞉io, nonkwaiatakweniʼiótsera ne skénnen, ákwe aihsewakwekónhake.
Currently Selected:
Romans 15: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
