Romans 16
16
Kór Watesakonónweron Niateionkwétakes Ne Rome
1Tewakatonwentió꞉ni nakíron thíken tewatenosénha Phoebe, tsi nikáien iakoteríhonte tionterennaientákwa ne Cenchreae kwáh íken tsi tionkwetaiéri. 2Teietʼtsiʼiaróhton rahosénnakon ne Roiá꞉ner, tsi nihonateriwaiénni ne Rawenni꞉io rahotiókwa, tánon ietʼtsiʼiénawas tsi nahóten taiakotonwentionníhake, Asèken nakahónha tehionteroserowánen tánon ó꞉ni ní꞉i hiontiénawaʼse.
3Iáh thekenonwerátons ne Priscilla ó꞉ni ne Aquila, ne skát꞉ne ionkwáiote tsi sakwahiótense ne Kerístos Ié꞉sos; 4Ehkenonnhárakwe ní꞉i akeriwáke. Éso tsi tekenonwerátons—iáh tewakonwáʼkok, nók akwékon ne tsi ronterennaientákwas ne iáh tehatishitaeronons. 5Tekenonweráthons ne thonetákwen tsi rahotinonskónsons non niʼonterénnaiens kwáh tsi ní꞉ioht ne ononsatokentíke.
Tekenonwerátons nakaterósera Epaenetus, rahónha ne totserenton tsi watonhontsaien ne Asia tahawetakwe ne Kerístos. 6Tekenonwerátons ne Onwári, tsi niaʼteiakotátʼtsahaton ietʼtsihiótense. 7Tekenonwerátons nònʼne ne Andronicus ó꞉ni ne Junia, Sitaeró꞉non nateniʼiatóten tsi ní꞉i ní꞉ioht skát꞉ne iakwanhótonkwe; kwáh íken tsi ronwatiʼientéris ne ronteriwanhótʼtha, rohnónha rothihénton rotiriwiʼiostáʼon tsi ní꞉i ní꞉ioht.
8Tehinonweráthons neh Ampliatus, nakateroseranóron Roiá꞉ner tehonateriwasóntere. 9Teihnonwerátons nònʼne ne Urbanus, skát꞉ne ionkeníʼiote ne Kerístos rahoʼioténsera, ó꞉ni nakateroseranóron Stachys. 10Teihnonwerátons ne Apelles, rawenéston tsi nihoriwatóken tsi nòkwa ne Kerístos. Tekenonwerátons ónhka ne Aristobulus rahowátsire akénhake. 11Teihnonwerátons ne Herodion, Sitaeró꞉non nahaiatóten, ó꞉ni neh rotiriwiʼióstons ne Narcissus rahowátsire.
12Tekenonwerátons ne Tryphaena ó꞉ni ne Tryphosa, Roiá꞉ner ronwahiótense, tánon ne ahkateroseranóron Persis, tsi niʼiawetowánen rohiótense ne Roiá꞉ner. 13Iahihiateniétaʼse nateraswiʼiohiótsera ne Rufus, rahónha ronwaiatarákwen ne rohiótense ne Roiá꞉ner, tánon ó꞉ni neh ronisténha, tiókonte thóh ní꞉ioht tsi tehionkʼkánere tsi síken ní꞉ioht ne iontsénha. 14Tekenonwerátons ne Asyncritus, Phlegon, Hermes, Patrobas, Hermas, tánon akwékon neh ronátiakes ne rothiriwiʼióstons ne ratikwekonháties. 15Tekenonwerátons ne Philologus, ó꞉ni ne Julia, ó꞉ni ne Nereus tánon ne iatenosénha, ó꞉ni ne Olympas, tánon akwékon ne Rawenni꞉io rahonkwetaʼsónha ne ratikwekonháties.
16Tesewatatenorónkwat. Kwáh ratikwékon ne Kerístos raotiókwa iahitsiʼiateniétaʼse ne raotinonronkwátseras.
Onakènka Iaʼonniatonhátie Karesarontiéra
17Wakwaretiáron, tewatenrosónhas; ietsinikonráʼrak tsi niháti ne tehatinenratkhásons ó꞉ni sakotinikonraksáta nonkwesónhas 18Asèken ónhka ne thóh niʼieweiennóten iáh kíʼ Kerístos sonkwaiáner tehonwahiótense, nók nek khók ronnonthónnions tsi nahóntiere ó꞉ni nahóten ahónneke. Kawenníʼios rónstha ó꞉ni tekarénsaron tsi ní꞉ioht tsi rontátis sakotinikonrahténnis ne tionkwetaiéris. 19Akwékon iakoriwarónken tsi nisewariwatóken tsi nòkwa ne oriwatokénti, neh kíʼ karihónnis tsi niwakatʼtsennónni níse sewariwáke, tewakatonwentió꞉ni naihsewanikonrowanénhake tsi nòkwati ne ioʼiánere, nók tóhsa tesewawénrie ne wahétken. 20Tanon Rawenni꞉io, neh nonkwaiatakweniʼióhtsera ne skénnen, kwáh iostóre tenhoskwaserónkwaʼte ne ranesonrónon ne sewasitókon.
Ne rahoténrat ne Sonkwaianer Ié꞉sos sewakweʼkónhak.
21Timothy, ne skát꞉ne ionkeniʼióhte, tetsisewanonwerátons; ne non꞉ne sáka ne Lucius, Jason, tánon ne Sosipater, rasitaeronon.
22Í꞉i kiken Tertius, wakʼkhiáton kiʼkahiatónsera tsi niháwen ne Kór, takwehiárak tsi wakeriwiʼióston.
23Gaius, tsi ronnónshote non niwakataweiáthon, tetsisewanonweráthons, Erastus, tesakokʼwistanonnáhani ne kanáta, tánon nonkwatatekénhas Quartus teietʼtsinonwerátons. 24Ne rahoténrat ne Sonkwaiáner Ié꞉sos Kerístos sewakwékon sewakwekónhak.
Tsi Ieʼiotéson Kór Wathononweráton Ne Rawenni꞉io
25Ánion tsi tewasénnaien ne Rawenni꞉io! Rokwénion nahiónnen nasesátsʼteke tsi tisetákwen, tsi ní꞉ioht tsi kateriwanhóta ne karihwí꞉ʼios ne Ié꞉sos Kerístos rahoriwáke ó꞉ni ne karihotasiónkwen tsi nikariwashétonʼne ne tkariwaiéri tsi nitsawénon. 26Nók kíʼ neh tsi nihotihiathónnions ne rothitokenséhakwe ne iorihónni iakotiokowánen nonkwesónha aiakonikonraiéntaʼne nʼoriwíʼio; ne ronnheʼónwe Rawenni꞉io rotennáʼon kwáh ken tiokwakwékon aiakoteriéntaraʼne nʼoriwíʼio, nekáti nakwékon ahontahonwétaʼkwe ne Rawenni꞉io ó꞉ni ahonwawénnaraʼkwe.
27Nek khók rahonhatsíwa Rawenni꞉io, rahonhatsíwa khók ronikonrowánen, ne kaiatanerakwátsera rahonháke ne Ié꞉sos Kerístos ne tsi nenhwen. Éhʼtho naiáwenʼne.
Currently Selected:
Romans 16: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
