Romans 13
13
Kaiotenserasónhas Tsi Nòkwa Neh Kakorásera Ahoianerénseras
1Kwáh iatehionkwétake ónenk tsi enhiontewénʼnaraʼkwe ne kakorásera ahoianerénseras, ne tsi iáh thakaianerenseróten takátake neh iáh Rawenni꞉io tahoriwíson, tánon tsi wahthátie neh rathikoráhsons neh kíʼ tsi Rawenni꞉io tesakówi. 2Ónhka kí꞉ken tenionteriwahrénho tsi roteríhonte neh rakóra ieriwáhias kíʼ tsi nahóten ne Rawenni꞉io rorákwen; tánon ónhka kí꞉ken neh thóh nenʼiéhiere rahónhak khók tehathatiatoréhtha. 3Neh rathikóras iáh thateiothonwentsióhon nahonwathitsianíhseʼke nónka neh iohiánere tsi nihontiérha, nók neh tsi niháti neh kariwáksen tsi nihontiérha. Asenónweʼne kén níse neh tóhsa ashetʼtsaníhseke ne rathikóras? Neh kih thóh náhtier neh ioiánereh, ó꞉ni teniesarénsaron, 4neh kíʼ tsi Rawenni꞉io rahonkwetaʼsónhas í꞉se sariwáke tsi rotihióte. Nók tokáha kariwáksen tsi nensátiereh, ehʼthóhʼne kíʼ setʼtsanísek, Asèken neh rahothisasténsera kwáh íken tsi hioníron nensakotiréhwaʼte. Rawenni꞉io seh rahonkwethasónhas tánon Rawenni꞉io rahorehwahthátsera rónstha nónka ensakotiréhwaʼte ne kariwáksen tsi nenhóntiereh. 5Neh kíʼ ahoríwa tehiothonwentsióhon nahsehwénʼnaraʼkwe neh rathikorásons—iáh nek khók tèken tsi Rawenni꞉io rahorewathátsera, nók neh kíʼ ó꞉ni kaiatorehthátsera aoriwáke.
6Neh kíʼ aoríwa sewakáriaks ne kaienthátseras, Asèken neh rathikorásons Rawenni꞉io ronwahiótense nónen enhatiriwaiériʼte ne rahotihioténseras. 7Sewakáriak, káti, nahóten neh sewatkárote; ietsikáriaks ne iaʼtesewaiáti ó꞉ni ne sewaienthátseras iotkárote, ó꞉ni sewénest ne kakweiensthátsera tánon ratikwékon ietʼtsikwéniens.
Tsi Nisewahiotenserótens Tsi Naʼtesewáterhe
8Kwáh tóhsa kanèka nónhka aietʼtsikarótani—nek khók aihsewatkarótake neh tsi natahisewathatenorónkwaʼke. Nónka kí꞉ken neh thóh nenháiere rotewennarákwen neh kaianerénsera. 9Ne kaianerénseras, “Tó꞉sa shatenaʼkwaié꞉sat; tó꞉sa shehiá꞉set; tó꞉sa senénhsko; tó꞉sa sehiaskà꞉nek nakorénhson nahó꞉ten ahiakoiéntake,” oriwakwékon kí꞉ken, tánon ó꞉ni nohiásons sékon akénhake, akwékon tkakwékton nénskat atsiawenrátʼtsera, “Senorónkwak ne tesanonsanéken tsi níse nisathatenorónkwa.” 10Tóhka shenorónkwas nakorénsons, iáh nonwénton thashenikonráhten; nhashenóronkwe, káti, nehʼne kwáh kahianerenseraʼkwékon tsi ensatewénnaraʼkwe.
11Tánon ken nahisewáiere, ne tsi sewateriéntare tsi niʼiowistáhe nónwa; ónen iakáhewe nahisewatʼkétsko tsi nisewéntaskwe. Asèken nenwenʼniseráteke nónen ne Rawenni꞉io enseshonkwaniákenʼte ónen sénha ákʼta íwas tsi ní꞉ioht ne kwáh shonthontiérenʼte shonthatsitewéthaʼkwe ne Ié꞉sos Kerístos. 12Kwáh tsi shíken ní꞉ioht nashontʼténʼne íwere tahioswátʼtheʼne, tánon nennísera skanóronks áhonwe. Ánion ietewárek tsi nihioʼiontenseróhtens nashontenʼnékha. Ánion thetéwak ne ionteriʼiosthákwas naihtewateriʼiósthaʼkwe nentiékheʼne. 13Ánion tkariwaiérik tsi tiónʼnhek, tsi teioswátʼthe nonnitionʼnhétie iáh neh tsi tetiókaras: iáh ó꞉ni neh thiʼiohriwatesónha tsiʼni ienekirátha, iáh neh kanhakwaiesátsera tòhka ó꞉ni ne iáh tehioteriwatʼtkwéniens, kaserohénsera, kanaiésera. 14Nók tesathatékwas neh ratheriʼiosthákwas ne Roiá꞉ner Ié꞉sos Kerístos, tánon sátkaf tsi ne sanontónnions ne sariwanerahákʼtsera ó꞉ni nahontasathatenikonraiériʼte tsi nahóten saskáneks.
Currently Selected:
Romans 13: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
