Romans 12
12
Tsi Iakonʼnhétie Neh꞉ne Ahonwahiótense Ne Rawenni꞉io
1Éhʼtho káti, tewatenrosónhas, neh tsi nikowánen ne Rawenni꞉io shonkwenténras, kwahnekénnis; kwáh ieʼiokontakwénhak tsi tátʼtsion ne Rawenni꞉io tsi tiónʼnhe ók ó꞉ni nehʼne aihsewárioʼte tsi nikaríwes tionnhétie, kwáh sewariwahtokénhak tsi nòkwa ne rahohioténsera ó꞉ni thaʼtsisewanikonraʼiérit, thókiʼ nikarihóten ne kwáh ahonwasénnaien ne Rawenni꞉io. 2Tóhsa senakéren tsi nihiotirenʼnáhons ne tsi ionwentisáte, nók tsi sewaríhon ne Rawenni꞉io tahonshatsiseweriasaténi ne kwáh iahiotkontákwen tahonshatsisewanikonraténi. Ehʼthóhʼne ensewakwéni nahisewanikonraiéntaʼne tsi nihoskanektseróten ne Rawenni꞉io—nehʼne nahiaiéron, nètho kénthons nahontahonwanikonraiériʼte tánon kwáh tsi naiothónhon.
3Ne ahoríwa ne Rawenni꞉io tsi nithakáwi ne kenténron kwáh tsi sewahiatátʼtsion enkwaróri; Tóhsa sóhtsi éhneken tsi ní꞉ioht tsi aihsewatatenontónnionse tsi naʼtehiothonhontiónha. Sewatenʼnikonráren ne sewanonthonnióntsera, tánon neh tesewatatiatóret tioʼianénhaf tsi níkon káhawe ne tewetákwen ne Rawenni꞉io thiáwi. 4Iatékon tsi ní꞉ioht tsi iowenténion nénskat oierónta, tánon akwékon kí꞉ken oianí꞉ioht tsi iotihiótens. 5Kwáh neh sákat, thosáne tsi ionkwentiokowánen, énskat khók iéken nonkwaierónta tsi teionkwateriwasóntere ne Kerístos, tánon tewakwékon iateionkwatiéston kwáh tsi natehiotʼthihánions ne skaierónta. 6Neh káti ahítewatste tsi naʼtekontʼthihánions nekaweiensthátseras ne akenikwekonhátie ne tsi niteshonkwáwi ne kenténrat ne Rawenni꞉io. Tóhkaʼ nonkwaweiensthátsera ne ahítewahtste nahitewathárakwe ne Rawenni꞉io rahoteriwanothátsera, ehkinahitewáierhe nahontahioianénhawe ne tewethákwen tsi nihionkwáien; 7Tóhka ne Rawenni꞉io tesonkwáwi naionkwakwénion naʼietʼthiriwáhwaʼse ne thonethákwen, áhnionkiʼ ietʼthiriwáhwas; tòhka tesonkwáwi naionkwakwénion naietʼthirihónnien, ahkiʼietʼthirihónʼnien; 8Tóhka enietinikonrárehke nakorénsons, thóʼkiʼ nitewáier. Ónhka ne thènen enionthateriwáhwaʼse kwáh kíʼ tkariwaiérik; ónhka ne roteríhonte roteriwaiénʼni ne tahawisʼsátsʼteke; ónhka shakonesténʼnis ne kanoronkwátshera ahotsenʼnonnhíhake káti.
9Kanoronkwátsera ónenk tsi ienhiokontákwen enhioriwatokénhake. Sewáson ne kariwáksen, neh sewatienawasthónhak ne iohiánere. 10Tesewathatenorónwat tsi natesewáterhe tsi ní꞉ioht ne rotiriwiʼióstons, tánon kwáh tesewasteríhensek nahitsiotháshon ne kakwenesthátsera tsi naʼtesewáterhe. 11Kwáh ioriwatókenk seweriasakwékon etʼtsisewahiótens ne Roiá꞉ner. 12Sewaskanektserákon non nahisewathonnárake, sewanikonkástek tsi tesewanikónrahre, tánon tiókonte tsi sewaterenʼnaiéntat. 13Ietʼtsíhion ne satesewariwiʼiósthons tsi natehonathonwentió꞉ni, tánon ietsinakthótas ne tehontawénries ne sewanonskónshons.
14Tsi sewariwanónthons ne Rawenni꞉io nasakoiathatérisʼte ne teietʼtsiʼionnharíkʼkons—hén, tsisewariwanónthons nasakohiathatériste nók tóhsa sakoréwat. 15Skátʼne sewathónʼnhare ne ronathonʼnháhere, skát꞉ne tesewaséntho ne tehonsénsthos. 16Satehiothónhak tsi naʼthahisewathatsatakéna tóhsa sewanaiéhak, nók ahkwékon satahisewahiotenseroténhake; Tóhsa satatenonthónnions nasatʼthókhaʼke.
17Tóhka ónhkak iesateweiehnakshaténʼni, tóhsa thóh ní꞉ioht tsi ahonsashekáriakʼseh. Ne sateniénten thonátier tsi niʼiéhiere nónkwe ne tkariwaiéri. 18Kwáh oriwakwékon iathesháti satheniénten neh skén꞉nen ahkénhake tsi natesewáterhe. 19Tóhsa nonwénton kanhakwatserákon tsi ahonsaskáriake, tewatenrosónhas, nók kek tseríhon Rawenni꞉io rahonhakwátsera írats. Asèken noriwatokénti wáton, “I꞉i kwáh se enshekáriaʼke tánon enshekeréwaʼthe, ráton ne Roiá꞉ner.” 20Kék, tsi niwáton noriwatokénti: “Tóhka ne iesáswens rotinakwénhe, shènont; tòhka rotiniatátʼtens shenekánont; tsi éhʼthoh nénsehre kwáh enhontiatátʼtsa tsi nenhontéhen.” 21Tóhsa satʼthóntat nahisasénʼni ne kariwáksen; kék, neh sehsénniont ne kariwáksen ne ioʼiánere.
Currently Selected:
Romans 12: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
