Romans 11
11
Rawenni꞉io Washakonatónhase Ne Israerʼró꞉non Nataniténron
1Keriwanóntons, káti; wahsakokénron kén ne Rawenni꞉io rahonkwetaʼsónha? Oriwihiohónwe tsi iáh! Kwáh ó꞉ni í꞉i ne Israerʼró꞉non natsiatóten, Abraham non nihtewakatʼwatsirínon, tiátare ne Benjamin kentiókwa. 2Iáh tesakokenronníhon ne Rawenni꞉io rahonkwéta, tsi nikáien ne sakoʼiatarákwen ne tsi tiotásaʼwe. Sewateriéntare nohiatonseratokénti tsi niwatróris ne Elijah wahoniténthaʼse ne Rawenni꞉io ne Israerʼró꞉non rahothiriwáke. 3“Saiánere, ronwathinonwariákons neh sonkwétas rothitokenséhakwe tánon rothiríshon ne sáwenk ietsenharákwas, akónwa khók iatesewakathaténron ne iehkeriwákens, tánon kíʼ ronhtheniéntha nahionkerí꞉io.” 4Onh ní꞉ioht tsi wathoriwaserákwaʼse neh Rawenni꞉io? “Tsiátak tewenʼniawehetʼtserásen niháti ronʼnónkwe kehiatsenawásthonʼne nehʼne iáh tekonwasénʼnaien neh iotokenthitserákʼsen Baal.” 5Kwáh káti sékon neh sáka nónwa nikaháwis. Kénk niháti iateshonatháteron tsi nikáien ne Rawenni꞉io sakoiatarákwen ne rahoténrat iorihonníʼon. 6Neh kanonkonniáton neh rahoténrat, iáh thòka kén tsi nahothihioténhen. Asèken tòhka ne Rawenni꞉io neh ahononkonʼniáthon tsi naiontseráke nónkwe, knáhaʼkiʼ ne rahoténrat iáh thahioriwí꞉ioke.
7Onkáti ne kénhen? Ne Israerʼró꞉non iáh tehothitsénron tsi nahóten ronʼnésaskwe. Kénk nihothitiókwa tsi nisakohiatarákwen ne Rawenni꞉io wahathitsénri; ronátsiakes wathontahonthákwekʼte tsi nisakónaskwe ne Rawenni꞉io. 8Tsi niwáthon noriwatokénti, “Rawenni꞉io ehʼnahása iáh thènen tesonthókaskwe neh rahoneriá꞉ne tánon iáh tesewáthonsʼkwe nahonsaʼonnonthónʼnionkwe; neh kwáh ónwa wenʼniseráte iáh tsesathíhes iáh ó꞉ni thesohtinikonraiénthas.” 9Tsi niháwen neh Táwit,
“Neh ahonwanahteristaiénthakwe tsi ahonwathiʼiéna neh nónen ronathekwáhere;
iáh kanèka tiahón꞉ne, tánon ronwathiréwat!
10Tánon tahonwathikarásheʼte ne tóhsa ahonsahatíkenke;
tánon neh ahkarihón꞉ni nahathironhiáken tsi natehonanikónra꞉re.”
11Keriwanónthons, káti; nónen neh Sitaeró꞉nons enthonashítiake, neh kén kéntons nahatiʼiatiénenʼne? Iáh neh tekéntons! Ne tsi rotiriwáhneren, ne kenténrat neh꞉ne iáh tehatisitaeronons nòkwati niaháhe, ne naiakahónʼnien ne Sitaeró꞉nons nahontekéf꞉fa. 12Ne rahotiriwanerahákʼtsera ne Sitaeró꞉nons takáhawe ne kahiathaterítseras natsiokowatseras ne tsi ionwentsiate, tánon tsi wahothitensteten ne rahotiriwiʼiosthóntsera neh wahakokwatsésten ne iáh tehathisitaeronons ne nahotsiokowáhtseras ne kahiataterítseras. Sénha enʼiawetowánen ne kahiatateríhtsera neh tsi niháti ne rothiʼienteráʼon ne kaienawasétsera ehrathiʼiátare ne Sitaeró꞉nons.
Ne Rahotiʼienawasétsera Ne Iáh Tehatisitaeronons
13Ónen í꞉se ne iáh tesewasitaeronons kwatará꞉ni; tsi náhe ne Í꞉i enkheiateriwanothaníhake ne iáh tehatisitaeronons, kwáh íken tsi enkenaiéhake tsi niwatsiotenseróten. 14Tóhkaʼ senónwa enkwéni ne nonkwesónha neh꞉ne sahakwaiáta nahathinósʼsa, nehʼne ahkarihónʼni tsi niwatiotenʼhen ne Rawenni꞉io ótsiake ensakonónsta꞉te. 15Asèken ne Rawenni꞉io sasaskokénron, Rawenni꞉io wahsakahónnien naktéshon nontienakerénions ne tsi ionwentsiáte ne rahónha ahʼhonteroserónʼni. Ne káti nónen tensakoróthon, tsi neniáwenʼne nehʼne kwáh oriwihioʼónwe tenskaierontárake tsi ní꞉ioht ne iakawenhéion sahionthónʼnhete!
16Tóhka ónkak enthónʼhion ne Rawenni꞉io ne tsiotierénton kanatarakwétaron, kwáh káti kanatarakwékon raónha rahówenk; tánon tòhka ónhkak ahonwátatʼtse ne Rawenni꞉io neh karónta ahotéra, nonenrahshónhas raónha kíʼ nòn꞉ne rahówenk. 17Ne karontaienthóserons ne ioteiéna káhik iotenhatoskárons, tánon neh karakónha ne ioteiéna karónta neh iaʼtekaiéston. Níse ne iáh tesewariwiʼióstons ne tesisehwatiérens neh karakónha ioteiéna karónta, tánon nónwa ónen neh sewatsthonhátse ne kasátsʼte tsi nihotirihóten ne Sitaeró꞉nons rahotiriwiʼiosthóntsera. 18Kwáh káti, tóhsa ietʼtsikénron tsi niháti ne ronwanhasariákon tsi ní꞉ioht ne onhathesónhas. Onhʼní꞉ioht tsi ahskwéni? Nasatatonʼníheke kwáh nonʼníse nek khók nhoʼnénra íken; iáh tesenawáse ne ohtéras—nhotéras neh saiénawaʼse.
19Nók ensiron, “Hén, nók kíʼ ontehnátsiake nahon kenakʼthónnien níʼih.” 20Kwáh thókenske. Iotenatsiákon ne wakarihónʼni ne tsi iáh tethonethákwen, tsi náhe thóh non nensariwatokénhake neh tsi thisetákwen. Nók tóhsa senaiéhak; kék khók sateronʼníhek. 21Ne Rawenni꞉io iáh tesakonónsthaton ne Sitaeró꞉nons, neh thonihathiʼiatótens tsi ní꞉ioht ne thikénha onhatasónhas; ísere ontèken enianónstate? 22Kénhen tewatkáthos tsi nithoriwaiéri tánon ó꞉ni tsi nihaniakátste ne Rawenni꞉io. Kwáh íken tsi sakoteniakastátis tsi niháti ne rhothiriwáneren, nók thoriwaiéri nisèke—tòhka iensatasónteren tsi nòkwati ne rahononronkwatserákon. Nók tòhka iáh, í꞉se ó꞉ni eniahiákse. 23Tánon thokáha neh Sitaeró꞉nons enhontsiakwarísi tsi niʼontenhowéntha, ehʼhenshotiʼiatanéntake tsi nónwe natehiotonwentióhon; asèken rokwénion ne Rawenni꞉io neh ehnaháiere. 24Kíʼ iáh tesewasitaeronons ne tesisewatiérens ne karakónhas ioteiéna karónta neh iotenhatoskáron tánon ehʼthóhʼne, tánon oianikaiéren tsi nihiorenʼnáhon, tánon neh iatekaiésthon ne karontaiénthon ne ioteiéna karónta. Ne Sitaeró꞉nons ne tesontiérens ne karontaiéntons; tanon sénha rosenhniio ne Ni꞉io ne iatahonsahaieste ne ietenakoskaron aorontasonhas.
Rawenni꞉io Onkwetaʼkwékon Sakoténras
25Kwáh seh kariwasetánion naʼteriwakwarisióntshera, tewatenrosónhas, tsi nahóten ne kwáh tewakathonwentió꞉ni naihsewateriéntaraʼne, asèken neh ensewanónstate ne tóhsa aihsewathatenontónʼnionse tsi nahisewakthókhake. Tsi nihonatenontsistaniráton ne Israerʼró꞉nons iáh kíʼ tsehiotkontákwen, nók thóh khók nikaríwes tsi nióre ne iáh tehatisitaeronons tekaiatoreton tonihati ne Rawenní꞉ioke nienhón꞉ne. 26Kén kíʼ ní꞉ioht tsi ensatiniákenʼne ne Israerʼró꞉nons. Tsi niwáthon neh Kahiatonseratokén꞉ti,
“Ne Shakoiathákwas Zion non néntʼtre
tánon enháthonte ne kariwaneraháktseras tsi nithoʼtwatsirínon ne Jacob.
27Eniakwatsianerenserón꞉ni tsi naʼteiakwátere,
ne nónen ahéren henkáwiʼte ne rahotiriwaneraháktseras.”
28Ne tsi wahathikénron ne kariwí꞉ios, ne Rawenni꞉io, wahsakoriwásten ne Sitaeró꞉nons, neh káti ahoríwah ensewaiénawaʼse níse ne iáh Tesewariwiʼióstons. Ne káti ahoríwah Rawenni꞉io sakoiatarákwen, ne iorihónʼni Rawenni꞉io sakorahrasténʼni neh ronwathinihókon tsi wahatiwahtsiratháties tiotkonʼónwe raónha enhonténrokes. 29Asèken ne Rawenni꞉io iáh nènʼne thateshoteriwateniénʼnis ónhka akénhake nen sakoiataráko tánon nasakoiatatériste. 30Nók kíʼ níse ne iáh tesewariwiʼióstons, ehtsisewawennóntion ne Rawenni꞉io tsi nitsiawénon; nók ónen sewaienáhon ne Rawenni꞉io rahoténrat ne tsi neh Sitaeró꞉nons iáh tehonatewenʼnarákwen. 31Kwáh ne sáka, tsi ní꞉ioht tsi sewaienáhon neh kenténrat, ne Sitaeró꞉nons ónen iáh teshonwawennarákwa ne Rawenni꞉io, ehnahontáwe ronʼnónha ó꞉ni ahatiʼiéna ne Rawenni꞉io rahoténrat. 32Tsi niʼiawénhen ónhkwe takwékon ronwawenʼnóntion ne Rawenni꞉io, ehnihothiʼiatawénhen tsi ní꞉ioht ne rathinhótons; Rawenni꞉io thóh nihoriwíshon, thóh nahontáwe ratikwékon ahsakawenésten ne kenténrat.
Ronwasénʼnaien Ne Rawenni꞉io
33Tsi nikowánen ne Rawenni꞉io rahotsiokowátseras! Tsi natehionhótes ne rahonikonraienthátsera ó꞉ni neh rahothokhátsera! Ónhka ahiekwéni naienikonraiénthaʼte tsi natehohiatoretánions? Ónhka ahiekwéni naiakonikonraiéntaʼne ne rahoweiénʼnas? 34Tsi niwáthon ne Kahiatonseratokén꞉ti,
“Ónhka iakoteriéntare tsi nihonikonróten ne Roiá꞉ner?
Ónhka aiekwéni nahonwatennikónron?
35Ónhka kén neh nonwénton thènen ronwáhwi,
neh꞉ne ahonsahakáriaʼke?”
36Asèken oriwakwékon Raónha Rawenni꞉io róhson, ó꞉ni akwékon Raónha roteriwahtentsiáton tánon kwáh hiatehaʼiáti. Ahonwasénʼnaien ne Rawenni꞉io ne tsi nihohiatanerákwat tsi nénwe! Éhʼthoʼnaiáwenʼne.
Currently Selected:
Romans 11: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
