Romans 10
10
1Tewahtorohsónhas, ohtsikwáh keriasakwékon tsi kaskáneks nah katatekénseras nahónton ahatiniákenʼne! Tsi nióre tsi wakhaterénʼnaien neh Rawenní꞉io꞉ke neh rahotiriwáke! 2Enkwéni nakeriwahnírate neh tionháke kwáh íken tsi tehonathonwentsióni Rawenni꞉io ahonwahiótense; nók tsi ní꞉ioht tsi ronhnésaks nahonwahiótense ne Rawenni꞉io iáh neh teionʼniáton noriwí꞉io atʼthoʼkátsera. 3Nonkwesónha Iáh tehatiʼientériʼne nahóten ne Rawenni꞉io rahoriwakwarishióntsera nahonsahotiriwakwaʼtákwaʼse tsi natehóntere ne Rawenni꞉io, tánon kek neh wahonteniénten neh ronhnónha tsi nihatiweienʼnhóten neh áhonste, iáh tehothiʼienáon ne Rawenni꞉io rahoteweiénʼna nahonsahotiriwakwaʼtákwaʼse tsi natehóntere ne Rawenni꞉io. 4Asèken Kerístos roʼriwaieríton neh kaianerénsera, ehnahontáwe tsi niʼiákon ne tiakawetákwen entiakoteriwaserónʼnien rahohénton ne Rawenni꞉io.
Akwékon Nieʼiakówenk Ne Kenténrat
5Mahís kíʼ thoní꞉ioht tsi rohiáton tsi nikarihóten nahonsaiakoteriwaserónʼnien tsi natehóntere ne Rawenni꞉io ne tsi iontewennarákwa ne kaianerénsera; “Ónkaʼkiʼ enhontewénnaraʼkwe nahotsiawenrétsera ne kaianerénsera eniakónʼnheke.” 6Nók ken nahóten kéntons noriwatokénti tsi ní꞉ioht nahonsaiakoteriwaserónʼnien tsi natehóntere ne Rawenni꞉io: “Neh꞉ne tóhsa ahsatateriwanóntonse, ónhka iaierà꞉then karonhià꞉te?” (ne káti naiaiéron, neh karonhiáke niehénien nehʼne ahonwariwanónthonse ne Kerístos tahonthasonkwáterate). 7“Tánon tóhsa ó꞉ni seriwanónton, ónhka ienhióntsnente ne tsi tionwentsiáte ne kenhéion?” (ne káti naiaiéron sohthonnhéton ne Kerístos). 8Ne kíʼ kéntons: “Nowén꞉na kwáh í꞉ken tsi tsaʼták꞉ta ká꞉ien, tsá꞉kon í꞉wa tánon seriáhsakon”—thoʼní꞉ioht nahteriwanhothátsera ne tewethákwen iakwateriwanhótha. 9Tóhkaʼ enseriwahnírate ne Ié꞉sos tsi Roiá꞉ner tánon entesétakwe ne Rawenni꞉io tsi sohkétskwen ne kenheiátʼne, ensehseniákenʼne. 10Neh tsi tionkwetákwen ne tionkwariwiʼiosténʼnis tsi natethewátereh ne Rawenni꞉io; ne tsi nitewariwahnírats neh tionkwaniakéntha. 11Nowenʼnatokénti wáton, “Onhkakíʼok nenthonwétakwe iáh tahonsahiontateriwásten.” 12Kwáh tsik ónhka kíʼ iakóthons, Asèken kwáh iáh thènen thateontʼthíhen neh Sitaeró꞉nons tánon ne iáh tehotiriwiʼióstons; Rawenni꞉io kwáh ónhkwe takwékon tsi Sakoiánere ó꞉ni kwáh wahtsokowatserowánen sakohiataterísta tsi niháti ne ienhonwanáthon. 13Tsi niwáton nhowenʼnatokénti, “Nónka ienhonwanáton ne Roiá꞉ner nenhonwaniáhese kwáh entieniákenʼne.”
14Onhkáti naiáwenʼne nahonwariwanóntonse nahsakoiénawaʼse thòka iáh tethonetákwen? Tánon onhnaiáwenʼne nahontahonnétaʼkwe thòka iáh tehonarónken nateriwanothátsera? Tánon onhní꞉ioht tsi ahonathónteʼne thòka ne ateriwanothátsera iáh tekariʼohiwanáton? 15Tánon onʼní꞉ioht tsi akarihowanáthon thòka ne ronteriwahnótha iáh tiehonwanathórion? Tsi niwáton noriwatokénti, “Kwáh ioriwanerákwat tsi tahónʼne ne ronteriwanhóthas tsi niháti thatíhas ne kariwí꞉ios!” 16Nók iáh onhkwetaʼkwékon teiakoienáhon ne kariwí꞉ios. Kwáh ó꞉ni rahónha ne Isaiah ráwen, “Roiá꞉ner, rahónwa tawethákwen nonkwateriwanhothátsera?” 17Nekáti wáhi, thóʼnon nitewétha ne tewethákwen tsi ionrónkas nateriwanhothátsera, tánon nateriwanhothátsera thóhʼnon natewatohétstha tsi Kerístos ronwateriwanhotáni.
18Nók keriwanóntons; thòkensʼke kén iáh tehonarónken nateriwanhothátsera? Oriwí꞉io kíʼ náha tsi ronharónken—asèken tsi niwáthon nhoriwatokénti:
“Kwáh ohontsiakwékon hiatathiwenʼnaniháraʼne;
ne rahothiwénna iakanihárho ne tsi iotonhóntsiotʼte.”
19Sékon enskeriwanónthon: ne Israerʼró꞉non iáh ken tehotinikonraientáʼon? Mahís rahónha, neh rothátsaʼse ne Rawenni꞉io, tahatiérente watariwaseráko:
“Ne ronwatinhathónkwa onhkweshón꞉as
enkhehiáste nahshakonatekhéfʼfaʼse;
kwáh tonathonnókthe nonhkweshón꞉as
enkhehiáste ne enhkonhniáthe nakhenakón꞉ni.”
20Tánon neh Isaiah sénha rohníron nónens enhénron,
“Neh wahontsiatatʼtsénri tsi nikáien neh iáh tehiontiathísaksʼkwe;
neh hiatekhehiathónko ne iáh thatehionkathonwentsióniʼne.”
21Nók ne Israerʼró꞉nons rahothiriwáke ráthons, “Kontatiekówa hiatewakátsiate ne takehiaróthon ne iáh tehontewenʼnarákwa ó꞉ni ne ronhnonkwetahétkens.”
Currently Selected:
Romans 10: MHK
Highlight
Share
Compare
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
