Proverbs 9
9
Attokháhtshera Tánon Ohnonhwarorí꞉ta
1Attokháhtshera iakotenonhsón꞉ni, tsá꞉ta ní꞉kon kaʼnawahatotons ne ioienawá꞉kon tsi karonhkweʼnáhere. 2Iakotenhnhá꞉ʼon katshé꞉nen akonwário, iekhwahrá꞉ne, onistaʼshón꞉ʼa teiakoiés꞉ton ne otsí꞉tsa ahatihnekí꞉ra, tánon waʼeksahrónnion. 3Iaʼakoténniehte akohnháʼtsheraʼshón꞉ʼa kanà꞉takon niakón꞉ne tsi nón꞉we ne akwáh è꞉neken tiótte naʼtakontí꞉taʼne tánon iaionathonkarón꞉ti. 4“Tasewatáweiaʼt ne iáh tesewattókha tánon ne sewanonhwaró꞉ri!” Tánon waʼí꞉ron, 5“Kásewe, ísewak ne akékhwa tánon sewahnekí꞉ra otsí꞉tsa niaʼté꞉kon tewatiéhstanion. 6É꞉ren sewatatiaʼtenhá꞉wit tsi nón꞉we nihón꞉neʼs ne iáh tehonttókha tánon entsónhnheke. Né꞉ʼe sewáhsehr ne karihonnienníhtshera.”
7Tókaʼ enhsateʼnién꞉ten ahsherihwakwaríhshien ne rontatkweniénhstha tókaʼ ó꞉ni ne iáh tethotirihwaié꞉ri, kwáh nek ne eniesaʼnikonhrakaré꞉wahte. 8Tóhsa nonwén꞉ton sherihwakwaríhshien ne iontatkweniénhstha; kwáh nek ne eniesatahkwáhswen. Sók ne ronttókha ahsherihwakwaríhshien kwáh nen né꞉ʼe eniesakwénienhste. 9Iáh oʼthé꞉nen tewatsterístha nahò꞉ten ienhsheiatátiaʼse ne ronttókha sénha nen né꞉ʼe enhonttókhaʼne. Tsi nahò꞉ten enhsehró꞉ri ne rotirihwakwaríhshion ne karihwí꞉io sénha kiʼ enhotiʼnikonhrowáhnha.
10Tókaʼ sahská꞉neks ahsattókhake teiotonhwentsóhon kiʼ ne ahtskweniénhsthake ne Roiá꞉ner. Tókaʼ ehtshienté꞉ri ne Roiaʼtatokénhti, saiená꞉ʼon kiʼ ne kaʼnikonhraientáhtshera. 11Attokháhtshera entison ne ahsonhnhé꞉son. 12Í꞉se sonhá꞉ʼa enhsatshennonniátahkwe tókaʼ sá꞉ien ne attokháhtshera, tánon tókaʼ iáh thahshié꞉na, í꞉se kiʼ enhsatatkarón꞉ni.
13Ohnonhwarorí꞉ta ne shá꞉ka tsi ní꞉ioht ne ión꞉kwe teioterienʼtakária tánon iáh tekarihonnién꞉ni, ó꞉ni iáh teiotehenhserá꞉ien. 14Eʼthó kéntskote tsi iotehnhoká꞉ronte tsi ionónhsote tókaʼ ó꞉ni tho nón꞉we nikéntskote ne kwáh è꞉neken tiótte ne kanà꞉takon, 15tiakó꞉nonks nón꞉kwe ne iakotohetstonhátie, ók ronónha khók raotirihwà꞉ke tsi nahò꞉ten né꞉ʼe ronnonhtonniónkwas: 16“Tasewatáweiaʼt, tsón꞉kwe ne iáh tekarihonnién꞉ni!” Ók wakèn꞉ron, kí꞉ken sewanonhwaró꞉ri, 17“Né꞉ne kahnekanénhskwen sénha ne teiotsikhè꞉tare. Kanaʼtaranénhskwen sénha iawékon.” 18Kí꞉ken nón꞉kwe ne waʼtiakoʼnikonhrakén꞉ni iáh tehonaterién꞉tare tsi enhonníheie nónhka aonónhskon ieniontáweiaʼte, ó꞉ni ónhka ó꞉nen ieiakotaweiá꞉ton tho kiʼ nón꞉we ieiá꞉ko tsi nón꞉we teiakotonhwentsaweʼéhston ne kenhé꞉ion.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.