Proverbs 10
10
Solomon Raorihonnienníhtshera
1Ne ká꞉ti kí꞉ken Solomon raorihonnienníhtshera:
Shakotiienʼokón꞉ʼa ne ronttokhahtsherí꞉io enhshakotikwénienhste ne shakotiʼnihó꞉kon; ronwatiienʼokón꞉ʼa ne rotinonhwaró꞉ri eniotiʼnikonhráksen kiʼ né꞉ʼe shakotiʼnistenʼó꞉kon.
2Kakwahtshéhtshera enhshié꞉na tsi nonkwá ne iáh teioterihwakwaríhshion iáh shaʼtékena té꞉ken, nok ne karihwakwarihshiónhtshera ensaʼniá꞉kenhte tsi sónhnhe.
3 Roiá꞉ner iáh thahathón꞉tate ne tiakorihwaié꞉ri aiontonhkáriaʼke, nok ne ionkweʼtaksenʼokón꞉ʼa iáh thahatiié꞉na nahò꞉ten tehonatonhontsó꞉ni.
4Awentoráhsera ensentenhstéhten, nok ne ioioʼtenhserahní꞉ron enhsakwahtshéhsten.
5Ónhka ieʼnikonhraweiénhon iakoteʼnikonhríson enieró꞉roke kaienthóhsera nó꞉nen iotateweiennentá꞉on; iotéha aiakotá꞉sheke tsi nikahá꞉wi ieienthókwas.
6Tiakorihwaié꞉ri enieié꞉na kaiaʼtateríhtshera. Ne rotirihwanerenʼákskon raotiwennaʼókon ronhséhtha tsi ronteriiohseranón꞉we tsi nihonnonhnhò꞉ten.
7Enhonwenehiá꞉rake ne thotirihwaié꞉ri tsi né꞉ʼe ní꞉ioht ne kaiaʼtateríhtshera, nok ne iáh tetionkweʼtaié꞉ri iohsnó꞉re enhshonwatiiaʼtaʼnikónhrhen.
8Ón꞉kwe ne iakoʼnikonhrí꞉io enieié꞉na nahò꞉ten ne tkariwaié꞉ri eniontathró꞉ri. Ón꞉kwe ne teiotenonhwarorí꞉tonte tsi rontà꞉tis enhontatkarón꞉ni.
9Ón꞉kwe tiakorihwaié꞉ri skén꞉nen tsi ronnonhtónnions tánon enhotiiaʼtahnirónhake nok ne iáh tethotirihwaié꞉ri enhatiiaʼtató꞉kenʼne.
10Ónhka nenieriʼwáhsehte ne karihwakwarihshiónhtshera ne tkáhas ne taionʼnikonhrhá꞉ren, nok ne ónhka ne orihwí꞉io ionthró꞉ris ne né꞉ʼe iakoióʼte ne skén꞉nen.
11Tiakorihwaié꞉ri akowennaʼshón꞉ʼa tho ní꞉ioht tsi ni ne tiohné꞉kote ionhnheʼón꞉we, nok ne iáh tetionkweʼtaié꞉ri akowennaʼshón꞉ʼa ionhséhtha tsi ionteriiohseraʼnón꞉we tsi niiakonhnhò꞉ten.
12Kahswènhtshera nek tkáhas kaʼnikonhrharáhtshera, nok kanoronhkhwáhtshera tsoʼnikónhrhens akwé꞉kon nahò꞉ten iakoʼnikonhraksá꞉tha.
13Ón꞉kwe ne iakoʼnikonhrowá꞉nen karihwí꞉ioʼs tsi enhontá꞉ti, nok ne iáh tehotiʼnikonhraientátskon teiotonhwentsóhon nahonwatihré꞉wahte.
14Ne ronttókha akwé꞉kon enhatiié꞉na ne karihonnienníhtshera tsi ní꞉kon enhatikwé꞉ni, nok ne rotinonhwaró꞉ri nó꞉nen enthontá꞉ti, kaʼnikonhrharáhtshera iáh í꞉non téteweʼs.
15Atshoʼkowáhtshera iakoiaʼtanónhstats ne rotikwáhtshe; kententéhtshera ehtà꞉ke iakaón꞉nis ne iakó꞉ten.
16Tsi eniakónhnheke ne teniakoterihwaʼserákwahse ne kaioʼtenhserí꞉io iakoióʼte, nok ne karihwáksen nek tkáhas sénha wé꞉so karihwáksen.
17Ón꞉kwe ne eniontahónhsatate naiontaterihwakwaríhshien eniakónhnheke, nok ónhka iáh thaierihwaié꞉na tsi teienióhskenʼs, iótteron kiʼ ne raotirihwà꞉ke.
18Ónhka ionhséhtha atatswénhsera iakonó꞉wen. Ónhka teionterihwarenià꞉tha tánon teierihwenhawíhtha iakononhwaró꞉ri kiʼ.
19Sénha wé꞉so enhsatá꞉ti, sénha watié꞉sen nahserihwanéraʼke. Tókaʼ sateʼnikonhrattókha, thaʼtenhsató꞉tate.
20Ne tiakonkweʼtaié꞉ri, akowennaʼshón꞉ʼa ne shá꞉ka ne aóskon kahwistarà꞉ken; nok ne iakorihwanerenʼákskon tsi ní꞉ioht tsi ronnonhtónnions iáh shaʼtékena té꞉ken.
21Tiakorihwaié꞉ri akowennaʼshón꞉ʼa wé꞉so eniakoiaʼtakéhnha nón꞉kwe, ók ní꞉se enhskwé꞉ni enhsatatenonhwarhiakon tsi nisanonhwaró꞉ri.
22 Roiá꞉ner raoiaʼtateríhtshera enión꞉ni naiesakwáhtsheʼne tánon iáh oʼthé꞉nen teká꞉ien ne aiesaʼnikonhráksaʼte.
23Teiotenonhwarorí꞉tonte naiontonhnhá꞉ren ne thé꞉nen naióntiere ne wahétken. Nón꞉kwe rotiʼnikonhrowá꞉nen rononʼwéskwani nahò꞉ten wattokhahtsherí꞉io.
24Ne tionkweʼtaié꞉ris ratiié꞉nas nahò꞉ten ronhská꞉neks. Nok ne iáh tetionkweʼtaié꞉ris ne enhatiié꞉na nahò꞉ten kwáh aonhá꞉ʼa thatitshá꞉nis.
25Nó꞉nen tekaweratá꞉ses éntewe, ówera ienhotiʼiaʼténhawe ne iáh tethotirihwaié꞉ri iáh káneka thenshoné꞉sheke, ók ne thotirihwaié꞉ri tiótkon skén꞉nen enhonnónhnheke.
26Tóhsa nonwén꞉ton rentóhrha ahiaióʼtenhse; tho ní꞉ioht tsi tenhiateriénʼtakáriahte tsi ní꞉ioht tohseráhtha#10.26 Enwá꞉ton nahsì꞉ron tohseráhtha tókaʼ ó꞉ni iotsitsátken. aió꞉raʼne senawirà꞉ke tókaʼ ó꞉ni taiesaièn꞉kwarohse ne skahrà꞉ke.
27Tshewèn꞉narahkhwa ne Roiá꞉ner, sénha enhsonhnhé꞉son. Ne ionkweʼtáksenʼs ronnihé꞉ions ohén꞉ton tsi niió꞉re ienkáhewe.
28Nahò꞉ten ne tionkweʼtaié꞉ri ronhská꞉neks eʼthó nón꞉we ieniakoiaʼténhawe tsi nonkwá natonhnharáhtshera, nok ne ionkweʼtáksenʼs iáh oʼthé꞉nen tehotihrharahtsherá꞉ien tsi nahò꞉ten ronhská꞉neks.
29 Roiá꞉ner shakoiaʼtanónhstats ne iakorihwakwaríhshion, nok enshakorihwáhtonʼte nónhka iáh tetierihwaié꞉rits.
30Nón꞉kwe tiakorihwaié꞉ri tiótkon skén꞉nen tsi ratinákere, nok ne iáh tetiakorihwaié꞉ri iáh kiʼ tho thahatinákereke tsi ionhwentsá꞉te.
31Tiakorihwaié꞉ri nón꞉kwe nek tiontá꞉tis ne karihwí꞉ioʼs, nok ne awenʼnáhson entkawennínekenʼne karihwáksen tenkatáhstonʼ kiʼ.
32Thotirihwaié꞉ri kawenní꞉ioʼs nahò꞉ten enthatiwennínekenʼne nok ne ronnonkweʼtáksenʼs nek ne thatiwennínekenʼs ne ahshakotiʼnikonhrakaré꞉wahte.
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.