Proverbs 8
8
Tekonwarénsarons Ne Attokháhtshera
1Satahónhsatat! Attokháhtshera tiakó꞉nonks.
Ne tiorí꞉wa oh naiá꞉wenʼne naiesahronká꞉ten.
2Onontoharà꞉ke ákta tsi tiohá꞉te
tánon tsi teiohahó꞉ken eʼthó ítkate.
3Tsi ieiontaweiá꞉tha tsi tkaná꞉taien,
tsi tioteʼenhrakahrón꞉ton tiakó꞉nonks:
4“Kwaʼnekén꞉nis sewakwé꞉kon
tkwén꞉nonks ne onhwentsaʼkehró꞉non.
5Áreʼkok kenh tshiekaié꞉ri tsi nisateʼnikonhríson? Satéweienhst ahsateʼnikonhrísa.
Tesatenonhwarorí꞉tonte kenh? Satéweienhst ne aiesaʼnikón꞉rote.
6Satahónhsatat ne kwáh ionehrákwa akewennaʼshón꞉ʼa;
tsi nahò꞉ten enkonhró꞉ri né꞉ne tkariwaié꞉ri.
7Tsi nahò꞉ten ká꞉ton né꞉ne tó꞉kenhske;
íkswenhs ne onó꞉wen.
8Akwé꞉kon tsi nahò꞉ten entkatá꞉ti tó꞉kenhske;
iáh tekaʼnikonhrhá꞉ton iáh oni thaʼiakoianáksaʼte.
9Nónhka í꞉non iaʼteieká꞉nere akwé꞉kon kiʼ iakoʼnikonhraién꞉taʼs;
nónhka akwé꞉kon iakoterién꞉tare akwé꞉kon tshiewé꞉ne.
10Né꞉ʼe será꞉ko nahò꞉ten enkonrihónnien né꞉ne iá꞉we kahwistarà꞉ken;
ne será꞉ko ne karihonnienníhtshera tsi ní꞉ioht ne kwáh tioiánere ohwistanó꞉ron.
11Í꞉ʼi ne Attokháhtshera, Í꞉ʼi sénha watiánere tsi ní꞉ioht ne ohwistanoronʼshón꞉ʼa;
iáh oʼthé꞉nen thaʼtesatonhontsó꞉ni ne taionkhí꞉ren.
12Í꞉ʼi ne Attokháhtshera wakkaʼenionhtsherí꞉io;
wátien ne karihonnienníhtshera tánon tetiaʼtorehthaʼtsherí꞉io.
13Nó꞉nen entskwénienhsteʼ ne Roiá꞉ner, énhtswen kiʼ ne karihwáksen;
íhkswens naʼkatkáhtho tsi nihatiweiennò꞉ten nónhka iontatón꞉ni, ó꞉ni ne karihwanéren tánon ne owennaʼshón꞉ʼa ne kaʼnikonhrhá꞉ton.
14Eʼthó nitiéhrha tsi nahò꞉ten kateʼnikonhrón꞉nis.
Wakeʼnikonhraientátskon tánon keʼshátste.
15Kheiaʼtakéhnhahs rotinontiió꞉shon nahonterihwahténtiaʼte ne raotikoráhsera
tánon ne ratikó꞉ra kaianerenhserí꞉io ahatiianerenhserón꞉ni.
16Akwé꞉kon ne ratikorá꞉shon tsi ionhwentsá꞉te né꞉ʼe ronterihwahtentiá꞉tha ne raotinakerahserá꞉kon,
akwé꞉kon tkatká꞉waʼs kaiaʼtakehnháhtshera, ók ó꞉ni ne ronaterihón꞉ton.
17Khenorónhkhwa ónhka ionkenorónhkhwa;
ne ónhka iontiaʼtíhsaks eniontiaʼtatshén꞉ri.
18Kakwahtshéhtshera tánon kakwenienhstáhtshera,
ataʼkaritéhtshera tánon kaianerehstáhtshera wátien naontakáhtkaʼwe.
19Tsi nahò꞉ten entkón꞉ion ne sénha ioiánere tsi ní꞉ioht ne kwáh tioiánere aóskon ohwistanó꞉ron,
ók ó꞉ni ne kwáh tioiánere aóskon kahwistarà꞉ken.
20Tsi tekatekhaháhkhwa né꞉ne tkarihwaié꞉ri;
né꞉ʼe wakathahitáhkhe ne aterihwakwarihshionhtsherá꞉kon,
21ahtshoʼkowáhtshera entekhé꞉ion nónhka ionkenorónhkhwa,
thentká꞉raʼne raotinónhskon ne kanoròn꞉shon.
Attokháhtshera Shé꞉kon Ióhthare
22Ne Roiá꞉ner í꞉ʼi ne kwáh tiotierenhtáhkwen ratiaʼtíson,
né꞉ʼe tiohén꞉ton ne raoioʼténhseraʼshón꞉ʼa ne wahón꞉nise tkén꞉ne.
23Í꞉ʼi tioterénhton ratiaʼtíson
tsi ní꞉ioht ne tsi nahoʼtén꞉shon rohsaʼáhnion ne shontontonhwentsatáhsawen.
24Ó꞉nen shiwakenakerá꞉ton tsi niió꞉re ne kaniataraʼkehkó꞉wa,
tánon árehko sikahné꞉ko ne iáh thaʼteiohnekahiò꞉tsis.
25Ó꞉nen shiwakenakerá꞉ton tsi niió꞉re shiiononténion;
ók ó꞉ni ne kenʼnikanontá꞉sa,
26tánon ohén꞉ton ne Rawenni꞉io shaʼronwentsísa tánon tsi kahentaké꞉ron
ók ó꞉ni ne sewahtsà꞉na noʼkèn꞉ra.
27Eʼthó ié꞉keʼskwe shaható꞉kenhsteʼ tsi karonhiá꞉te,
tánon ó꞉ni kaniataraʼshón꞉ʼa waható꞉kenhsteʼ tsi tetiatékhen,
28wahatokenhstánion tsi ioronhiarátieʼs tsi karonhiá꞉te,
tánon wahahnhotón꞉ko ne kaniataraʼkehkó꞉wa tiohnaweró꞉ton ne ohnekaʼshón꞉ʼa,
29wahshakóhnhaʼne ne ohnekaʼshón꞉ʼa ne kaniataraʼkehkó꞉wa
tóhsa sénha aontakahnekakará꞉tate tsik niió꞉re wahshakoríhon.
Tho ié꞉keʼskwe ne shahrón꞉ni tsi nón꞉we nontoríshen nonhwéntsa.
30Skátne iákeneʼskwe, tsi shí꞉ken ní꞉ioht ne Í꞉ʼi akenón꞉wa akénhake,
tahí꞉ion niaʼtewenhniserá꞉ke natonhnharáhtshera,
tiótkon wakatonhnháhere tsi iákeneʼs—
31Wakatonhnháhere tsi ionhwentsá꞉te
tánon wakerienʼtí꞉ios tsi nonkwá꞉ti nonkwehshón꞉ʼa.
Attokháhtshera Shé꞉kon Ióhthare
32Ó꞉nen ká꞉ti, ne kenʼnitisewaién꞉ʼa takwatahónhsatat,
tho naʼsewá꞉iehr nahò꞉ten enkí꞉ron tánon ensewatonhnhá꞉ren.
33Sewatahónhsatat tsi nahò꞉ten waʼehtshirihónnien.
Sewattókhak tánon tóhsa sewatié꞉saht nahò꞉ten wesewathón꞉teʼne.
34Nónhka enionkwatahónhsatate tánon—
nónhka niaʼtewenhniserá꞉ke ionkehrhá꞉re tsi wakatehnhoká꞉ronte
tsi nón꞉we nikì꞉teron eniakotohnhá꞉rake.
35Nónhka eniontiaʼtatshén꞉ri enietshén꞉ri ne iohnheʼón꞉we,
tánon ne Roiá꞉ner enhawerienʼtí꞉io ne raotirihwà꞉ke.
36Nónhka iáh thaiontiaʼtatshén꞉ri eniontatkarón꞉ni;
nónhka iónkswenhs konwanorónhkhwa ne kenhé꞉ion.”
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.